Nehemia 3 - mzwDBL

Jerusalam danjwɛɛ kwaara dɛ́ ma

¹ Nɛra baa kwaara ma danjwɛɛ waa bar Jerusalam laanee Sɔfonomoa Eliasib ne o bala. Ba kwaarɔ ma Peera Doonyoa dɛ do o ɡbeni, dɛ ma danjwɛɛ kaa Lafa Dejaŋ ne Hananɛl Dejaŋ ta, dɛ kpɔ do Korowii nɔn ta.

² Asɛ Jeriko baala ɡe kwaa ma choŋi, Imri bibaa Sakur ɡe ne o nɛra ma onɔ la waa teŋa choŋi.

³ Hasena bibaala ɡe berɛ kwaa ma Pɛŋa Doonyoa, dɛ kpɔ doli dawɛ o ta, dɛ do ɡbeni ne bune baa kpɔ dɛɛ kara.

⁴ Uria bibaa Mɛremɔt o nabaa aa ɛ Hakɔs ne o nɛra ɡe ma choŋi. Bɛrekea bibaa Mɛsolam o nabaa aa ɛ Mɛsesabɛl ne o baala ma choŋi. Asɛ Baana bibaa Sadɔk ne o baala ɡe ma choŋi.

⁵ Tekoa baala kwaarɔ ma bampera, kɛ bwɛɛ la sitɔɔla ta ba te kpɔe ja nɛra baa dɛ nyiŋi toma la ta nɛ.

⁶ Pasea bibaa Joiada ne Besodiya bibaa Mɛsolam ɡe berɛ kwaa ma Jesana Doonyoa. Ba kpɔ doli ne ɡbeni do o ta, dɛ kpɔ bune baa kpɔ dɛɛ karɛ ɡbera la do o ta.

⁷ Asɛ Melatia waa le Gebeɔn ne Jadɔn waa le Mɛrɔnɔt, ne Gebeɔn dɛ Mispa baala ɡe ma choŋi ka tel harɛ nomoa waa lɔ Yufretis Moo wee cholibɔr dem.

⁸ Haahaya bibaa Usiel waa dɔ suuɡaswɛm kpɔe dɛ ɛ kwaa wejema ɡe ma choŋi. Asɛ Hanania, waa jemɛ nosɔɔhsoma ɛɛ ma choŋi ka tel danjwɛɛ la bobɛl baa dɛ yerɔ Danjwɛpaɡ la ta.

⁹ Hur bibaa Refaya o fa aa ɛ nomoa dɛɛ nyiŋi Jerusalam bampera ɡe kwaarɔ ma choŋi.

¹⁰ Asɛ Harumaf bibaa Jedaya kwaa ma choŋi, dɛ bela bɛne o dem. Asɛ Hasabeneeya bibaa Hatus ɡe kwaa ma choŋi.

¹¹ Asɛ Harim bibaa Malkija dɛ Pahat Moab bibaa Hasub ɡe kwaa ma bampera bobɛl ne dejaŋ bɛl baa dɛ yerɔ Fononoo Dejaŋ la.

¹² Halɔhɛs bibaa Salum, o ɡe fa aa ɛ Jerusalam bampera nomoa kwaa ma choŋi. O bihaahna chao.

¹³ Hanun ne nɛra baa soɡe bwɛjen Sanoa ɡe berɛ kwaa vɔrɔwe Fɛlembɔjen Doonyoa. Ba do ɡbera ne bune o ta, dɛ bune baa kpɔ dɛɛ karɔ. Ba berɔ kwaa ma danjwɛɛ la dɛ ka tel Puldoa Doonyoa la ta. O jaŋne lɔ naɡale kaɡboŋ lafraanue.

¹⁴ Puldoa Doonyoa la, Rekab bibaa Malkija o fa aa ɛ Bɛt Hakerem harɛ nomoa la ɡee kwaara mao. O do ɡbera o nyoa, dɛ do bune o ta ba kpɔ dɛɛ karɔ.

¹⁵ Kol Hose bibaa Salum o fa aa ɛ Mispa harɛ nomoa laanee kwaara ma Nee Nyu Doonyoa. O tɔɔ dɛ do ɡbeni o nyoa, dɛ do bune baa kpɔ dɛɛ kara. Onee bera kwaa ma danjwɛɛ waa bar Siloam tam, waa bɛne Kooro bodɛɛɡe waa du daa jwɛh. O mao ka tel kwaa baa kpɔ a ta tu dɛɛ le Kooro Devid Bwɛjen la ta.

