Nɛra Kura 11 - mzwDBL

Nii aa le Korowii be

¹ A kaa ba kɛŋɔ Israel tena la dɛ naɡre ba wenaale wa, asɛ a chole Korowii deŋne ta. Waa noa la, bwaawee lawɔ, o ɡel nii le bela baa soɡa la, dɛ chɔɡ o baŋ bɛl.

² Belaa ba wi no Mosis, asɛ o soŋe Korowii nii la dime.

³ Anomanta, ba pa bela sɔn Tabera, dɛkalkɛŋɔ belaa Korowii ɡel nii le dɛ ba fuh.

Chayambwibwi Korowii aa kpɔa tɛ Israel tena

⁴ Dɛ nɛra bane baa wola Israel tena ɛɛ lɔ ba bini ba ne baa kaa, ba pɛla lawɛ kondikwaa tenten. Asɛ Israel tena la ɛɛ wi kohona ŋɔ, “Leperaa yaa ba ola dɔe dɛ́ chwe o?

⁵ Ya dɛ lii pɛŋa yaa dɔa pɛɛpɛɛ dɛɛ chwe Ijipt harɛ ta, ne kwaane baa dɛ yera kokumba ne kɛɛne, ne ɡaabu ne jende, dɛ kwaane baa dɛ yera ɡaalek.

⁶ Taraken komɛlbwa pɛla aa yaa dɔ, komɛlbwa toole yá di ka ja maana nɔ nɛ.”

⁷ Maana la do kɛŋɔ boyubi waa toa.

⁸ Israel tena yon valɛ dɛɛ tɔɔra, dɛ nama kɛɛ dɛ tuɡa. Ba dɛ daala, dɛ́ koo noo a ta dɛ́ hala. Maana la som kɛŋɔ baa kpɔ ɔleve noo ɛa ken.

⁹ Jwaana kɔɔla aa ta bela baa baŋre ba tɛnte deene la, dɛ maana la ɡe le nyundua ba lee.

¹⁰ Israel tena la ne ba haahna ne bii baa ir dɛ do ba tɛnte deene doonyoo dɛɛ wi, asɛ Mosis no. A ɡelɔ Korowii baah di taeh, dɛ kpɔ sibeɡra ta Mosis nɛ.

¹¹ Asɛ Mosis pɛɛ Korowii ŋɔ, “N Naa Korowii, bɔkwa waa he kpɔ ɡɛ wahala nɔ dawɛ men maa ɛ he bonɔɔ nɛɛ ken ɔ? Bɔkwaa n ɛ dɛ jo he nɛɛ, he kpɔ ɡɛ nɛra nɔ waa bwa dawɛ n nɛɛ ŋɔ mɛ́ɛ nyiŋi ba nɛɛ nɔɔ?

¹² Menee kpoŋe ɡɛ nɛra nɔ bwa teene dɛ lol ba kɛɛ? Ɛrɛɛ he ŋɔ ń nɔɡ ba kɛ haah ne bie, dɛ́ kpɔ ba kaa harɛ haa baɡɛ ba naawa nyoa dɛ ŋwɛɛ ja a ta la ta nɔɔ?

¹³ Leperaa mɛɛ ba ola dɔe dɛ́ tɛ nɛra nɔ bwa dɔŋa ba chwe o? Ba teŋɔ wi dɛɛ noo mɛ ŋɔ ń tɛɛ ba ola bá chwe.

¹⁴ N ɡbo aa won kpoŋe ɡɛ nɛra nɔ bwa, ba ɡwaa n nɛ.

¹⁵ Dɛ kenii hɛɛ ba men ɛɛ te naa, den kpo mɛ taraken. Dɛ n we-ɛɛla su he siwi te naa, bɛ ɡel n do le ásɛ a ɡɛ waa nɔ ba di mɛ.”

¹⁶ Ate, Korowii ŋɔ Mosis be ŋɔ, “Le Israel tena nomonome fifraanuanɛ baa wona dɛɛ ɛ toma la kɛrɛdɛ, dɛ́ kpɔ ba ba n Dea Cheremibɔr la doonyoa, he ne ba che bela.

¹⁷ Mɛɛ tuu ba, n ne he ba bol waa bela. Mɛɛ ɡeloo n Doma waa lɔ he Mosis nɛɛ dɛɛ tɛɛ kpeɡri la ba so ba nɛ, ásɛ ba ɡe lɛɛ waa aa ɡwaa he nɛɛ la ane, ásɛ a bɛ he ɡbo nɛɛ dawɛ.

¹⁸ Ŋɔ nɛra la be bá sɔ ba doŋa bwa ta, dɛ́ do ɡoroŋ Korowii be pera dɛɛ kpa kere. Hɛɛ dɔ olaa chwe. Korowii no he wii kɛŋɔ he fa aa lɔ Ijipt harɛ ta la dɛ a wer tɛ heya, he dɔ ola dɛɛ chwe taeh, kɛ taraken te haa dɔe dɛɛ chwe kpa. Korowii ŋɔ wɛɛ tɛ heyaa olaa hɛɛ chwe name.

