Nɛra Kura 12 - mzwDBL

Miriam ne Arɔn naɡra baa naɡre Mosis wa

¹ Awola bɛl, Miriam ne Arɔn pa mun dɛɛ naɡre Mosis waa kɛŋɔ waa mo haah le Kus harɛ ta baa bera dɛɛ yerɔ Itiopia la.

² Ba ŋɔ, “Mosis ɡbo nɛɛ Korowii che dɛ bol waa kɛɛ? O ta ya te nɛɛ cheɡɛ dɛ bol wa aa?” Asɛ Korowii no waa la.

³ Dɛ Mosis ɛ nomɛl waa pwɛra kɛrɛdɛ, dɛ ɡwaa nomɛlbwa harɛ nɔ ta.

⁴ Buɡ la ta, Korowii ŋɔ Mosis ne Arɔn dɛ Miriam be ŋɔ, “He nɛra batoro la bwa le ba n Dea Cheremibɔr bela.” Asɛ ba bwa le kaa.

⁵ Korowii cheɡɛ bam waa do jaŋne kaa nyundua ta, dɛ tu ba che o Dea Cheremibɔr la doonyoa bela, dɛ yerɛ Arɔn ne Miriam, asɛ ba le ba che sie.

⁶ O ŋɔ, “Hé no n waa nɔ, Dɛ n keame lɔ he bini naa, chaahna taa n che dɛ kpɔ n te dɛɛ baɡlo, dɛɛ bol waa o be deera ta.

⁷ Gɛ laa n ne n bonɔɔ Mosis waa do. O waa dɔ kasinteŋ, n kpɔ n nɛra bwa do o nɔn ta.

⁸ N ne o bol wa dɔŋa be, a bini chɔ kɛrɛdɛ, wobobeela laa. O dɛ na ɡɛ maa doa kɛrɛdɛ. Ɛrɛ waa haa wola ɔmɛ kɛŋɔ he bol n bonɔɔ Mosis waa nɔɔ?”

⁹ Korowii baah di ba nɛɛ kohona, dɛ kaa ɡel ba.

¹⁰ Bam la aa le Korowii Dea Cheremibɔr la ta la, bwadabii weechɔɡa ane den le Miriam nɛ, o bwara bwa to kɛŋɔ yabi ken. Asɛ Arɔn ke nyiŋi Miriam, dɛ na kɛŋɔ bwadabii weechɔɡa le o nɛ.

¹¹ Ate, Arɔn ŋɔ Mosis be ŋɔ, “N dɔɔ, bɛ wechɔɡa yaa ɡɛna dɛ ɛ nɔ ne daŋre, dɛ́ tɛr ya deŋne.

¹² Bɛ ɡel Miriam do kɛŋɔ bifol waa sewa mɔɔ o nya lolɔ, mɔɔ o bampera chɔɡ.”

¹³ Anee Mosis wi no Korowii ŋɔ, “N Naa Korowii, n dɛ soŋe, chaoh!”

¹⁴ Asɛ Korowii ŋɔ o be ŋɔ, “Dɛ Miriam mɛɛ fe ta nentane ta o sie ta naa, ba fe ta on kpɔe le he baah ta o ka so dahara tɔpera anuanɛ sihiih kpoo waa? Hé le Miriam ne dahara, dɛ́ ɡel o so bela tɔpera anuanɛ mɔɔ he berɛ ba o ne.”

¹⁵ Anomanta, ba le Miriam ne, dɛ ɡel o so dahara tɔpera anuanɛ mɔɔ dɛ berɛ ba o ne. Israel tena la ta ire le bela ka tel kɛŋɔ baa ba o ne mɔɔ.

¹⁶ Dɛ ba soɡe Haserɔt, asɛ dɛ ir le bela dɛ kaa Paran pua hɛŋle ɡbo harɛ ta bobɛl dɛ ka so.