Nehemia 4 - mzwDBL

Nehemia di bole o dɔma nɛ o toma ɛɛ ta

¹ Sanbalat aa noa kɛŋɔ ya Juu tena berɔ kwaa dɛɛ ma Jerusalam danjwɛjen la, bwaawee lawɔ o baah di taeh, wɛɛ mamɛ yaa.

² O cheɡɛ o bala ne Samaria laa tena sie dɛ ŋɔ, “Bɔkwaa Juu tena baa wola wobɛlbwa jemɛ nɔ ɛɛ ɛ nɔɔ? Baa won berɛ kwaa ma ba danjwɛɛ nɔ cheɡ aa? Baa won ɛ sarahare aa? Baa won ɛ sarahare ásɛ dɛ won tonɔ tɔpebeŋkpoŋ ɡbo aa? Baa won berɛ dɔ bwea le anɔ la baa fuah a daŋɛ chɔ nɔ ta naa?”

³ Dɛ Tobia waa ɛ Amɔn te cheɡɛ nomoa la jwɛh. O ŋɔ, “Danjwɛɛ baa dɛ ma nɔ, hale dɛ kɔkɔbo kwaraa teehno waa, wɛɛ taɡɔ ɡo.”

⁴ Ate, men Nehemia soŋe Korowii ŋɔ, “N Naa Korowii, na ɡɛ baa dɛ chɛɡre yaa, ɡel chɛɡa baa dɛ chɛɡre yaa nɔ ɡure ba nyu ta. Gel ba paŋɛ komɛlbwa baa dɔa, ásɛ ba laɡ ba laa ta kaa bojaŋ harɛfale ta.

⁵ Bɛ ba bolchɔɡe dii ta tɔ, bɛ ba wechɔɡa soh, dɛkalkɛ ba chɛɡre ya nɛra yaa bera kwaa dɛɛ ma danjwɛɛ la.”

⁶ Anomanta, ya teŋɔ kwaa ma danjwɛɛ la ka tel bela waa kpeɡ ka tel la baah ta tonɛ, dɛkalkɛ nɛra la ɛ toma la sibeɡra ne.

⁷ Ate, Sanbalat ne Tobia ne Arab ne Amɔn, dɛ Asdɔd tena aa noa kɛŋɔ Jerusalam danjwɛɛ baa bera kwaa dɛɛ ma la chemo dɛɛ nyin tona la, ba baah diu kɛrɛdɛ.

⁸ Asɛ ba bwa pɛ, dɛ vɔrɔwe kɛŋɔ, bá ba yo Jerusalam, dɛ́ kpɔ sibeɡra ba ta nɛra baa lɔ bela nɛ.

⁹ Anee ya soŋe Korowii yaa dɛ tomɔ, dɛ ɡel nɛra ɛɛ daah toma la webaŋa ne jwaana, dɛ́ tɔ ba ŋwɛnɛ.

¹⁰ A bwa habɔɔ, dɛ Juda tena dɛ ɡo yel bɛl wáa do ba ɡbemba toma la ta ŋɔ, “Tom-ɛɛra la dɛ ɡwɛɡre, berekese aa kuuɡa warɔ, yaa wola won kpɔ dɛ́ berɛ kwaa ma danjwɛɛ la.”

¹¹ Ya dɔma la berɔ ŋɔ, “Ba ne ŋɔ ba jemɛ kɛɛ dɛ na yaa la, dɛ ya jo ba bini dɛ́ kpoo ba, ásɛ toma la den ka dɛ́ ba a jaɡa.”

¹² Ate, Juu tena baa soɡa bɛne ya dɔma la ba ŋɔ ya be kera fi ne a habɔɔ bwa ŋɔ, “Bobɛlbwa haa kpɔ bwa, baa yo yaa.”

¹³ Anomanta, men Nehemia, n kpɔ nɛra la bane so danjwɛɛ la habɔɔ bela waa wola nyundua kaalɛ. N kpɔ ba so denaa ta, ba kpoŋe ba keri ne lampeare ne tori dɛ hɛma.

¹⁴ N iro dɛ ka na kɛŋɔ a ɛ waa tɛ nɛra la, anomanta, n ŋɔ ba ne ba sitɔɔla ne ba nomonome, ne banɔ la baa jaa la bwa be ŋɔ, “He bɛ ban ɔmɛ, hé lii ɡɛ Korowii aa do kan dɛ do ɔma kohona, ásɛ dɛ yo tɛ he bwɛɛ tena, ne he bibaala ne bihaahna, ne he haahna dɛ he deremi.”

¹⁵ Ya dɔma noɔ kɛŋɔ ya jemɛ vɔrɔwa baa vɔrɔwa la, dɛ berɛ na kɛŋɔ Korowii chɔɡ ba wa. Ate, ya bwa berɛ ba danjwɛɛ toma la ta, bɛlbwa baa ɛ o toma.

¹⁶ Le awola tɔpere dɛɛ kaa la, baala la pera ka dɛ ɛ danjwɛɛ la toma, asɛ bane ɡe kpoŋe lampeare, ne kwaa baa kpɔa dɛɛ tɔ ɡbemɡbe laa ta, ne tori ne hɛma, dɛ dɔmkwaa bwa soo siwi. Asɛ ya nomonome ba che ya Juda tena

¹⁷ yaa dɛ ma danjwɛɛ la habɔɔ. Banɔ la baa dɛ che danjwɛɛ la laala la, ba bwa ɛ beŋkpoŋ dɛɛ ɛ toma, bɛlbwa kpoŋe dɔmkon nɔn beŋkpoŋ ɡe ta.

¹⁸ Mamaala la bɛlbwa kpɔ kere sɛɡle o kɛɡre ta dɛɛ ɛ toma. Kɛ nɛn waa dɛ hoh laa bɛla la te soɡe n jwɛh.

¹⁹ Asɛ n ŋɔ nomonome ne sitɔɔla, dɛ nɛra baa kaa la be ŋɔ, “Toma la kan dɛ paɡri kaa, asɛ bɛlbwa ɡe ta o dɔŋ bɛnɛ danjwɛɛ nɔ mun.

²⁰ Dɛ hé ba dɛ no laa bɛla nɔ sii aa, hé bwa chwa ba ya jwɛh. Korowii yaa dɛ tomɔ la ɛɛ yoo tɛ yaa.”

²¹ Anomanta, tɔpere bɛlbwaa ya bini bane ɛɛ ɛ toma, asɛ bane ɡe kpoŋe lampeare, dɛ che dɛɛ daah yaa. Ya dɛ ɛ toma le chɔmbibi ka tel kɛ bɔr aa jo, weweela le.

²² A ɡɛ saŋ la, n ŋɔ nɛra la be ŋɔ, “Nómɛlbwa ne nɛn waa dɛ chao ɛɛ baa so Jerusalam jwaanaa, dɛ́ won dɛɛ daah bwɛjen nɔ jwaana, dɛ́ bwa berɛ dɛɛ ɛ toma webaŋa ɡe.

²³ N ne n bala ne nɛra baa dɛ ɛ toma dɛ banɔ la baa dɛ daah dɛ ja n nɛɛ la, bɛlbwa ta o laala waa doa la foore bil. Bɛlbwa dɛ kpoŋe o dɔmkon hale o dɛ nyɔ ne.”