Nɛra Kura 19 - mzwDBL

Nee baa kpɔ sɔ nɛn waa kah doŋa

¹ Korowii berɔ ŋɔ Mosis ne Arɔn be ŋɔ,

² “Mmara maa dɛ nyin n do Israel tena a ta laanee kɛŋɔ, bá lawɛ naneswɛm waa wola kirihiah bɛlbwa dii, baa wola daa kpɔe dawɛ o nɛɛ dɛ kpɔɔ parɛ ka ba tɛ mɛ.

³ Hé lawɔ tɛ sɔfo Eliasa, ásɛ o le o ne he bini kaa dahara dɛ́ ka kpoo n siwi ta.

⁴ Ásɛ sɔfo Eliasa kpɔ nonii leɡe nao la chal, dɛ́ kpɔ sie chaɡɛ n Dea Cheremibɔr, dɛ́ ka ɛ merɛ bela kera anuanɛ.

⁵ Wɛɛ cheo nyiŋi bá fuh nabir la. O tɔn ne o ol, ne o chal dɛ o tea bini kwaa bwa.

⁶ Sɔfo Eliasa chɛ kɛ ó kpɔ peleme daa ane, ne hesɔp ne pee pona baa doa konswɛɛma ta nao waa dɛ fuh la nɛ.

⁷ Waa ɛ ɡɛ tonɛ la, ó sɔ ne, dɛ́ chɛɡɛ o laala mɔɔ dɛ́ won berɛ ba bela baa baŋre ba tɛnte deene la. Kɛ o doŋa ɛɛ do o nɛɛ ka tel jɔmɔra.

⁸ Naate waa fuh nao la ɡe chɛ kɛŋɔ o sɔ ne dɛ chɛɡɛ o laala. O ɡe kah doŋa ka tel jɔmɔra mɔɔ o doŋa le o nɛ.

⁹ Nɛn waa wola doŋa kaeh laanee chɛ kɛ ó pa nao la tɔɔ ka ta bela doŋa bɛlbwa aa wola toole tɛnte deene la dahara. Israel tena la kwaara cheɡ, ásɛ dɛ ba dɛ nyin dɛ sɔ nɛn waa kah doŋa ne aa, bá doa nee ta dɛ́ kpɔ sɔɔ. Anee dɛ́ baɡle kɛ o wechɔɡa bwa le o nɛ.

¹⁰ Naate waa pa nao la tɔɔ ka cheɡ la ɡe chɛ kɛŋɔ ó sɔ nee dɛ́ chɛɡɛ o laala. O ɡe kah doŋa ka tel jɔmɔra mɔɔ o doŋa le o nɛ. Gɛ waa nɔ chɔ le saŋ bɛlbwa dɛ tɛ Israel tena ne hɔɔhra baa soɡe ba bini bwa.

¹¹ Nomɛlbwa waa leɡe nɛn waa sewa la kah doŋa tɔpera anuanɛ.

¹² Naate chɛ kɛŋɔ ó kpɔ nee la ane sɔ tɔpetooro wee waa kah doŋa la, ne tɔpenuanɛ wee mɔɔ dɛ́ le o doŋa waa kaah la ta. Kɛ dɛ o ta o doŋa sɔe ta tɔpetooro wee ne tɔpenuanɛ wee la aa, o ta kah doŋa.

¹³ Nomɛlbwa waa leɡe nɛn waa sewa dɛ vɛh o doŋa sɔe dɛ ta la kpɔ doŋa kah n Tɛnte Dea la. A ta chɛ kɛ bá kuro ja Israel tena bini. Baa wola nee aa laa nɛn doŋa dɛɛ kpɔ o nɛɛ Tɛnte la ɛɛ merɛ naate nɛɛ nomanta, o kah doŋa. O doŋa ta lɔ o nɛ.

¹⁴ Mmara waa lole dɛ tɛ nomɛl waa sewɛ tɛnte dea bini laanee nɔ. Nomɛlbwa waa lɔ ɡɛ tɛnte dea la bini, ne nomɛlbwa waa ka jo bela bwa kah doŋa tɔpera anuanɛ.

¹⁵ Komɛlbwa waa dɔ tɔ baa wola o ta tɔe ɡɛ saŋ la ɡe kah doŋa.

¹⁶ Nomɛlbwa waa leɡe nɛn baa kpoo, kɛɛ nɛn waa sewɛ ɡɛ nɛra bwa aa dɛ sewɛ, kɛɛ o hoɡ, kɛɛ dɛ o ŋwamee yaa, o kah doŋa ka tel tɔpera anuanɛ.

¹⁷ Nomɛlbwa waa kah doŋa la, ɛ nao la tɔɔ aa laa nɛndoŋa dɛɛ kpɔ o nɛɛ la ane do kon bini, dɛ́ do nefala a ta.

¹⁸ Naate waa wola doŋa kaeh chɛ kɛ ó kpɔ hesɔp daa su nee la ne tɔɔ la ta, dɛ́ ɛ merɛ tɛnte dea nɛn aa sewɛ o bini la ta, ne nɛra baa lɔ o bini, dɛ o laala bwa ta. Dɛ nomɛl leɡe nɛn waa sewa hoɡ kɛɛ ŋwam, kɛɛ nɛn baa kpoo, kɛɛ dɛ sewɛ ɡɛ nɛra bwa aa dɛ sewɛ aa, ó ɛ nee la merɛ o ɡe nɛɛ ɡɛ.

¹⁹ Naate waa wola doŋa kaeh la kpɔ hesɔp daa la su nee la ta, dɛ́ ɛ merɛ naate waa kah doŋa la nɛ tɔpetooro wee ne tɔpenuanɛ wee la ta. Tɔpenuanɛ wee la, ó laa doŋa kpɔ doŋa te la nɛ. Naate baa laa doŋa kpɔ o nɛɛ la chɛɡɛ o laala dɛ́ sɔ ne, ásɛ awola jɔmɔra la, dɛ o le doŋa ta.

²⁰ Dɛ nomɛl kah doŋa dɛ vɛh a sɔe dɛ ta aa, a chɛ kɛŋɔ bá sɔɔ lola, dɛkalkɛŋɔ o kpɔ doŋa kah n Tɛnte Dea la. Ba ta doŋa laa kpɔ o nɛ, o ta kah doŋa.

²¹ Mmara nɔ chɔ le tɛɛ ba saŋ bɛlbwa. Naate waa ɛ nee la dɛɛ merɛ la ɡe chɛ kɛ ó chɛɡɛ o laala. Nomɛlbwa waa leɡe nee la ɡba ɡe kah doŋa ka tel jɔmɔra.

²² Komɛlbwa naate waa kah doŋa aa leɡo la ɡe kah doŋa. Nomɛlbwa waa leɡo la ɡe kah doŋa ka tel jɔmɔra.”