Nɛra Kura 18 - mzwDBL

Sɔfore ne Lewi dea tena toma

¹ Korowii ŋɔ Arɔn be ŋɔ, “He ne he bibaala ne Kohat dea tena baa le Lewi dea nɔn taa n Tɛnte Dea la wobɛlbwa do. Dɛ sɔfore toma ane ta aŋwɛnɛ ta kpɔe yaa, he ne he bibaala ɡbo deŋnee mɛɛ ba tɛra.

² Saŋ bɛlbwa he ne he bii aa dɛɛ ba toma ɛɛ n Tɛnte Dea waa ɛ n Dea Cheremibɔr bela la, yerɛ he bala Lewi dea tena la bá ba cha he ne he bibaala haa dɛ cha nɛra la, ásɛ ba won tom mɛ ɡɛ aa chɛa la.

³ Ba toma ɛɛ bwa lɔ he nɔn ta. Gel ba nyiŋi kɛrɛdɛ dɛɛ ɛ toma bɛlbwa sese aa lɔ n Tɛnte Cheremibɔr dembaah bela la bwa. Kɛ ɡel ba nyiŋi kɛrɛdɛ dɛ bɛ laala baa kpɔa kwaa Boɡoroŋ la bini, kɛɛ kon baa dɛ ɛ saraha o ta la ba leɡe. A ba ɡɛ naa, he ne ba bwa ɛɛ serewoo.

⁴ Lewi dea tena la chɛ kɛŋɔ bá ba ja he nɛ, dɛɛ ɛ toma bɛlbwa sese aa lɔ n Dea Cheremibɔr bela. Kɛ nɛmpɛɛ bɛlbwa ta chɛ kɛŋɔ ó ba bela haa lole la.

⁵ He ɡbabir chɛ kɛŋɔ hé nyiŋi Boɡoroŋ la ne kon baa dɛ ɛ saraha o ta la ta, ásɛ n baah bɛ Israel tena la nɛɛ ba di kpa.

⁶ Men Korowii ɡbabirii le he bala Lewi dea tena le Israel tena bini, dɛ́ kpɔ ba tɛɛ, ásɛ ba kpɔ ba te che tɛ mɛ dɛɛ ɛ n Dea Cheremibɔr bela toma.

⁷ He ne he bibaala la ɡboo chɛ kɛ hé ɛ sɔfore toma kon baa dɛ ɛ saraha o ta ne pateesan la bini toma. N kpɔ sɔfore toma la dɛɛ kɛ heya. Nɛmpɛɛ bɛlbwa waa ba Boɡoroŋ la jwɛɛh la chɛ kɛ bá kpoo.”

Saraha kwaa aa ɛ sɔfore ne Lewi dea tena kwa

⁸ Korowii berɔ ŋɔ Arɔn be ŋɔ, “N ɡbabirii kpɔe chɔ sarahare baa kpɔa baa tɛ mɛ la nyoa. Saraha kwaa aa do ɡoroŋ Israel tena kpɔ baa tɛ mɛ la bwa, he ne he bibaalaa n kpɔa dɛɛ tɛ, á ɛ he dibɔr saŋ bɛlbwa dɛɛ la.

⁹ Heyaa chɛ kɛŋɔ hé kpɔ kwaa baa kpɔa ba ɛ saraha baa wola an fuih a do ɡoroŋ kohona la bwa. Koŋkɛɛla bwa baa kpɔa baa tɛ mɛ a do ɡoroŋ kohona la, hale dɛ mea saraha, kɛɛ wechɔɡa kpɔe dɛ kɛ saraha, kɛɛ bolchɔɡe dii sarahaa yoo, a ɛ he ne he bibaala dibɔr.

¹⁰ Hé dia kɛŋɔ kwaa aa wera dɛ do ɡoroŋ kohona. Baa bɛlbwa won ane dii. A chɛ kɛ hé jemɛ kɛ a ɛ kwaa aa do ɡoroŋ kohona.

¹¹ Anɔ la aa jaa dɛ ɛ he dibɔr laanee nɔ. Kwaa ba yon kwaa ane cheɡ dɛ́ le saraha kwaa bwa Israel tena yon kpɔ baa tɛ mɛ, dɛ́ ɡɔɔra men Korowii sie la, n kpɔa tɛ he ne he bibaala ne bihaahna, á ɛ he dibɔr saŋ bɛlbwa. He dem nɛn bɛlbwa waa wola doŋa kaeh won a dii.

¹² Kondikonloɡla ane kɛŋɔ ɔleve noo aa wera ne senfala aa wera dɛ meloɡla baa kpɔa baa tɛ men Korowii laanee n kpɔ tɛ heya.

¹³ Konloɡla ane bɛlbwa aa le harɛ la ta ba kpɔ ba tɛ men Korowii la bwa ɛ he kwa. He dem nɛn bɛlbwa waa wola doŋa kaeh won a dii.

¹⁴ Israel harɛ ta komɛlbwa baa kpɔ ba ó ɛ men Korowii ɡbo kon la ɛ he kwa.

¹⁵ Israel tena bibanloɡla ne ba konaatena biloɡla ambala baa kpɔ ba tɛ mɛ la ɛ he kwa. Kɛ bibanloɡla ne konaatena baa kia biloɡla ambala te, a chɛ kɛ hé ɡel ba charɛ a nyuune.

