Nehemia 8 - mzwDBL

Ɛsra kure Korowii Mmara baɡle nɛra la

¹ Korobinuanɛ te ta la, dɛ Israel tena bwa kaa so ba bwɛɛre ta. Asɛ o tɔpeloɡle ta ba bwa ba cheme Nee Doonyoa la sie Jerusalam kɛŋɔ nɛmbeŋkpoŋ bii. Asɛ ba ŋɔ sɔfo Ɛsra ne tɔnjereme la be ŋɔ, ó kpɔ Korowii Mmara Tɔn o fa aa cheɡɛ Mosis nɛɛ kpɔ tɛ Israel tena la ba.

² Anomanta, korobie la tɔpeloɡle ta, sɔfo Ɛsra kpɔ Mmara Tɔn la, dɛ ba che baala ne haahna, dɛ bechale baa kpeɡa dɛ won waa mun noe sie.

³ O kure tɔn la Nee Doonyoa la sie, nɛnlaa la sie, le chɔmbibi ka tel kɛŋɔ wee aa baa che nyufala, asɛ ba bwa cheɡ deŋne dɛɛ no waa aa lɔ Mmara Tɔn la bini kɛrɛdɛ.

⁴ Dɛ ba koh waa la waa dɛ kpɔ daa kwaa komɛl o kaa nyundua, asɛ Ɛsra ka che o ta. Asɛ Matitia ne Sema ne Anaya, ne Uria ne Hilkia dɛ Maaseya che o diɡ pera. Pɛdaya ne Mesael ne Malkija, ne Hasum ne Hasbadana ne Sekaria, dɛ Mɛsolam ɡe cheɡɛ o ɡal ta.

⁵ Ɛsra kaa che kon waa kaa nyundua la ta, ɡɛ aa ɛ ásɛ nomɛlbwa won dɛɛ nao. Waa pili tɔn la asɛ nomɛlbwa den ir che.

⁶ Anee Ɛsra ŋɔ, “Hé kpɛɛ Korowii waa ɛ Korowijen la.” Asɛ nɛra la bwa ir nɔɔra nyundua dɛ ŋɔ “Aamen, Aamen” Ba ɡuŋo, dɛ kpɔ sie pi harɛ dɛ tomɛ Korowii.

⁷ Ate, nɛra la ir che, asɛ Jesua ne Bani ne Sɛrebea, ne Jamin ne Akub ne Sabetai, ne Hodia ne Maaseya ne Kelita, ne Asaria ne Josabad ne Hanan, dɛ Pɛlaya, baa ɛ Lewi dea tena la baɡle Mmara la bini dɛɛ baɡ ba.

⁸ Ba kure Korowii Mmara Tɔn la, a bini chɔ chasee ken, asɛ nɛra la jemɛ dɛ no waa baa kura la mun kɛrɛdɛ.

⁹ Ate, Nehemia waa ɛ harɛ la ta nomoa, ne sɔfo Ɛsra waa ɛ tɔnjereme, dɛ Lewi dea tena baa baɡle waa la bini tɛ nɛra la ŋɔ, “Fini tɔpere do ɡoroŋ tɛ Korowii haa dɛ tomɔ, he bɛ wi.” Dɛkalkɛ nɛra la aa dɛ no waa la, dɛ ba dɛ wi.

¹⁰ Nehemia ŋɔ nɛra la be ŋɔ, “Hé kaa dem, dɛ́ ka di he silɛɛ kondikwa, dɛ́ nyɔ sensoma, ásɛ dɛ kpɔ ane ka tɛ banɔ la baa wola ane dɔe. Fini tɔpere nɔ do ɡoroŋ tɛ Korowii yaa dɛ tomɔ. He bɛ suna di, dɛkalkɛ silɛɛ Korowii aa tɛ heyaa la ɛɛ ɡeloo he dɔ bokpeɡa.”

¹¹ Asɛ Lewi dea tena larawe nɛra la bwara dɛ ŋɔ, “Hé hel jeiih ken, fini tɔpere nɔ do ɡoroŋ, he bɛ suna dɛɛ di.”

¹² Ate, nɛra la bwa la ka di kwaa la dɛ nyɔ sen silɛɛ kohona ne, dɛ kpɔ ane kɛ banɔ la baa wola dɔe, dɛkalkɛ ba no waa baa bola baɡ ba la mun kɛrɛdɛ.

Kukure Tɔpejen dii

¹³ Korobie anuanɛ tɔpenɛɛte ta la, nomonnyuune ne sɔfore, dɛ Lewi dea tena la kaa cheme Ɛsra waa ɛ tɔnjereme be, o baɡ ba Mmara waa la ja.

¹⁴ Ba nao kɛŋɔ Mmara Korowii aa cheɡɛ Mosis nɛɛ, dɛ kpɔ tɛ Israel tena la ŋɔ kukure lɔɡree chɛ kɛ Israel tena so, dɛ́ di Kukure Tɔpejen la korobinuanɛ ta,

¹⁵ dɛ ŋɔ, bá kpɔ Korowii waa la perɛ ba bwɛɛre ne Jerusalam bwa, dɛ ŋɔ, “Hé la deŋɡarere harɛ ta, dɛ́ ka teŋni dadɛɛɡa, ne ɔleve daa kpala, dɛ bambie ne daa bwa soo siwi kpala, ne a papooni, dɛ́ kpɔ ba ɛ kukure ɡɛ baa chwera do Mmara Tɔn bini la.”

¹⁶ Asɛ nɛra la ir ka nyin daa kpala la, dɛ ba ɛ kukure ba saldor, ne ba dembaahna ne Korowii Dea dembaahna, ne Nee Doonyoa sie bela nɛra aa dɛ cheme, dɛ Efrem Dea Doonyoa la sie.

¹⁷ Nɛra baa laɡ ba laa ta kaa bojaŋ harɛ ta la bwa berɔ ba, dɛ ba do kukure, dɛ so a bini, dɛ di Kukure Tɔpejen la. Dɛ le Nun bibaa Josua bere saŋ ba ɡɛ tɔpere la ta la, Israel tena ta Tɔpejen nɔ ken dii bwa. Ba sie lɛo kohona.

¹⁸ Sɔfo Ɛsra kure Korowii Mmara Tɔn la bini waa baɡle nɛra tɔpere bɛlbwa, le Tɔpejen la tɔpeloɡle ta ba kaa tɔpere waa ka mun ta. Ba di Kukure Tɔpejen la tɔpera anuanɛ, asɛ tɔpenuatoro wee la, ba cheme ɡɛ Mmara la aa baɡla la.