Nɛra Kura 17 - mzwDBL

Arɔn daŋɡbala papooni moɡa wa

¹ Korowii berɔ ŋɔ Mosis be ŋɔ,

² “Yerɛ Israel tena dɛ lɛ daŋɡbale fi dɛ anɛ le ba deene nomonnyuune la be. Dea bɛlbwa kon beŋkpoŋ, ásɛ dɛ chwerɛ dea bɛlbwa nomoa sɔn dawɛ o daŋɡbala ta.

³ Chwerɛ Arɔn sɔn dawɛ Lewi dea daŋɡbala la ta, dɛkalkɛŋɔ a chɛ kɛ dea nomonnyu bɛlbwa dɔ o daŋɡbala.

⁴ Kpɔ daŋɡbale la ka bil n Dea Cheremibɔr, N Ne Nɛwɛnyina Fɔo Daka la sie bela maa dɛ cheme heyaa la.

⁵ Naate máa leo ó ɛ sɔfo la, o daŋɡbala la ɛɛ moɡɛ papoonii, ásɛ n teŋe saŋ bɛlbwa naɡra Israel tena aa dɛ naɡre he waa a pe mɛ la ta.”

⁶ Ate, Mosis ŋɔ Israel tena la be, asɛ ba nomonnyuune la kpɔ daŋɡbale fi dɛ anɛ tɛo, bɛlbwa kon beŋkpoŋ. Dɛ Arɔn ɡe kon jao.

⁷ Ate, Mosis pa ka teɡli Korowii Tɛnte Dea, O Ne Nɛwɛnyina Fɔo Daka la sie.

⁸ Tɔ aa pera la, Mosis kaa jo Korowii Tɛnte Dea bela, dɛ Arɔn daŋɡbala waa cheɡa tɛ Lewi dea tena la moɡɛ papooni, hale dɛ fe, dɛ nɔnɛ daa bɛl nɔna baa dɛ yera almɔn.

⁹ Ate, Mosis pa daŋɡbale la bwa aa lɔ Korowii sie bela la le dɛ ba baɡle Israel tena la, asɛ nomoa bɛlbwa ba nyiŋi dɛ kpɔ o kon.

¹⁰ Korowii berɔ ŋɔ Mosis be ŋɔ, “Berɛ kpɔ Arɔn daŋɡbala la ka tel N Ne Nɛwɛnyina Fɔo Daka la sie, ó do le dɛɛ baɡle lwɛmkpeɡ tena wa. Anee dɛ́ teŋe n waa baa dɛ naɡre nɔ ta dɛ bɛ serewe.”

¹¹ Asɛ Mosis ɛ ɡɛ tenten Korowii aa doo la bwa.

¹² Ate, Israel tena la ŋɔ Mosis be ŋɔ, “Amɔ te, yaa serewoo! Ya waa bwa tonɔ kwaraa!

¹³ Nomɛlbwa waa bɛne Korowii Tɛnte Dea la kwaraa ɛɛ sewɔɔ. Ya bwa dɛ ba tona!”