Nɛra Kura 15 - mzwDBL

Kwaa baa kpɔa dɛɛ ja saraha kwaa ta

¹ Korowii ŋɔ Mosis be ŋɔ,

² ó bol Israel tena la be ŋɔ, “Dɛ he kaa tel harɛ Korowii aa kpɔa dɛɛ ba heyaa tɛɛ he so o ta la,

³ dɛɛ nyin he fuh saraha kwaa tɛo dɛ́ le he nae kɛɛ peera bini a sɔɔh do som o be naa, dɛ saraha kwaa haa fuah kɛɛ nyobaɡa saraha, kɛɛ anɔ la aa le he bambile ta, kɛɛ he tɔpejena la dii saraha bɛlbwa ɡee yaa,

⁴ a chɛ kɛ náate waa kpɔ saraha kwaa dɛɛ ba la ɛ mea kuruwa beŋkpoŋ del ja a ta ba tɛ Korowii. Á ɛ men aa kpera kɛrɛdɛ dɛ́ kpɔ noo pɛrɛntoa beŋkpoŋ ne fah koo a ta.

⁵ Pebie bɛlbwa waa kpɔ ba ɛ saraha baa fuh kɛɛ saraha bɛlbwa la, náate kpɔ sen dɛ ɛ pɛrɛntoa beŋkpoŋ ne fah ja a ta ɛ sen saraha.

⁶ Dɛ pebal ɡee hɛɛ ba kpɔe ba ɛ saraha tɛ Korowii naa, hé kpɔ men aa kpera kɛrɛdɛ kuruware anɛ, dɛ́ kpɔ noo pɛrɛntoa dela anɛ koo a ta á ɛ mea saraha dɛ ja a ta,

⁷ dɛ́ kpɔ sen dɛ ɛ pɛrɛntoa dela anɛ ja a ta ɛ sen saraha, ásɛ a sɔɔh do som Korowii be.

⁸ Dɛ he kpɔ nabale dɛɛ ba ba ɛ saraha baa fuuh kɛɛ nyobaɡa saraha kɛɛ deŋnesɔɔhna saraha tɛ Korowii aa,

⁹ hé kpɔ men aa kpera kɛrɛdɛ dɛ ɛ kuruware atoro ja nabale la ta ba ɛ mea saraha la, dɛ́ kpɔ noo pɛrɛntoa dela atoro koo a ta, dɛ́ kpɔ ja ba.

¹⁰ Hé kpɔ sen pɛrɛntoa dela atoro ja, dɛ́ ba ɛ sen saraha. A ɛ saraha baa fuah a sɔɔh ɛɛ do som Korowii be.

¹¹ Nabal bɛlbwa kɛɛ pebal, pebie kɛɛ bombie bɛlbwa la, ɡɛɛ chɛ kɛ he ɛo.

¹² Gɛɛ chɛ kɛ hé ɛ a bini bɛlbwa haa dɛ ba kpɔe ɛ saraha la.

¹³ Gɛɛ chɛ kɛ Israel te bɛlbwa waa ba saraha kwaa ne ŋɔ bá fuh a sɔɔh do som Korowii be la ɛ.

¹⁴ Hale he naanar baa ka ba, dɛ hɔɔh bɛl baa choɡ heya kɛɛ dɛ ba so he bini dɛɛ nyin ó ɛ ɡɛ saraha baa fuah a sɔɔh do som Korowii be naa, ó ɛa ɡɛ tenten haa dɛ ɛa nɔ.

¹⁵ Wesiwi beŋkpoŋii chɛ kɛ á chɔ le tɛ Israel tena ne hɔɔhra bwa. Gɛ waa nɔ chɔ le saŋ te bɛlbwa, dɛ tɛ he naanar baa ka ba bwa. He ne hɔɔhra la bwa ɛ nɛmbeŋkpoŋ men Korowii sie.

¹⁶ A ɡɛ Mmara nɔ chɔ le tɛ he ne hɔɔhra baa soɡe he bini la bwa.”

¹⁷ Korowii berɔ ŋɔ Mosis be ŋɔ,

¹⁸ ó bol Israel tena la be ŋɔ, “Dɛ he baa tel harɛ Korowii kpɔ heyaa dɛɛ kaa o ta la ta,

¹⁹ asɛ dɛ dɔ harɛ la ta kondikwaa ane di aa, hé kpɔ a bini ane ɛ saraha tɛo.

²⁰ Hé kpɔ meloɡla haa tɔ sie nama la ane ɛ paanoo ane so siwii baa dɛ do noo a ta la ɛ saraha tɛo.

²¹ Le he naanar baa ka ba bwa bini, a chɛ kɛ hé kpɔ meloɡla haa nama nɔ ɛ saraha tɛ Korowii.

