Nɛra Kura 14 - mzwDBL

Israel tena lwɛmkpeɡ wa

¹ Awola jwaana la ne bwa, Israel tena bwa dooɡe lɔŋɔre dɛ wi kohona.

² Ba naɡre Mosis ne Arɔn wa dɛ ŋɔ, “Ya soɡe Ijipt harɛ dɛ fee serewe, kɛɛ dɛ serewe pua hɛŋle ɡbo harɛ ta bonɔ kwaraa naa, ya fe dɛ nyin!

³ Ɛrɛ waa Korowii kpɔ yaa dɛɛ ba harɛ nɔ ta ásɛ ba ba kpoo yaa nɔɔ? Baa lawɛ ya haahna ne biirii kaa. Ya berɔ kaa Ijipt harɛ ta fe ta bɔ naa?”

⁴ Asɛ ba ŋɔ dɔŋa be ŋɔ, “A chɛ kɛ yá le nomoa waa tɔ ya sie, dɛ́ berɛ kaa ya ne Ijipt harɛ ta.”

⁵ Belaa Mosis ne Arɔn kpɔ ba sie pi harɛ Israel tena baa chema la bwa sie.

⁶ Anee Nun bibaa Josua ne Jefune bibaa Kaleb ba fa aa ja nɛra la nɛɛ dɛ ka sɔh nyiŋi harɛ la laa ba laala baa doa la peeɡe, a baɡle kɛŋɔ ba dɛ di suna,

⁷ dɛ ŋɔ Israel tena baa cheme bela la bwa be ŋɔ, “Harɛ yaa ɡaaɡe o ta dɛ ka sɔh nyiŋu la ɛ harɛdɛɛɡe kɛrɛdɛ.

⁸ Dɛ Korowii sɛoh waa, wɛɛ tɔ ya siee, dɛ́ la ya ne harɛ la ta. O ɛ harɛpare ondɛɛɡe, wɛɛ kpɔɔ tɛ yaa.

⁹ He bɛ ɡaeh lɛ Korowii nɛɛ dɛ vɛoh. He bɛ harɛ la ta nɛra ɡe ɔmɛ. Yaa wono pɔ ba nɛ, kwaa baa kpɔ ba te dawɛ a ta la toole kpa. Korowii teŋɛ ya nɛ, he bɛ ban ɔmɛ.”

¹⁰ Kɛ ane a bwa, nɛra la bwa bolɔ ŋɔ baa foɡre Josua ne Kaleb bweaa kpo. Belaa Korowii jirima ba o Dea Cheremibɔr bela, Israel tena la bwa na.

¹¹ Anee Korowii ŋɔ Mosis be ŋɔ, “Saŋ besoo nɛra nɔ ɛɛ ba n nyubaah nyiŋa ɡela ɔ? Ba teŋɔ dɛɛ vɛɛh mɛ ŋɔ baa men yarada, hale n nyokpowe-ɛɛla maa ɛa ba bini la bwa habɔɔ.

¹² Weechɔɡaa mɛɛ ba kpɔe ba ta ba nɛ dɛ́ kpoo ba, kɛ he te, mɛɛ ɡeloo he mun ya kohona dɛ́ warɛ, dɛ́ do kpeɡri ɡwaa ba ɡɛ n fe aa ŋɔa mɛɛ ɛɛ ba la.”

¹³ Mosis berɔ ŋɔ Korowii be ŋɔ, “Dɛ Ijipt tena no a wa aa, ɛrɛɛ baa ba bola ɔ? Ba ɡbabir na he kpeɡri haa kpɔa lɛ nɛra nɔ le ba be.

¹⁴ A ba ɡɛ naa, baa boloo baɡle nɛra baa soɡe harɛ nɔ ta bá ɡe jemɛ a wa. Ba noɔ wubwa dɛ jemɛ kɛŋɔ he cheɡɛ ba habɔɔ he ne ba bol wa, he bam tɔ ba nɛɛ baa valɛ. He tɔ ba sie webaŋa bam waa do jaŋne kaa nyundua bini, asɛ dɛ bɔr joɔ ɡe aa, o yon berɛ nii tɔ ba sie.

