Nehemia 2 - mzwDBL

Nehemia Jerusalam kaala

¹ Koojen Atasɛksɛs aa di kora bene fifraanɛ, korobie Nisan ta la, ba ba sen ne ba tɛo. Asɛ n lɛ dɛ kpɔ ka tɛo. Dɛ o ta men nae n waa do sum o be bwa.

² Anomanta, koojen la bɔɔ mɛ ŋɔ, “He bwara aa hen we, aah bɔkwa waa ɡela he waa do sum he tea bini chɔɡ ken?” Ate, dɛ n dɛ ɔmɛ kɛrɛdɛ.

³ Anee n chaŋe ŋɔ, “N naa kooro, Kórowii tɛɛ mkpajaŋ! Bɔkwaa dɛ́ ɡel n waa aa wola sumii doɔ? Bwɛjen baa huɡe n naawa o bini paɡrɔ dɛ berɛ dimɡbia, o doonyojen ɡbeni ɡe bwa fuh.”

⁴ Ate, Koojen Atasɛksɛs ŋɔ n be ŋɔ, “Bɔkwaa hɛɛ nyin kɛ n ɛ́ tɛɛ nɔ?” Asɛ n soŋe Korowii Waa Dɛ Di Kora Nyundua,

⁵ dɛ chaŋo ŋɔ, “N naa kooro, dɛ he tea too men maa ɛ he bonɔɔ nɛɛ he no n wesoŋa nɔ naa, ɡel ń kaa Juda harɛ ta, bwɛjen Jerusalam baa huɡe n naawa la ta, dɛ́ ka kwaa vɔrɔwo.”

⁶ Anee koojen la ne o haah waa soɡe o jwɛɛh bɔɔ mɛ ŋɔ, “Tɔpera aŋwɛnɛɛ hɛɛ ba kpɔe dɛ́ tel bela, dɛ́ berɛ ba nɔ?” Dɛ koojen la tea toorɔ kɛŋɔ ó ɡel n kaa, anomanta, n doo tɔpere.

⁷ Asɛ n berɛ ŋɔ Koojen Atasɛksɛs be ŋɔ, “Dɛ a too he tea aa, cha mɛ dɛ́ chwerɛ tɔne tɛ mɛ ń kpɔ ka tɛ nomonome baa dɛ nyiŋi Yufretis Moo wee cholibɔr baŋ harɛre ta la, ásɛ ba nyiŋi n nɛ, dɛ́ tɛ mɛ ŋwɛnɛ ń won kaa Juda harɛ ta sɔnɔnɔɔ.”

⁸ N berɔ soŋo ŋɔ ó chwerɛ tɔn tɛ mɛ ń kpɔ ka tɛ Asaf waa dɛ nyiŋi koojen kɔne ta la, ásɛ o tɛ mɛ doli maa kpɔ ɛ dekpeɡ la doonyoo aa bɛne Korowii Dea, ne danjwɛkpeɡ waa bar bwɛjen la, dɛ dem maa ka so o ta. Korowii ja n nɛɛ nomanta, koojen la tɛ mɛ komɛlbwa maa soŋo.

⁹ Koojen Atasɛksɛs kpɔ laa nomonome ne banɔ la baa soɡe jaɡre ta ba ja n nɛ, asɛ n la Yufretis Moo wee cholibɔr harɛ ta, dɛ ka kpɔ tɔne waa chwera tɛ nomonome baa dɛ nyiŋi bela harɛre ta la ka tɛɛ ba.

¹⁰ Asɛ Sanbalat waa le Bɛt Hɔrɔn, ne Tobia waa ɛ Amɔn nomonome la bini bɛl noɔ kɛŋɔ nomɛl koh Israel tena kɛrɛdɛ doe wa dɛ ba, asɛ a we ba nɛ.

Nehemia kaa nyiŋi Jerusalam danjwɛɛre

¹¹ Belaa men Nehemia la Jerusalam, maa di bela tɔpera atoro habɔɔ la,

¹² baala tama banee ja n nɛ, n ne ba ir jwaana. N ta waa Korowii aa kpɔa do n liire bini ŋɔ ń ɛ Jerusalam la bolɛ baɡle nomɛlbwa, keeɡo maa soɡe o ta ɡboo, ane ta jae kpa.

¹³ Asɛ n kpɔ Fɛlembɔjen Doonyoa ta awola jwaana, dɛ kpɔ bobɛl baa dɛ yerɔ Kalampoŋa Kɔlɔŋ ne Puldoa Doonyoa dɛɛ nyiŋi Jerusalam danjwɛjena baa kuuɡa, ne ɡɛ baa fuh o doonyoone bwa la.

¹⁴ Ate, n berɛ kpɔ sie chaɡɛ Nee Nyu Doonyoa ne Kooro Tam ta, kɛ dɛ bɔr toole keeɡo maa soɡe o ta la dɔ bɔr kpɔ,

¹⁵ anomanta, n kpɔ Kedrɔn Fɛlembɔjen la bini jwaana la ne, dɛ ha sie dɛɛ nyiŋi danjwɛɛ la. Asɛ n berɛ habɔɔ dɛ berɛ ka kpɔ Fɛlembɔjen Doonyoa la ta dɛ jo bwɛjen la ta.

¹⁶ Nomonome baa lɔ bwɛjen la ta, ta bela maa laŋa kɛɛ waa maa dɛ ɛ jemɛ. Dɛ n ta wobɛlbwa n bala Juu tena, ne sɔfore ne nomonjena ne nomonome, dɛ nomɛlbwa waa dɛ ba jae dɛ́ ɛ toma la be bolɛ.

¹⁷ Ate, n ŋɔ ba be ŋɔ, “Hé na waa yaa lɔ a ta! Jerusalam berɛ dimɡbia, ba fuh o doonyojen ɡbeni. Hé ɡel ya kwaa ma danjwɛɛ o fa aa baro la, ásɛ sihiih bɛ yaa kpo kpa.”

¹⁸ N berɔ ŋɔ ba be ɡɛ Korowii maa dɛ tomɔ aa sune n nɛɛ dɛ kpɔ nɔn tɔ n nɛ, ne koojen la waa waa bol n be la. Anee ba chaŋe ŋɔ, “Hé ɡel ya pa mun kwaa dɛɛ ma.” Anomanta, ba kpɔ ba te dɛ́ ɛ ɡɛ tondɛɛɡa nɔ.

¹⁹ Asɛ Sanbalat waa ɛ Hɔrɔn te, ne Tobia waa ɛ Amɔn tena nomonome la bini bɛl, dɛ Gɛsem o ɡe aa ɛ Arab te noɔ, asɛ ba mamɛ dɛɛ muɡli ya baah ŋɔ, “Bɔkwa waa hɛɛ ɛ nɔɔ? Koojenii hɛɛ ba deŋnekpeɡ ɛɛ la.”

²⁰ Asɛ n chaŋ ba ŋɔ, “Korowii Waa Dɛ Di Kora Nyundua ɛɛ ɡeloo wobɛlbwa kaa kɛrɛdɛ tɛ yaa. Yan yaa ɛ o bonɔɔnaa ɛɛ pa munii dɛɛ ma. Kɛ he te nɔn toole Jerusalam komɛlbwa ta. He toole o saŋ la waa ɡe ta.”