¹⁶ Asɛ Asbuk bibaa Nehemia, o fa aa ɛ Bɛt Sor harɛ nomoa ɡe kwaa ma choŋi ka tel bobɛl o ne bela baa huɡe Kooro Devid sie aa chaɡɛ dɔŋa, ne tam bɛl baa kwiu, dɛ bobɛl baa dɛ yerɔ Banyoola Dea.

¹⁷ Lewi dea tena baa teŋa nɔ ɡee kwaara ma danjwɛɛ la baŋ bɛla ane choŋi. Banee, Bani bibaa Rehum waa ɛ ba sitɔɔ, ne Hasabia o fa aa ɛ Keila harɛ nomoa, o ɡee aa maa choŋi tɛ o harɛ tena.

¹⁸ Ba ɡe nɛɛ Henadad bibaa Bavae o ɡe fa aa ɛ Keila harɛ nomoa ne o nɛra teŋɛ dɛ berɛ kwaa ma choŋi.

¹⁹ Asɛ Jesua bibaa Esa o fa aa ɛ nomoa Mispa ɡe berɛ kwaa ma choŋi dea baa dɛ cheɡ dɔmkwa o ta la sie, ka jaɡɛ dea la loŋkora waa ɡoŋa ta.

²⁰ Sabai bibaa Baruk ɡe kpɔ sibeɡra kwaa ma choŋi o ta, ka tel sɔfo Eliasib dem doonyoa.

²¹ Uria bibaa Mɛremɔt, o nabaa sɔne Hakɔs, on ɡe kwaara ma choŋi sɔfo Eliasib dem doonyoa bampera kaa o jaɡa.

²² Sɔfore baa teŋa nɔɔ bera kwaa ma danjwɛɛ la bamperi ɡalɡa. Banɔ la baa soɡa bar Jerusalam laanee bera kwaa maa.

²³ Bɛnjamen ne Hasub kwaarɔ ma choŋi. Bela lɔ ba dem sideŋ. Asɛ Maaseya bibaa Asaria, baa yerɛ o nabaa Anania ɡe berɛ kwaa ma choŋi. Bela lɔ o dem jwɛh.

²⁴ Henadad bibaa Binui ɡe berɔ kwaa ma choŋi le Asaria dem ka jaɡɛ danjwɛɛ la loŋkora bobɛl.

²⁵ Asɛ Usai bibaa Palal kwaa ma choŋi le danjwɛɛ la loŋkora bela dɛ kaa dejaŋ waa lɔ koodem la nyundua. O bɛne dembaah bela nɛra aa dɛ daah la. Asɛ Parɔs bibaa Pɛdaya ɡe kwaa ma choŋi.

²⁶ Bonɔɔna baa dɛ ɛ toma Korowii Dea dɛ so Ofel deŋɡare ta ɡe kwaa ma choŋi ka tel bobɛl o ne Nee Doonyoa sie aa chaɡɛ dɔŋa, dɛɛ kaa wee leebɔr ne dejaŋ waa tɔ Korowii Dea la ta.

²⁷ Asɛ Tekoa baala ɡe kwaa ma choŋi le dejaŋ waa tɔ Korowii Dea la bɔr, dɛ ka tel Ofel danjwɛɛ ta.

²⁸ Sɔfore bane pɛo, dɛ kwaa ma choŋi Jaɡre Doonyoa, weekaŋle nyunduabɔr. Bɛlbwa mao chɔŋɛ o dem sie.

²⁹ Asɛ Ima bibaa Sadɔk berɛ kwaa ma choŋi o dem sie. Sɛkania bibaa Sɛmaya ɡe berɛ kwaa ma choŋi, dɛ onee dɛɛ daah Wee Leebɔr Doonyoa.

³⁰ Sɛlɛmia bibaa Hanania, ne Salaf binumɛlte Hanun ɡe berɔ kwaa ma choŋi, asɛ Bɛrekea bibaa Mɛsolam kwaa ma choŋi o dem sideŋ.

³¹ Asɛ Malkija waa dɔ suuɡaswɛm kpɔe dɛ ɛ kwaa wejema, kwaa ma choŋi ka tel bobɛl waa ɛ bonɔɔna baa dɛ ɛ toma Korowii Dea ne bonadiire dem. O ne Kwaa Nyoa Boara Doonyoa sie chaɡɛ dɔŋa, dɛ teŋɛ kaa danjwɛɛ waa lɔ weekaŋle nyundua, o wee leebɔr loŋkora bɔr.

³² Nɛra baa dɔ suuɡaswɛm kpɔe dɛ ɛ kwaa wejema ne bonadiire la kwaarɔ ma danjwɛɛ waa kaa la choŋi, dɛ le dea waa lɔ loŋkora dɛ kaa Peera Doonyoa la ta.