¹⁵ He pɛo kpoo ba bwa kera beŋkpoŋ aa, harɛre ta nɛra baa no la, baa dɛɛ boloo ŋɔ,

¹⁶ ‘Ntam Korowii aa ŋwɛɛra dɛ baɡɛ nyoa ŋɔ wɛɛ la Israel tena ne Keenan harɛ taa la, o horɔ, anomanta, o kpoo ba ta pua hɛŋle ɡbo harɛ ta.’

¹⁷ Anomanta, n Naa Korowii, ɡel ya na he kpeɡri ya baah, ɡɛ he fa aa baɡla la.

¹⁸ He ŋɔ he baah aa di warawara, he nyina do kan kohona, dɛ kpɔ wechɔɡ-ɛɛra ne lwɛmkpeɡ tena waa dɛɛ kɛ ba. Kɛ he dɛ tɛr nomɛlbwa waa di bolchɔɡe deŋne, dɛɛ tɛr nɛra baa ɛ wechɔɡa la deŋne, hale dɛ kpoŋe ka tel ba naanar bele batoro kɛɛ banaarɛ baa ka ba la.

¹⁹ Che he nyina waa kana kohona la ta, dɛ́ kpɔ nɛra nɔ wechɔɡa kɛ ba, ɡɛ haa kpɔa dɛɛ kɛ ba le saŋ baa le Ijipt harɛ ta dɛ ba le taraken nɔ la.”

²⁰ Anee Korowii ŋɔ, “N kpɔɔ kɛ ba ɡɛ haa soŋa la.

²¹ Kɛ dɛ a ɛ kasinteŋ kɛ n lole, n jirima ɡe su harɛ bwa ta naa,

²² nɛra la baa na n jirima ne nyokpowe-ɛɛla maa ɛa Ijipt harɛ ta ne pua hɛŋle ɡbo harɛ ta, ba ta n waa noe dɛ ta daah mɛ dɛɛ na hale kera fi bwa la,

²³ ba bini beŋkpoŋ ɡba aa harɛ maa ŋwɛɛ ntam dɛ baɡɛ ba naawa nyoa ŋɔ mɛɛ kpɔɔ tɛɛ ba la taa tel. Nomɛlbwa o siwi aa wola men tɔɡɛ la aa harɛ la taa tel.

²⁴ Kɛ n bonɔɔ Kaleb te aa wola doe kɛŋɔ ban, dɛ dɔ yarada kohona dɛ teŋɛ n nɛɛ bambile bwa ne nɔ, mɛɛ la o ne harɛ waa la o ta la taa, ásɛ o ɛ o naanar kon.

²⁵ Amalɛk ne Keenan tena aa soɡe felembɔjena la bini nɔ, kere hé laa berɛ dɛ́ kpɔ pua hɛŋle ɡbo harɛ ta ŋwɛnɛ waa chɔa dɛ kaa Mposwɛm ta la.”

²⁶ Korowii berɔ ŋɔ Mosis ne Arɔn be ŋɔ,

²⁷ “Ń lawɛ bambile nɛnchɔɡa baa dɛ naɡre n waa nɔ nɛɛ ka tel saŋ besoo? N no waa Israel tena aa dɛ naɡre la bwa.

²⁸ Anomanta, ŋɔ ba be ŋɔ, ‘Men Korowii taa lole nɔ, wobɛlbwa aa le nɛn nyoa n no la taa mɛɛ ba teŋa dɛ́ ɛ tɛo.

²⁹ Hɛɛ serewoo pua hɛŋle ɡbo harɛ nɔ ta. Bɛlbwa waa di bene fifraanɛ ne a habɔɔ ba kuro dɛ chwerɛ o sɔn, asɛ o naɡre n waa laanee dɛɛ ba sewa.

³⁰ He bini bɛlbwa aa harɛ maa ŋwɛɛra sibeɡra ne ŋɔ mɛɛ kpɔɔ tɛ heyaa he so la taa tel, atane Jefune bibaa Kaleb ne Nun bibaa Josua ɡbo.