¹⁶ Bibanloɡle waa di korobie la, hé kpɔ suuɡapoŋa anue charɛ o nyu, ɡɛ baa maɡa bil Korowii Dea bela aa ɛ suuɡa bwejeɡre fifraanɛ la.

¹⁷ Nao kɛɛ pee, kɛɛ booh biloɡle waa ɛ ombal te, he bɛ a nyuune charɛ. A te ɛ n kwa. Hé kpɔ a chale merɛ saraha kon la ta, ásɛ dɛ fuh a noorare la kɛŋɔ saraha baa dɛ fuah. A sɔɔh ɛɛ do men Korowii somee.

¹⁸ Ola la kabora chɛ kɛ a ɛ he kwa, ɡɛ ba yon kpɔ a bambili ne a nadiɡ hwie ɛ saraha dɛ́ ɡɔɔra nyundua dɛ́ viiɡa men Korowii sie a ɛ he kwaa la.

¹⁹ Saraha kwaa aa do ɡoroŋ bwa Israel tena aa kpɔa baa tɛ mɛ he yon le ane cheɡ la, n kpɔɔ tɛ he ne he bibaala ne bihaahna á ɛ he dibɔr saŋ bɛlbwa. A ɛ fɔo dɛ chɔ le waa wola chɔɡ bwa dɛ tɛ n ne hen ne he naanar bwa.”

²⁰ Korowii berɔ ŋɔ Arɔn be ŋɔ, “Haa dibɔr bɛlbwa Israel harɛ la taa dɔ ó ɛ he kapɛrɛ kon. Menee he dibɔr ne he kapɛrɛ.

²¹ Lewi dea tena te, Israel tena kwaa baa bɔne a bini bɔre fi dɛ kpɔ bɔrbeŋkpoŋ baa tɛ mɛ laanee n kpɔ tɛɛ ba kɛŋɔ ba kapɛrɛ, toma baa dɛ ɛ n Dea Cheremibɔr bela nomanta.

²² Le fini dɛɛ kaa, dɛ Lewi dea tena laa aa, Israel te bɛlbwa bɛ n Dea Cheremibɔr bela bɛne. Aa ɛ wechɔɡaa dɛ́ kaa naate ne seo ta.

²³ Lewi dea tenaa chɛ kɛŋɔ báa ɛ n Dea Cheremibɔr bela toma, ásɛ dɛ toma ane ta aŋwɛnɛ ta kpɔe yaa, banee dɛ́ dɔ a deŋnetɛra le n be. A ɡɛ waa nɔ ɛɛ chɔ lee dɛɛ la, hale naanar baa ka ba bwa bini. Ba te ta kapɛrɛ bɛlbwa dɔe Israel tena bini.

²⁴ Israel tena kwaa baa bɔne a bini bɔre fi, dɛ́ kpɔ bɔrbeŋkpoŋ baa tɛ mɛ laanee ɛ ba kapɛrɛ. A waa n ŋɔ ba te ta kapɛrɛ bɛlbwa dɔe Israel tena bini la.”

²⁵ Korowii berɔ ŋɔ Mosis be ŋɔ

²⁶ ó bol Lewi dea tena la be ŋɔ, “Dɛ he dɔ dibɔr bɔrbeŋkpoŋ la le kwaa Israel tena aa bɔne a bini fi la ta naa, hé ɡe bɔne a bini bɔre fi, dɛ́ kpɔ bɔrbeŋkpoŋ tɛ men Korowii a ɛ saraha tɛo.

²⁷ He saraha ɛɛ doo kɛŋɔ mea aa le pɛla ta, kɛɛ ɡrepo daa nɔna baa harame a nee la ken tɛ heya.

²⁸ Gɛɛ aa ba ɛɛ he ɡe won kpɔ he saraha kwaa aa le Israel tena be bɔrbeŋkpoŋ la ɛ saraha tɛ mɛ. Anɔ la aa ɛ men Korowii bɔr dɛ le a ta la chɛ kɛ hé kpɔ tɛ Arɔn waa ɛ sɔfo la.

²⁹ Kwaa baa kpɔa ba la bini andɛɛɡa ne anɔ la aa do ɡoroŋ kohona laanee chɛ kɛ hé kpɔ ba tɛ mɛ.

³⁰ Berɛ ŋɔ Lewi dea tena la be ŋɔ, ‘Hé kpɔ a bini andɛɛɡa ne anɔ la aa do ɡoroŋ ba tɛ mɛ naa, aa doo kɛŋɔ mea aa le pɛla ta kɛɛ ɡrepo daa nɔna baa harame a nee la ken tɛ heya.

³¹ He Lewi dea tena ne nɛra baa lɔ he dem, ɛɛ won di a kabora bobɛlbwa, dɛkalkɛ a ɛ n Dea Cheremibɔr bela toma haa dɛ ɛ la kembɔr.

³² Dɛ he pɛne a bini andɛɛɡa ba tɛ men Korowii aa, haa bolchɔɡee di a bɔr. Haa doŋaa kpɔ kah kwaa aa do ɡoroŋ Israel tena aa kpɔa ba ɛ saraha la, ásɛ dɛ bɛ serewe.’ ”