Nehemia 11 - mzwDBL

Nɛra baa bera ba so Jerusalam

¹ Aa ba dɛ la sie tama la, harɛ la ta nomonome baa so Jerusalam, asɛ nɛra la kabora bil daa, dɛ le dembeŋkpoŋ nɛra le deremi fi bɛlbwa bini, ba ba so Jerusalam bwɛjen waa do ɡoroŋ la ta, asɛ banuanaarɛ kar la ɡe ka so ba bwɛɛre ta.

² Asɛ harɛ la ta tena jam nɛra baa le ba te cheɡ ŋɔ baa so Jerusalam la bwa.

³ Nɛra la bini bane baa soɡe bwɛɛre ne bwɛjena ta laanee, Israel tena la bini bane, ne sɔfore ne Lewi dea tena, ne bonɔɔna baa dɛ ɛ toma Korowii Dea. Dɛ Kooro Solomɔn bonɔɔna naanar soɡe Juda bwɛɛre ane ta. Bɛlbwa kaa so o ɡbaɡba bwɛɛ waa le o ta,

⁴ asɛ nɛra la bane le Juda ne Bɛnjamen deene ta, dɛ ba so Jerusalam. Nɛra baa teŋa nɔɔ le Juda dea. Ussia bibaa Ataya waa ɛ Sekaria naa. O nabaala baa jaa nɔ, Amaria ne Sɛfatea dɛ Mahalalel, ba bwa ɛ Pɛrɛs waa ɛ Juda bibaa naanar.

⁵ Dɛ Baruk bibaa Maaseya, o nabaa aa ɛ Kol Hose. O naawa baa jaa laanee Hasaya ne Adaya ne Joiarib, dɛ Sekaria ba bwa aa ɛ Seela waa ɛ Juda bibaa naanar.

⁶ Pɛrɛs naanar baa soɡe Jerusalam lɔ lafraanaarɛ fifraanumɛl dɛ banuatoro, ba ɛ baala baa kpeɡa kɛrɛdɛ.

⁷ Nɛra baa le Bɛnjamen dea laanee nɔ, Mɛsolam bibaa Sallu waa ɛ Joed naa. O naawa baa jaa laanee, Pɛdaya ne Kolaya ne Maaseya ne Itiel dɛ Jesaya,

⁸ ne Gabai ne Salai baa ɛ Sallu lolanar tenten. Bɛnjamen dea nɛra baa kaa so Jerusalam la bwa lɔ lafraanuanaarɛ fifraanɛ dɛ banuatoro.

⁹ Dɛ Sikri bibaa Joel ɛ ba sitɔɔ, asɛ Hasenua bibaa Juda ɛ nomoa waa teŋa nɛɛ dɛ ja o nɛ bwɛjen la ta.

¹⁰ Sɔfore ɡee teŋa nɔ, Joiarib bibaa Jedaya ne Jakin,

¹¹ dɛ Hilkia bibaa Seraya o nabaa aa ɛ Mɛsolam. O nabaalaa Sadɔk ne Merayɔt dɛ Ahitub o fa aa ɛ Sɔfonomoa.

¹² Dɛ ba bwa lɔ lafraanuatoro fifraanɛ dɛ banɛ, dɛ le sɔfore dea dɛɛ ɛ toma Korowii Dea. Jɛroham bibaa Adaya o nabaa sɔne Pɛlalia. O nabaala bane ɡee, Amsi ne Sekaria ne Pasur dɛ Malkija.

¹³ O ne o bala baa ja o nɛɛ dɛ ɛ nomonnyuune la, ba lɔ lafraanɛ fifraanaarɛ dɛ banɛ. Aasarɛl bibaa Amasae o nabaa aa ɛ Asai, o nabaala bane ɡee Mɛselɛmɔt dɛ Ima.

¹⁴ O ne o bala baa ja o nɛɛ lɔ lafa fifraanɛ dɛ banuatoro. Dɛ ba ɛ laa tena baa kpeɡa kɛrɛdɛ. Ba sitɔɔ sɔne Sabdiel, o mɛɛ ɡe sɔne Haɡedolim.

