Nɛra Kura 10 - mzwDBL

Suuɡapoŋa bɛle ane wa

¹ Korowii ŋɔ Mosis be ŋɔ,

² “Gel bá kpɔ suuɡapoŋa loɡɛ bɛle anɛ, dɛ́ kpɔ hoh dɛɛ yerɛ Israel tena ba chema bini, ne ba ira dɛ́ kaa bofale ta.

³ Dɛ ba hoh bɛle anɛ la bwa naa, nɛra la bwa chɛ kɛ bá cheme he sie n Dea Cheremibɔr la doonyoa bela.

⁴ Bɛla beŋkpoŋii ba hoh aa, dɛ Israel deene nomonomee chɛ kɛ bá ba cheme he sie.

⁵ Dɛ bɛla la baa si kɛŋɔ bá ir le bela dɛ́ kaalaa, deene la nɛra baa soɡe Korowii Tɛnte Dea wee leebɔr la chɛ kɛ bá ir dɛ́ tɔ sie.

⁶ O baa si nɛɛtena aa, nɛra baa soɡe Korowii Dea la weekaŋle harɛbɔr denaa ta la ɡe ir teŋɛ. Bɛle sii laanee dɛɛ baɡle ba ira dɛ́ kaa.

⁷ Dɛ nɛra la bwa yera dɛ cheme ɡee yaa, bɛle la sii korɛ.

⁸ Arɔn bibaala sɔfore la ɡboo chɛ kɛŋɔ baa hoh bɛle la. A ɛ Mmara dɛ chɔ le tɛ ba naanar baa ka ba bwa.

⁹ Dɛ ba kaa jo ba harɛ ta, asɛ ba dɔma ba puu ba dɛɛ yo aa, bá hoh bɛle la. Men Korowii baa dɛ tom mɛ la ɛɛ lii ba waa, dɛ́ lɛɛ ba le ba dɔma nɔn ta.

¹⁰ Ba sie baa lɛ ba benanyoa ne Korobifala Tɔpejena baa lea cheɡ dɛɛ dia ta naa, bá hoah bela baa kpɔ saraha kwaa baa dɛ fuah, ne deŋnesɔɔhna saraha dɛɛ ba la, ásɛ a chɔ le dɛɛ lii ba n wa. Menee Korowii baa dɛ tom mɛ la.”

Israel tena Sinai pua hɛŋle ɡbo harɛ ta ira dɛ́ kaa

¹¹ Israel tena aa le Ijipt harɛ ta bennɛɛte korobie anɛ, tɔpera fifraanɛ habɔɔ la, bam la le Korowii Tɛnte Dea la nyundua bela.

¹² Ate, Israel tena la le Sinai pua hɛŋle ɡbo harɛ la ta, ba ɡaaɡa dɛ so dɛɛ ir bwa bini la, bam la berɔ ka che Paran pua hɛŋle ɡbo harɛ ta.

¹³ Belaa ba pa mun ir, ɡɛ Korowii aa cheɡɛ Mosis nɛɛ dɛ do ba la.

¹⁴ Juda dea ne deene aa ja ba nɛɛ tɔ sie, ba ne ba fraŋkaa. Asɛ Aminadab bibaa Naasɔn ɛ ba sitɔɔ.

¹⁵ Suar bibaa Nɛtanɛl ɡe chɔ Isaaka dea tena nyoa.

¹⁶ Hɛlɔn bibaa Eliab ɡe chɔ Sebulon dea tena nyoa.

¹⁷ Asɛ ba foromi Korowii Tɛnte Dea la bwa dɛ kpɛrɛwo, asɛ Gɛsɔn ne Merari dea tena la chea dɛ teŋɛ.

¹⁸ Rubin dea tena ne deene aa ja ba nɛ ɡee ira teŋɛ, ba ne ba fraŋkaa. Asɛ Sɛdor bibaa Elisur ɛ ba sitɔɔ.

¹⁹ Surisadai bibaa Sɛlomeɛl ɡee chɔ Simeon dea tena nyoa.