³¹ He bii haa ŋɔa baa laɡ ba laa taa kaa la, mɛɛ la ba ne harɛ haa vɛah la taa bá ka na som dɛ́ di o tɔnɔ.

³² He te, pua hɛŋle ɡbo harɛ nɔ taa hɛɛ ba serewa.

³³ Asɛ he bii ɛ peteɡra dɛɛ ɡaaɡe pua hɛŋle ɡbo harɛ nɔ ta bonɔ bene fifraanaarɛ dɛɛ koh, á ɛ yarada haa wola dɔe la kembɔr, dɛ́ ka tel kɛŋɔ he bwa aa baa serewe kwaraa.

³⁴ Bene fifraanaarɛɛ hɛɛ ba he deŋnetɛra kembɔr dɔe, benanyoa bɛlbwa cheɡɔ tɛ tɔpera fifraanaarɛ la tɔpebeŋkpoŋ haa kpɔa ka sɔh nyiŋi harɛ la. Ásɛ he na kɛŋɔ men Korowii, dɛ n ŋɔ mɛɛ tɛr he deŋne yaa, dɛ a ɛ sibeɡra.’

³⁵ Nɛnchɔɡa bane le, ɡɛɛ mɛɛ ba kpɔe ɛ nɛra nɔ bwa, kɛŋɔ baa pɛ nyoa dɛɛ yoo mɛ nɔ. Pua hɛŋle ɡbo harɛ nɔ taa baa ba kae, dɛ́ bwa serewe kwaraa. Men Korowiirii bola.”

³⁶ Nɛra Mosis aa tom ba ba ka sɔh nyiŋi harɛ la aa bera ba la, ba ta kasinteŋ ba bolɛ ŋɔ harɛ la wer, a ɡel nɛra la ɛɛ naɡre Mosis wa.

³⁷ Korowii ɡelɔ weechɔɡa ane ba le nɛra baa ɡela waa la perɛ kɛŋɔ harɛ la aa were la nɛ, ba bwa serewe o siwi ta.

³⁸ Baala baa laŋa dɛ ka sɔh nyiŋi harɛ la bwa bini, Nun bibaa Josua ne Jefune bibaa Kaleb ɡboo kaa baa wola serewɛ.

³⁹ Mosis aa bol ɡɛ waa nɔ baɡle Israel tena bwa la, ba wio kɛrɛdɛ.

⁴⁰ Anomanta, tɔɔ aa pera chɔmbibi la, ba iro kaa deŋɡarere harɛ la ta dɛ ŋɔ, “Ya ɛ wechɔɡa, yáa la harɛ Korowii aa baɡɛ yaa nyoa la taa.”

⁴¹ Belaa Mosis ŋɔ ba be ŋɔ, “Ɛrɛɛ hɛɛ ɛ lwɛmkpeɡ dɛɛ vɛh Korowii waa ta teŋa nɔɔ? Ken te aa maɡre.

⁴² He bɛ kaa! He dɔma ɛɛ kpoo heyaa, dɛkalkɛŋɔ Korowii ta he nɛɛ jae.

⁴³ Korowii laa nɔn kpɔ he nɛ, dɛkalkɛŋɔ he le o habɔɔ. Amalɛk ne Keenan tena ɛɛ cheme heya belaa dɛ́ kpoo heya.”

⁴⁴ Kɛ ane a bwa, dɛ ba ɛ ba liire kɛŋɔ aa maɡroo, dɛ teeh dɛɛ kaa deŋɡarere harɛ la ta, a lole kɛŋɔ dɛ Mosis kɛɛ Korowii Ne Nɛwɛnyina Fɔo Daka la ta cheɡɛ o buɡ ta bela baa baŋre ba tɛnte deene la.

⁴⁵ Ate, Amalɛk ne Keenan tena baa soɡe deŋɡarere harɛ la ta la tu ba lɔ tɔ ba nɛ, ba lɔɔ ba dɛ doŋ ba ka tel bwɛɛ Hɔrma ta.