¹⁵ Lewi dea tena ɡee nɔ, Hasub bibaa Sɛmaya, o nabaa sɔne Asrikam. O nabaala bane ɡee Hasabia ne Buni,

¹⁶ ne Sabetai ne Josabad baa ɛ Lewi dea nomonnyuune. Dɛ ba ɡee Korowii Dea habɔɔ toma do ba nɔn ta.

¹⁷ Mika bibaa Matania, o nabaa sɔne Sabdi, o ɛ Asaf naa. Dɛ Asaf nɔɔ dɛɛ tɔ yelɡoola sie Korowii Dea baa ɡo jam yela dɛɛ kpɛɛ Korowii, ne Bakbukia, onee ja Matania nɛɛ dɛɛ chao, ne Samoa bibaa Abda, o nabaa aa ɛ Galal o ɛ Jedutun naa.

¹⁸ Dɛ Lewi dea tena baa soɡe bwɛjen Jerusalam waa do ɡoroŋ la bwa lɔ lafraanɛ fifraanuatoro dɛ banaarɛ.

¹⁹ Nɛra baa dɛ daah Korowii Dea doonyoa laanee, Akub ne Talmɔn dɛ ba lolanar, ba bwa lɔ lafa fifraanuanɛ dɛ banɛ.

²⁰ Israel tena baa kaa la ne sɔfore dɛ Lewi dea tena, soɡe ba ɡbaɡba bwɛɛre aa lɔ Juda harɛ ta.

²¹ Dɛ bonɔɔna baa dɛ ɛ toma Korowii Dea soɡe Jerusalam bampera, Ofel deŋɡare ta, asɛ Siha ne Gispa ɛɛ nyiŋi ba nɛ.

²² Nomoa waa dɛ nyiŋi Lewi dea tena baa soɡe Jerusalam nɛɛ sɔne Usi. O mɛɛ sɔne Bani, o nabaalee Hasabia. O nabaala bane ɡee Matania ne Mika. Dɛ Usi ɛ Asaf naanar baa chɔ yela ɡoe nyoa Korowii Dea la bini bɛl.

²³ Dɛ Pɛɛsea koojen do mmara tɛ yelɡoola la, ɡɛ dea bɛlbwa nɛra aa tɔ nɛra sie tɔpere bɛlbwa dɛɛ ɡo yela Korowii Dea.

²⁴ Mɛsesabel bibaa Pɛtahea waa ɛ Sɛra naanar la bini bɛl dɛ le Juda dea, chiɡ Israel tena naa ta Pɛɛsea koodem.

²⁵ Juu tena la ɡalɡa soɡe bwɛɛre aa bɛne ba kooni ta. Banɔ la baa le Juda dea la soɡe bwɛɛre ane kɛŋɔ, Kiriat Aaba ne Debɔn dɛ Jekabsiil ne bwɛjeɡre aa bara ta,

²⁶ ne bwɛjena ane kɛŋɔ, Jesua ne Molada dɛ Bɛt Pɛlɛt,

²⁷ dɛ Hasar Sual ne Beɛseeba dɛ bwɛjeɡre aa bara ta,

²⁸ ne Siklaɡ ne Mekona dɛ bwɛjeɡre aa bara ta,

²⁹ ne Ɛn Remɔn ne Sora dɛ Jaamut,

³⁰ ne Sanoa ne Adulam dɛ a bwɛjeɡre ta, ne Lakes ne kooni aa baro ta, ne Aseka ne o bwɛjeɡre ta. Gɛɛ ba so le Beɛseeba waa lɔ weekaŋle harɛbɔr, dɛ teŋe ba kaa Henɔm Fɛlembɔjen weekaŋle nyundua.

³¹ Bɛnjamen dea tena soɡe Geba ne Mikmas ne Aeja dɛ Bɛtel ne bwɛjeɡre aa bara ta,

³² ne Anatɔt ne Nɔb dɛ Anania,

³³ ne Hasɔ ne Rama dɛ Getaim,

³⁴ ne Hadid ne Seboim dɛ Nebalat,

³⁵ ne Lod ne Ono, dɛ Baala Baa Dɛ Sɛh Kwaa Fɛlembɔjen bini.

³⁶ Lewi dea tena la bini bane baa le Juda dea la koo Bɛnjamen dea tena la bini, ba ne ba so.