¹⁹ Tɔpebeŋkpoŋ kɛɛ tɔpera anɛ kɛɛ tɔpera anue, kɛɛ tɔpera fi kɛɛ tɔpera fifraanɛ laa.

²⁰ Hɛɛ chwea korobibir bwaa a ba lawɛ heya, dɛ́ pe heya, dɛkalkɛŋɔ he vɛh Korowii, onee ja he nɛɛ he soɡa bini. Kɛ he wi o siwi ta ŋɔ, ‘Bɔkwaa ɡela ya le Ijipt harɛ te nɔ?’ ”

²¹ Belaa Mosis ŋɔ, “Nɛra n ne baa dɛ valɛ nɔ lɔ baala kaɡboŋa lafraanumɛl, ɡɛɛ he ŋɔ hɛɛ tɛɛ baa olaa korobibir bwa naa?

²² Dɛ ya kpoo ya peera ne nae, hale pɛŋa aa lɔ mpo bini bwa kwaraa naa, aa tel baa yaa?”

²³ Korowii chaŋe Mosis ŋɔ, “N kpeɡri aa won tel ɡɛ kɛɛ? Hɛɛ nao name kɛŋɔ waa maa bola la ɛ kpela kɛɛ a ɛ nyosone.”

²⁴ Ate, Mosis la waa la ne nɛra la be dɛ ka bol waa Korowii aa bola la bwa baɡ ba. O lawɛ nomonome waa lee ba la ba che bar Korowii Dea Cheremibɔr bela.

²⁵ Asɛ Korowii do bam la bini, o ne Mosis bol wa, dɛ ɡel o Doma waa soɡe Mosis nɛɛ dɛɛ tɛo kpeɡri la ba so nomonome la nɛ. Korowii Doma la aa baa so ba nɛɛ la, ba dɔ kpeɡri dɛ won bol Korowii wa. A habɔɔ la, ba ta wone bol Korowii waa la kpa.

²⁶ Dɛ nomonome la banɛ ta nomonome fifraanuanɛ la nɛɛ jae dɛ ba Korowii Dea Cheremibɔr bela dɛ te so ba tɛnte deene bini bela baa soɡa la. Banee Eldad ne Medad. Korowii Doma la kaa so ba ɡe nɛɛ kpeɡri ne bela baa lole la, asɛ ba bol Korowii wa.

²⁷ Asɛ bonɔɔ bɛl chwa le bela baa soɡa tɛnte deene la bini dɛ ka ŋɔ Mosis be ŋɔ, “Korowii Doma la baa so Eldad ne Medad nɛɛ kpeɡri ne dɛ ɡel baa bol Korowii wa.”

²⁸ Dɛ Nun bibaa Josua le o bonɔɔne saŋ bwa dɛ teŋɛ Mosis nɛɛ dɛɛ chao. O ŋɔ Mosis be ŋɔ, “N dɔɔ Mosis, ɡel bá ka kah ba, bá ɡel bola!”

²⁹ Anee Mosis ŋɔ, “He meerɔ dɛɛ tɛ mɛ kɛɛ? N te fe dɛ nyin kɛŋɔ Korowii ɡel o Doma ba so o nɛra bwa nɛ, ásɛ ba won dɛɛ bol o waa o kpeɡri ne.”

³⁰ Mosis ne Israel nomonome fifraanuanɛ la bwa berɔ ba bela baa baŋre ba tɛnte deene la.

³¹ Korowii ɡelɔ peu bɛl ta, dɛ kpɔ chayambwibwire le mpo nyoa, dɛ ba perɛ bela baa baŋre ba tɛnte deene la. A dawɛ dɔŋa nɛɛ kaa nyundua dɛ ɛ naɡale atoro, dɛ chɔ kaa bobɛlbwa kaa bojaŋ.

³² A wola tɔpere la ne o jwaana bwa, hale tɔɔ aa baa per bwa la, Israel tena la lɔɔ jo a ta dɛɛ paa. Bɛlbwa dɔ dɛ ɛ kuruwa dela fifraanue ne a habɔɔ, dɛ pa nyenɛ bar bela baa baŋre ba tɛnte deene la bwa.

³³ Ba taa lɔ ola la ta dɛɛ chwe aa wola tonɛ la, Korowii baah di ba nɛ, asɛ o kpɔ weechɔɡa ane ba ta ba nɛ.

³⁴ Gɛɛ a do ba pa bela sɔn Kebrɔt Hataava, dɛkalkɛŋɔ belaa ba bini banɔ la ba pɛla aa dɔ kondikwaa tenten la serewe, ba huɡ ba.

³⁵ Ba iro le Kebrɔt Hataava, dɛ valɛ kaa Haserɔt, dɛ ka baŋre ba tɛnte deene dɛ so bela.