Nehemia 13 - mzwDBL

Hɔɔhra pera dɛ́ le Israel tena bini

¹ Awola tɔpere la, ba kure Mosis Mmara Tɔn la a le baŋ nomɛlbwa no. Ba kure o bobɛl waa dɛ baɡle kɛŋɔ, Amɔn te kɛɛ Moab te bɛ nɛra baa dɛ tomɛ Korowii nɛɛ ja,

² dɛkalkɛ ba ta Israel tena kondikwaa ne nee tɛɛ, ɡɛ saŋ baa le Ijipt harɛ ta dɛɛ kaa la. Ba kaa kpɔ Balam ŋɔ, ó ba taah Israel tena, kɛ Korowii ɡelɔ taahna la berɛ hɛɛra.

³ Israel tena la aa no ɡɛ Mmara nɔ la, ba le nɛŋhɔɔhra baa koo ba bini la bwa ne harɛ la ta.

⁴ Gɛ waa nɔ aa wola balɛ mɔɔ la, dɛ sɔfo Eliasib dɛ nyiŋi deene baa dɛ cheɡ laala a bini Korowii Dea. Dɛ o ne Tobia som.

⁵ Asɛ Eliasib kpɔ dejen ba fa aa dɛ cheɡ mea baa kpɔa ba ɛ saraha ne daawiile, ne laala bwa soo siwi aa lɔ Korowii Dea, ne mea baa bɔne a bini bɔre fi bini bɔrbeŋkpoŋa, ne senfala dɛ ɔleve noo aa chɛ kɛ ba kpɔ tɛ Lewi dea tena, ne Korowii Dea yelɡoola dɛ nɛra baa dɛ nyiŋi doonyoo ta, dɛ anɔ la baa kpɔ tɛ sɔfore bwa, do Tobia nɔn ta.

⁶ Gɛ waa nɔ bwa aa dɛ ɛ la, dɛ men Nehemia toole Jerusalam, dɛkalkɛ Babelɔn Koojen Atasɛksɛs aa di kora bene fifraatoro dɛ anɛ taa n berɛ kaa o be. A habɔɔ n soŋo ŋwɛnɛ,

⁷ dɛ berɛ ba Jerusalam. Maa bala la, n nao kɛŋɔ Eliasib ɛ wechɔɡa kɛ waa kpɔ dea tɛ Tobia, o do o bini Korowii Dea la.

⁸ A ɛɛ mɛ bwaawee kohona taeh, asɛ n pa Tobia laala bwa aa lɔ Dea la bini ta buse.

⁹ Ate, n ɡel ba ɛ we-ɛɛla a ɡel deene la do ɡoroŋ, asɛ n berɛ kpɔ Korowii Dea laala la bwa ne mea sarahare, dɛ daawiile a sɔɔh aa soma la ka cheɡ o bini.

¹⁰ N berɔ na kɛŋɔ Lewi dea tena baa dɛ ɡo yela Korowii Dea la, ne Lewi dea tena la bane ɡe le Jerusalam, dɛ berɛ kaa ba kooni ta, dɛkalkɛ nɛra la aa ban kwaa aa chɛ kɛ ba tɛɛ ba la tɛ.

¹¹ N baah diu, n kah nomonome la ɡɛ baa ɡela Korowii Dea chɔ pɛɛ la. Asɛ n berɛ ba Lewi dea tena la ne yelɡoola la ne Korowii Dea, ba baa ɛ ba tomare ja.

¹² Asɛ Juda tena la bwa berɛ pa mun dɛɛ ba ba kwaa baa bɔne a bini bɔre fi bɔrbeŋkpoŋa kɛŋɔ, mea ne senfala dɛ ɔleve noo ne, dɛ kpɔ baa cheɡ deene aa lɔ Korowii Dea la bini ja.

¹³ N kpɔ nɛra ŋɔ baa nyiŋi deene baa kpɔ kwaa dɛɛ cheɡ a bini la ta. Banee, sɔfo Sɛlɛmia ne tɔnjereme Sadɔk dɛ Lewi dea te Pɛdaya. Asɛ Hanan ɛɛ cha ba, o mɛɛ sɔne Sakur, o nabaa sɔne Matania. Banee n ŋɔ ba bɔne kwaa la dɛɛ tɛ ba bala tom-ɛɛra la. Dɛ n dɛ yarada ba.

¹⁴ N Naa Korowii maa dɛ tomɛ, nyiŋi waa maa ɛa kasinteŋ ne he Dea nɔ ta nɔ, ne ɡɛ baa dɛɛ tomɛ bela.

¹⁵ A ɡɛ saŋ la, n na Juda tena bane baa dɛ tiɡri ɡrepo nɔna ta, dɛ kpɔ a nee dɛɛ ɛ sen Ona Tɔpere ta. Bane ɡe che mea ne sen ne ɡrepore, ne fiɡ daa nɔna, dɛ kwaa bwa soo siwi ba keeɡore ta, dɛɛ ba Jerusalam. Anomanta, n kah ba ŋɔ, bá nyiŋi kɛrɛdɛ dɛ bɛ komɛlbwa yoɡ Ona Tɔpere ta.

