Nehemia 5 - mzwDBL

Nehemia nyaara chae

¹ Saŋ bɛl, Juu tena la ɡalɡa baala ne haahna bwa pa mun dɛɛ naɡre ba bala Juu tena la wa.

² Ba bini bane ŋɔ, “Ya ne ya bii warɔ, ya dɛ nyin kondikwaa dɛ́ di, dɛ́ won so.”

³ Bane ɡe ŋɔ, “Yá kpɔ ya kooni ne daa kooni, dɛ ya deremi cheɡ awɔba, dɛ́ kpɔ nyin kondikwaa cheɡ lɔr saŋ.”

⁴ Asɛ bane ɡe ŋɔ, “Yá kemɛ suuɡa, dɛ́ kpɔ bɔ toɔ kooro aa dɛ lɛ yaa ya kooni ne daa kooni ta.

⁵ Ya ne ya bala Juu tena bwa beŋkpoŋ. Gɛɛ ya bii ne ba ɡe bii ɛ kɛrɛdɛ, kɛ ya kpɔ ya bibaala ne bihaahna do ba lɔɡa kɛŋɔ yoma ken, ya bihaahna bane tɔ sie ɛ yoma. Taraken ya ta kpeɡri bɛlbwa dɔe kpa, dɛkalkɛ ya kooni ne daa kooni berɛ nɛra bane kwa.”

⁶ Men Nehemia aa no waa baa dɛ naɡre a waa la, n baah diu kɛrɛdɛ.

⁷ N lii a waa n nyu bini taeh, asɛ n kah sitɔɔla ne nomonome la ŋɔ, “He kemɛ he bala Juu tena suuɡa dɛɛ lɛ a ne!” Anomanta, n yerɛ nɛra la bwa cheme, dɛ nyiŋi waa la bini,

⁸ dɛ ŋɔ ba be ŋɔ, “Ya lɛ ya bala Juu tena baa yoɡ ba te tɛ nɛra baa wola Juu tena ɛɛ. Taraken he ɡe berɔ ɛɡre he ɡbaɡba nɛra ba yoɡ ba te dɛɛ tɛ yaa!” Ate, nomonome la hel, dɛkalkɛ ba ta wobɛlbwa dɔe dɛ́ bol.

⁹ N berɔ ŋɔ ba be ŋɔ, “Gɛ haa dɛ ɛ nɔ aa were. A chɛ kɛŋɔ hé ɔmɛ Korowii dɛ́ ɛ wa aa toɡra. Ásɛ dɛ bɛ nɛra baa wola Juu tena ɛɛ dɛ ɛ ya dɔma la ŋwɛnɛ tɛ, bá ba mamɛ yaa.

¹⁰ N ne n bala ne n nɛra baa dɛ ɛ toma nɔ ɡba dɛ kem ba suuɡa ne kondikwa. Hé ɡel ya kpɔ kema yaa dɛ kem ba kwaa dɛɛ lɛ a nee la kɛ ba.

¹¹ Hé kpɔ ba kooni ne daa kooni, ne ɔleve kooni ne deremi, ne suuɡa haa dɛ lɛ a nee bɔre lafa, ne mea ne senfala, dɛ noo la kɛ ba buɡ nɔ ta.”

¹² Ate, nomonome la chaŋe ŋɔ, “Yaa berɛ ba kwaa tɛɛ ba, ɡɛ haa bola la, yaa komɛlbwaa lɛ le ba be kpa.” Asɛ n yerɛ sɔfore la cheme, dɛ ɡel sitɔɔla ne nomonome la ŋwɛɛ ntam ba sie kɛŋɔ, baa teŋɛ nyoa baa baɡa la taa.

¹³ N ɡe laa yal waa vɔwɛ n chara la kpɔ dɛ jwiiru, dɛ ŋɔ, “Kenii Korowii ɛɛ ba nomɛlbwa waa wola o nyobaɡa ta teŋɛ jwiira ta le o dem, ne komɛlbwa waa dɔa ta, ásɛ o nya so.” Asɛ nomɛlbwa waa lɔ bela ŋɔ, “Aamen!” dɛ kpɛɛ Korowii. Asɛ nomonome la ɛ ɡɛ baa baɡɛ nyoa la.

¹⁴ Koojen Atasɛksɛs di kora bene fifraatoro dɛ anɛ. Waa di kora bene fifraanɛ ta la, o le men Nehemia mɛɛ nyiŋi Juda harɛ ta bene fi dɛ anɛ. Gɛ saŋ la bwa la, ba ta men kɛɛ n lolanar kondikwaa aa chɛ nomoa waa dɛ nyiŋi harɛ la ta tɛɛ n di.

¹⁵ Nomonome baa tɔ n sie nyiŋi Juda harɛ ta mɔɔ la ɛɡre Juda harɛ ta nɛra dɛ lɛ suuɡapoŋa fifraanaarɛ, dɛ kondikwaa ne sen. Hale ba bonɔɔna ɡba fiiɡi nɛra la. Kɛ n te, ɔma maa dɛ ɔmɛ Korowii nomanta, n ta ɡɛ ɛɛ.

¹⁶ N kpɔ n liire bwa do Jerusalam danjwɛɛ la kwaara dɛ ma toma ta. Nɛra baa ja n nɛɛ la bwa chemo, toma la ɛɛ ta, ya ta harɛ bɛlbwa nyine tɛ ya te.

¹⁷ Waa aa jaa ɡee kɛŋɔ, dɛ Juu tena ne ba nomonome lafa fifraanue dɛ di kwaa n be, harɛre nɛra baa bar yaa cheme te ta jae.

¹⁸ Tɔpere bɛlbwaa n ɡel baa kpo nabal ne pedɛɛɡa anumɛl dɛ jala, asɛ tɔpera fi bɛlbwa ɡe, n ɡel baa tɛ sene bwa soo siwi kohona. Anɔ bɛlbwa la, n ta kondikwaa aa chɛ kɛ bá kpɔ tɛ nomoa waa dɛ nyiŋi harɛ ta waa pɛɛrɛ, dɛkalkɛ dɛ a ɡwaa nɛra la nɛ.

¹⁹ N Naa Korowii maa dɛ tomɛ, lii n wa, dɛ́ ɛɛ mɛ kɛrɛdɛ, waa bwa maa ɛa tɛ nɛra nɔ wa.