Nɛra Kura 13 - mzwDBL

Keenan harɛ ta sɔeh ka nyiŋi

¹ Korowii ŋɔ Mosis be ŋɔ,

² “Le baala la bini bane bá ka sɔh nyiŋi Keenan harɛ maa kpɔa dɛɛ ba Israel tena tɛɛ la. Deene la bɛlbwa le o nomonnyu bá kaa.”

³ Anomanta, ɡɛ Korowii aa do Mosis laanee o lee ba bá le Paran pua hɛŋle ɡbo harɛ ta dɛ kaa. Dɛ ba bini bɛlbwa ɛ nomonnyu Israel tena bini.

⁴ Nɛra waa tom ba la sɔnaa teŋa nɔ, Rubin dea, Sakur bibaa Samoa.

⁵ Simeon dea, Hɔr bibaa Safat.

⁶ Juda dea, Jefune bibaa Kaleb.

⁷ Isaaka dea, Josef bibaa Iɡal.

⁸ Efrem dea, Nun bibaa Hosia.

⁹ Bɛnjamen dea, Rafu bibaa Palti.

¹⁰ Sebulon dea, Sodi bibaa Gadeɛl.

¹¹ Manasɛ dea, Susi bibaa Gaadi waa ɛ Josef naa.

¹² Dan dea, Gemali bibaa Ameɛl.

¹³ Aasa dea, Maekel bibaa Sɛtur.

¹⁴ Naftale dea, Vofsi bibaa Naabi.

¹⁵ Gad dea, Maki bibaa Gewɛl.

¹⁶ A ɡɛ nɛra nɔɔ Mosis tomɛ ba ka sɔh nyiŋi harɛ la. Dɛ Mosis tɛ Nun bibaa Hosia sɔnfale bɛl baa yerɔ Josua.

¹⁷ Waa tom ba ŋɔ bá ka sɔh nyiŋi Keenan harɛ la, o ŋɔ, “Hé kpɔ Nɛɡɛv pua hɛŋle ɡbo harɛ weekaŋle nyunduabɔr, dɛ́ kaa deŋɡarere harɛ la ta.

¹⁸ Hé pese harɛ la, dɛ́ na ɡɛ waa doa, dɛ́ berɛ nyiŋi kɛŋɔ nɛra baa soɡe o ta la kpeɡri kɛɛ baa kpeɡe, ba warɔ kɛɛ ba ta warɔɔ.

¹⁹ Hé nyiŋi ɡɛ harɛ la mar aa doa ba so o ta la, o wer kɛɛ waa weroo? Ne ɡɛ bwɛɛre la aa doa ba so a ta. Ba ma danjwɛkpeɡa bara kɛɛ, ba ta mae bara ɔ?

²⁰ Hé nyiŋi bela harɛ teera la na, harɛdɛɛɡee kɛɛ harɛdɛɛɡe laa ɔ? Daa lɔ o ta kɛɛ daa toole o ta nɔ? Hé takapɔ ba daa aa lɔ bela nɔna ane ne.” Dɛ ɡrepo nɔnloɡla swɛɛra saŋee.

²¹ Ate, ba chiɡ ŋwɛnɛ ta dɛ ka sɔh nyiŋi harɛ la. Ba cheɡɛ Sin pua hɛŋle ɡbo harɛ ta, dɛ ka le Rehob waa lɔ Lebo Hamat ŋwɛnɛ ta.

²² Ba kpɔ Nɛɡɛv waa ɛ pua hɛŋle ɡbo harɛ weekaŋle harɛbɔr dɛ ka tel Hɛbrɔn. Dɛ nɛra bane baa dɛ yer ba Anak naanar soɡe bela. Banee Ahiman ne Sɛsae dɛ Talmai tena. Dɛ ba vɔrɔwe Hɛbrɔn bene anuanɛ mɔɔ dɛ vɔrɔwe Soan waa lɔ Ijipt harɛ ta.

²³ Nɛra waa tom ba la aa tel Ɛskɔl Fɛlembɔjen ta la, ba teŋe ɡrepo kpale o nɔna aa warɛ o ta. Ba bini banɛ kpɔɔ saɡɛ daa ta, dɛ cheo vaama ta. Ba tɔɔ daa bɛl nɔna aa do ɡuleɡule baa yera pɔmeɡranet ne fiɡ nɔna ɡe dɛ ja.

²⁴ A ɡɛ waa nɔ taa a che ba pa bela sɔn Ɛskɔl Fɛlembɔjen, dɛkalkɛŋɔ belaa Israel tena la teŋe ɡrepo kpale o nɔna aa warɛ o ta.

²⁵ Tɔpera fifraanaarɛ ne tela la, dɛ ba sɔɔh dɛ ka nyiŋi harɛ la waa bwa tonɛ, asɛ dɛ berɛ ba.

²⁶ Toroma la berɔ ba Mosis ne Arɔn dɛ Israel tena la bwa be Kades waa lɔ Paran pua hɛŋle ɡbo harɛ la ta. Dɛ ba bol waa baa kaa na la Israel tena la bwa be, dɛ kpɔ harɛ la ta daa nɔna la baɡ ba.

²⁷ Ba ŋɔ Mosis be ŋɔ, “Ya laŋɔ ka nyiŋi harɛ haa tomɛ yaa o ta la. Kasinteŋ, o ɛ harɛ waa soma dɛ won kondikwaa ɛɛ kohona. Daa nɔna aa le o taa la.

²⁸ Kɛ nɛra baa lɔ bela te kpeɡri, ba bwɛɛre la kan, ba ma danjwɛjena bara. Hale ya na Anak tena naanar bela.

²⁹ Amalɛk tena soɡe Nɛɡɛv pua hɛŋle ɡbo harɛ, Hiti ne Jebus dɛ Amɔre tena so deŋɡarere harɛ ta, asɛ Keenan tena ɡe so bɛne Mɛdetereenea Mpo ne Jɔɔdan Moo nyoa.”

³⁰ Dɛ harɛ la waa beɡra baa chole nɛra baa cheme Mosis sie la nɛ, asɛ Kaleb waa ɛ nɛra baa tom ba la bini bɛl ŋɔ, “A chɛ kɛ yá ka puu ba yo, dɛ́ lɛ harɛ la. N jemɔ kɛŋɔ yaa wonoo lɛ.”

³¹ Anee nɛra o ne baa laŋa la ŋɔ, “Yaa won puu ba yo, ba kpeɡri ɡwaa yaa.”

³² Ate, ba kpɔ harɛ la waa dɛɛ ɡaaɡe ba bala Israel tena la bini, dɛ teŋe nyosone dɛɛ chɔɡ ba liire ŋɔ, “Harɛ la aa were dɛ́ won cha yaa kohona, nɛra yaa na ba bela ɡe bwa kpekpeɡo kɛrɛdɛ.

³³ Ya na nɛra baa kpekpeɡa kohona dɛ ɛ Anak tena naanar bela. Yaa na ba la, dɛ ya jeɡre kɛŋɔ hɔɔhre ken ba siwi ta.”