¹⁶ Dɛ bwɛjen Taaya tena bane soɡe Jerusalam, dɛ kpɔ pɛŋa ne laala bwa soo siwi ba yoɡ dɛɛ tɛ Juda tena Ona Tɔpere ta.

¹⁷ N baah di Juu tena nomonome nɛ, dɛ ŋɔ ba be ŋɔ, “Waa aa ɛ wechɔɡaa he ɛ dɛ kpɔ dɛɛ chɔɡ Ona Tɔpere la.

¹⁸ Gɛ tentenee he naawa ɛ, asɛ Korowii tɛr ba deŋne, dɛ chɔɡ bwɛjen nɔ la. Asɛ he ta teŋɛ dɛɛ chɔɡ Ona Tɔpere, dɛ kpɔ Korowii bandia kohona ba ta Israel harɛ ta la.”

¹⁹ Anomanta, n ŋɔ bɔr aa dɛ ba joe ásɛ Ona Tɔpere tel la, bá laa bwɛjen la doonyoo ɡbeni tɔɔɡe ka tel kɛŋɔ waa baa kaa. N kpɔ n tom-ɛɛra la bane so doonyoo la ta, ásɛ ba nyiŋi kɛrɛdɛ nomɛlbwa bɛ komɛlbwa kpɔ ba jo bwɛjen la ta Ona Tɔpere ta.

²⁰ Saŋ bɛlbwaa bonadiire ne nɛra baa dɛ yoɡ kwaa bwa soo siwi yon dɛɛ so bwɛjen Jerusalam baŋ Fiara jɔmɔra dɛ́ yoɡ ba kwa.

²¹ Kɛ n kah ba, dɛ ŋɔ ba be ŋɔ, “A ta aŋwɛnɛ ta ɛɛ kɛŋɔ he baa so danjwɛɛ la baŋ jɔmɔra ka tel kɛ tɔ aa pera. He berɔ ɛ ken ja aa, mɛɛ tɛr he deŋnee.” A habɔɔ, ba ta Ona Tɔpere ta balɛ kpa.

²² Asɛ n ŋɔ Lewi dea tena la be ŋɔ, bá sɔ ba doŋa bwa ta Korowii be pera, dɛ́ kaa daah doonyoa la, ɡɛ aa ɛ ásɛ ba di Ona Tɔpere la, o do ɡoroŋ. N Naa Korowii, lii n waa anɔ ɡe ta ja, dɛ́ sune n nɛɛ ɡɛ he nyina kohona aa doa la.

²³ A ɡɛ saŋ n berɔ na kɛŋɔ Juda baala la ɡalɡa mo Asdɔd ne Amɔn dɛ Moab haahna.

²⁴ Ba bii la bini bane dɛ bol Asdɔd wobol, kɛɛ nɛra bane ɡe baa jaa wobol ane. Baa won Juda wobol te bol.

²⁵ Asɛ n baah di ba nɛ, dɛ taah ba. N lɔɔ ba, dɛ chuɡri ba bini bane ɡe nyumpona, dɛ ɡel ba ŋwɛɛ ntam Korowii sɔn ta kɛŋɔ, ba ne ba bibaala ne bihaahna bɛ nɛŋhɔɔhra baa wola Korowii tomɛ mo, kɛɛ dɛ yalɛ kpa bwa.

²⁶ Hahmor aa do ken taa a che Israel Kooro Solomɔn ɛ wechɔɡa la. Dɛ o ɡwaa harɛre koranar bwa. Korowii waa dɛ tomɔ nyin o wa, dɛ cheɡo kora ta wɛɛ nyiŋi Israel tena nɛ. Kɛ ane a bwa, haahna baa ɛ nɛŋhɔɔhra moe ɡela o ɛ wechɔɡa.

²⁷ A chɛ kɛ yá teŋɛ wechɔɡ damanta ne kasinteŋ haa wola dɔe dɛ tɛ Korowii yaa dɛ tomɔ nɔ nɛ, dɛ́ ɡe ka mo haahna baa ɛ nɛŋhɔɔhra kɛɛ?

²⁸ Dɛ Sɔfonomoa Eliasib bibaa Joiada ɡe bibaa bɛl mo Sanbalat waa le Bɛt Hɔrɔn bihaah. Anomanta, n doŋi o bibaa la le Jerusalam.

²⁹ N Naa Korowii maa dɛ tomɛ, tɛr ba deŋne kɛŋɔ, baa kpɔ doŋa kah sɔfore toma, ne fɔo waa chɔ he ne Lewi dea tena ne ba baah ta la wa.

³⁰ Anomanta, n sɔ sɔfore ne Lewi dea tena la doŋa bɛlbwa ta Korowii be pera le wobɛlbwa aa ɛ wehɔɔhra ta, asɛ dɛ kpɔ bɛlbwa toma do o nɔn ta, asɛ bɛlbwa jemɛ waa waa dɛɛ ɛ.

³¹ N baɡle saŋ aa chɛ kɛŋɔ bá kpɔ daa baa kpɔ dɛɛ fuh saraha kwaa ne ba koo kondikonloɡla dɛɛ ba. N Naa Korowii maa dɛ tomɛ, lii n wa, dɛ́ sune n nɛ.