Nehemia 6 - mzwDBL

Nehemia waa vɔrɔwa dɛ́ kpoo

¹ Sanbalat ne Tobia ne Arab te Gɛsem, dɛ ya dɔma baa kaa aa noa kɛŋɔ n berɔ kwaa ma danjwɛɛ la tonɛ, bojeɡaa bɛlbwa ta kae, a lole kɛŋɔ dɛ n ta ɡbeni o doonyoone la ta doe mɔɔ la,

² Sanbalat ne Gɛsem kpɔ kala tɛ mɛ ŋɔ, “Gel ya ne he cheme Ono deŋɡarere dor harɛ waa chɔa kaa bwɛjeɡre la bɛl ta.” Dɛ n vɔrɔwaa baa vɔrɔwe dɛ́ che a ta ɛɛ mɛ waane,

³ anomanta, n tomɛ toroma ba be ŋɔ, “Toma maa dɛ ɛ la waa hiaoh kohona, maa won tu ba he be bela. Maa won ɡel toma la bil dɛ́ ba he be.”

⁴ Ba kal mɛ ɡɛ kala nɔ kera anaarɛ, asɛ n ɡe kpɔ a ɡɛ kala la tenten tɛɛ ba.

⁵ Ate, Sanbalat tomɛ o bonɔɔna la bini bɛl n be anɔ la aa teŋa nue, ɡɛ waa la tenten ne. Dɛ o kpoŋe tɔn la o nɔn ta, o ta o nyoa marɛ.

⁶ Gɛ o bini waa aa dɛ baɡle laanee nɔ. “Gɛsem ŋɔ men Sanbalat be ŋɔ, harɛre nɛra dɛ bol ŋɔ he ne Juu tena dɛ nyin he pere he te, a waa he berɛ kwaa dɛɛ ma danjwɛɛ la. Anɔ la aa jaa ɡee kɛŋɔ, he berɔ dɛɛ nyin he cheɡ he ɡbaɡba kora ta.

⁷ Hale he le Korowii keamere ŋɔ bá bol nɛra bwa no he waa Jerusalam kɛŋɔ, ‘Kooro bɛl lɔ Juda harɛ ta.’ N jemɔ kɛ ɡɛ waa nɔ ɛɛ tel Pɛɛsea koojen bee, anomanta, ba yá cheme dɛ́ kpɔ a liire.”

⁸ Anee n tomɛ ba ka ŋɔ o be ŋɔ, “Waa haa dɛ bol nɔ bɛlbwa ta kasinteŋ ɛɛ, he ɡbabir nyu bini liiree.”

⁹ Dɛ ba dɛ nyin ba aah yaa, ásɛ ya bwara yɔr ya ɡel toma la ɛɛ. Asɛ n soŋe Korowii ŋɔ, “N Naa Korowii, tɛ mɛ bokpeɡa!”

¹⁰ Awola bɛl, n la Delaya bibaa Sɛmaya dem. O nabaa sɔne Mɛhetabɛl. Maa laŋa la, dɛ o laa ɡbera tɔ o nɛ. O ŋɔ n be ŋɔ, “Gel n ne he ka sɔh Korowii Dea Boɡoroŋ Tenten bela, dɛ́ laa ɡbeni la tɔ ya nɛ, dɛkalkɛ ba dɛ nyini dɛ́ kpo. Baa bao jwaana saŋ nɔ bɔr, dɛ́ ba kpoe.”

¹¹ Anee n chaŋe ŋɔ, “N do ken dɛ́ chwa aa? Nɛn waa do kɛ men koh n nyu lɛɛ waa dɛ́ chwa ka sɔh Korowii Dea aa? Akai, maa la!”

¹² N nao kɛŋɔ Korowii laa tomɔ, kɛ yawaa Tobia ne Sanbalat yawɔ sen ŋɔ, ó ba bol ɡɛ waa la n be.

¹³ Ba kpɔɔ ŋɔ ó ba aah mɛ, ásɛ a che a ta n fee ɛ wechɔɡa, ásɛ ba dɔ n sɔnchɔɡe yerɛ dɛ́ chɔɡ mɛ.

¹⁴ Asɛ n soŋe Korowii ŋɔ, “N Naa Korowii, nyiŋi waa Tobia ne Sanbalat aa ɛa nɔ, dɛ́ tɛr ba deŋne a wa. Berɛ lii kɛŋɔ he keame bɛl waa ɛ haah baa yerɔ Noadia, dɛ keamere baa jaa ɡe jao dɛɛ aah mɛ ɡɛ.”

Toma la tona

¹⁵ Ba ma danjwɛɛ la tonɛ Elul korobie tɔpera fifraanɛ dɛ anue ta, dɛ kpɔ tɔpera fifraanue dɛ anɛ tonɛ toma la bwa.

¹⁶ Ya dɔma aa no waa nɔ la, harɛre nɛra baa soɡa bar yaa la ɔmɔ, ba liire bwa chɔɡ, dɛkalkɛ bɛlbwa nao kɛŋɔ, Korowii yaa dɛ tomɔ laanee cha yaa yá won tonɛ toma la bwa.

¹⁷ Gɛ saŋ la bwa, sitɔɔla baa lɔ Juda harɛ bwa chwerɛ tɔne kaa tɛ Tobia, asɛ o ɡe kwa ɛɛ la ba be,

¹⁸ dɛkalkɛ dɛ Juda harɛ ta tena ɡalɡa ja Tobia nɛ. Dɛ Ara bibaa Sɛkania helabaalee Tobia, asɛ Sɛkania bibaa Jehohanan mo Mɛsolam o mɛɛ aa ɛ Bɛrekea.

¹⁹ Nɛra yon baa bol Tobia wedɛɛɡa bwa waa ɛa n be, dɛ kaa bol anɔ la n ɡe aa bola o be. Asɛ o teŋɛ chwerɛ tɔne dɛ baa aah mɛ.