²² Dɛ he ta wone teŋɛ waa Korowii aa do Mosis nɔ bɛlbwa ta, dɛ he laa saahna,

²³ kɛɛ mmarare waa cheɡɛ Mosis nɛɛ dɛ kpɔ tɛ heyaa dɛ le awola waa bol waa la dɛ kpoŋe kaa he naanar baa ka ba bwa bini,

²⁴ dɛ he bwa laa saahna, asɛ nɛra la bwa jemaa, amɔ te bá bwa kpɔ nabale ɛ saraha baa fuuh o sɔɔh do som Korowii be, dɛ́ kpɔ mea ne sen sarahare waa baɡle a waa la ja, ne bombal ba ɛ wechɔɡa kpɔe dɛ kɛ saraha.

²⁵ Sɔfo la chɛ kɛ ó soŋe Israel tena bwa wechɔɡa tɛɛ ba Korowii be, ásɛ o kpɔ kɛ ba, dɛkalkɛŋɔ ba laa saahna. Bá berɛ kpɔ kwaa dɛ ba fuh ɛ saraha, ne wechɔɡa kpɔe dɛ kɛ saraha tɛ Korowii.

²⁶ Wɛɛ kpɔ he Israel tena ne hɔɔhra baa soɡe he bini la bwa wechɔɡaa kɛ heya, dɛkalkɛŋɔ waa haa wola saahnɛ ɛ la maah he bwa.

²⁷ Kɛ dɛ nɛmbeŋkpoŋ ta saahnɛ dɛ ɛ wechɔɡa aa, a chɛ kɛ ó kpɔ bohlor waa di benanyoa ba ɛ wechɔɡa kpɔe dɛ kɛ saraha.

²⁸ Sɔfo la kpɔ soŋe naate la wechɔɡa waa wola saahnɛ ɛ la tɛo Korowii be, ásɛ o kpɔ kɛo.

²⁹ A ɡɛ Mmara nɔ chɔɔ tɛ nomɛlbwa waa wola saahnɛ ɛ wechɔɡa, hale Israel te kɛɛ hɔɔh bɛlbwa waa soɡe he bini.

³⁰ Kɛ nomɛlbwa saahnɔ ɛ wechɔɡa aa, bwɛɛlembie yo, hɔɔhree yo, naate ɛ Korowii nɛnhɛla. Gɛ nɛn la ta chɛ kɛŋɔ bá kuro ja o nɛra bini.

³¹ Waa ɛ Korowii nɛnhɛla dɛ chɔɡ o Mmarare nomanta, naate ta chɛ kɛ bá kuro ja o nɛra bini kpa. O wechɔɡa dawɛ o nɛ.”

Nɛn waa chɔɡ Ona Tɔpere kpoe

³² Israel tena taa lɔ pua hɛŋle ɡbo harɛ ta bela la, ba na baa bɛl wɛɛ nyin damara Ona Tɔpere ta.

³³ Nɛra baa nao la lawɔ la Mosis ne Arɔn dɛ Israel tena la bwa sie,

³⁴ dɛ ka lawɔ do dea, dɛkalkɛ dɛ ba ta ɡɛ baa ɛo nae mɔɔ.

³⁵ Asɛ Korowii ŋɔ Mosis be ŋɔ, “Baa nɔ chɛ kpoe. A chɛ kɛ Israel tena la bwa lawɔ kaa bela baa baŋre ba tɛnte deene la dahara, dɛ́ ka foɡro bwea kpo.”

³⁶ Ate, ba bwa den lawɔ le dahara dɛ ka foɡro bwea kpo, ɡɛ Korowii aa do Mosis la.

Jɔɔra nyara dɛ do batakaarere nyoo

³⁷ Korowii berɔ ŋɔ Mosis be ŋɔ

³⁸ ó bol Israel tena be ŋɔ, “He ne he naanar baa ka ba bwa, a chɛ kɛ hé nyarɛ jɔɔra dɛɛ do he batakaarere nyoo. Hé pɛrɛ ŋwɛn waa ɛ burum dɛ́ do jɔɔra la bɛlbwa ta.

³⁹ Jɔɔra nɔɔ dɛɛ ba Korowii waa maa do heyaa a ta la dɛɛ liira, á ɡel hɛɛ teŋɛ a ta dɛ bɛ Korowii waa vɛh, dɛ́ kaa teŋɛ he pɛlchɔɡa kwaa haa dɛ naa, ne anɔ la aa lɔ he bambili ta la.

⁴⁰ Gɛɛ hɛɛ ba ɛɛ dɛɛ lii o Mmarare waa do heyaa a ta la bwa ta, dɛ do ɡoroŋ tɛ Korowii haa dɛ tomɔ nɔ.

⁴¹ Korowii haa dɛ tomɔ waa le he ne Ijipt harɛ ta ŋɔ hé baa tomɔ la. Onee Korowii.”