²⁰ Asɛ Dewɛl bibaa Eliasaf chɔ Gad dea tena nyoa.

²¹ Kohat dea tena laanee cheɡɛ Korowii Tɛnte Dea la bini laala aa do ɡoroŋ dɛ ɡe teŋɛ. Gɛrsɔn ne Merari dea tena la dɛ baŋre Korowii Tɛnte Dea la mɔɔ Kohat naanar yon tel bela.

²² Efrem dea tena ne deene aa ja ba nɛɛ ɡe le dɛ kpoŋe ba fraŋkaa teŋɛ. Asɛ Amihud bibaa Elisama ɛ ba sitɔɔ.

²³ Pedasur bibaa Gamaleɛl ɡee chɔ Manasɛ dea tena nyoa.

²⁴ Asɛ Gedeɔne bibaa Abidan chɔ Bɛnjamen dea tena nyoa.

²⁵ Dan dea tena ne deene baa ja ba nɛɛ ɡe ka Israel tena la bwa mun ta, dɛ kpoŋe ba fraŋkaa. Banee yon ka mun ásɛ ba dɔma bɛ won dɔ bɔr dɛ́ le bobɛlbwa ba yoo ba. Asɛ Amisadai bibaa Ahiesa ɛ ba sitɔɔ.

²⁶ Okran bibaa Paɡiel ɡee chɔ Aasa dea tena nyoa.

²⁷ Asɛ Enan bibaa Ahiraa chɔ Naftale dea tena nyoa.

²⁸ Israel tena vala baa valɔ la, ɡɛɛ ba valɔ denaa ta.

²⁹ Dɛ Mosis helabaa sɔne Jetro dɛ ɛ Midian te. O bibaa sɔne Hobab. Awola bɛl, Mosis ŋɔ Hobab be ŋɔ, “Ya dɛ ba ira kaa harɛ Korowii aa ŋɔa wɛɛ kpɔɔ tɛ yaa la ta. O baɡɛ yaa nyoa ŋɔ bela ɛɛ do werii tɛ yaa. Yaa ka nyiŋi kɛrɛdɛɛ, anomanta, ɡel ya ne he kaa.”

³⁰ Anee Hobab chaŋe ŋɔ, “Akai, maa la. Mɛɛ berɔɔ kaa n harɛ ta n nɛra be.”

³¹ Ate Mosis ŋɔ, “N poori, bɛ kaa ɡel yaa. Henee jemɛ bɔra aa wera ya ka baŋre ya tɛnte deene, dɛ́ so pua hɛŋle ɡbo harɛ nɔ ta. Hɛɛ won nyin bodɛɛɡe tɛ yaa.

³² Dɛ hɛɛ sɛoh ya ne he kaa laa, kondɛɛɡa Korowii aa ka tɛ yaa la, yaa tɛɛ anee.”

³³ Anomanta, ba pa mun valɛ le Sinai Bwejen la ta, dɛ valɛ tɔpera atoro. Lewi dea tena cheɡɛ Korowii Ne Nɛwɛnyina Fɔo Daka la tɔ ba sie tɔpera atoro, dɛɛ ɡaaɡe bela waa dɔ tɛɛ ba bá so.

³⁴ Tɔɔ perɔ ba ir dɛɛ kaa bofale aa, bam la dɛ tɔ ba nɛɛ baa ɡaaɡe.

³⁵ Saŋ bɛlbwa baa kpɔ Korowii Ne Nɛwɛnyina Fɔo Daka la tɔ sie baa kaa la, Mosis yon ŋɔ, “N Naa Korowii, ir tɔ ya sie! Lɔ he dɔma bwa peɡre, ɡel ba bwa chwa le he sie!”

³⁶ Saŋ bɛlbwa baa ka choɡ Korowii Ne Nɛwɛnyina Fɔo Daka la, Mosis yon berɛ ŋɔ, “N Naa Korowii, berɛ ba ja he nɛra Israel tena kaɡboŋa baa wola won kur ba nɛ.”