Nehemia 1 - mzwDBL

Nehemia wesoŋa

¹ Waa Hakalia bibaa Nehemia aa ɛa laanee teŋa nɔ. Koojen Atasɛksɛs aa di kora Pɛɛsea harɛ ta bene fifraanɛ, Keslɛv ta, dɛ men Nehemia lɔ bwɛjen Susa.

² Belaa n dɔŋ Hanani ne nɛra bane le Juda harɛ ta dɛ ba. Asɛ n bɔɔ ba Juu tena baa wona chwa le bojaŋ harɛ baa laɡ ba kaa laa ta, ne bwɛjen Jerusalam wa.

³ Anee ba ŋɔ n be ŋɔ, “Banɔ la baa laɡ ba laa ta kaa bojaŋ harɛ ta la balɔ. Ba lɔ wahala ne sihiih ta. Danjwɛɛ waa bar Jerusalam la kuuɡo, asɛ bwɛɛ la doonyojen ɡbeni la ɡe, ba fuah a ɛ tɔɔ.”

⁴ Maa no waa nɔ la, n soɡo dɛ wi. N wio la sie tɔpere bɛl tama dɛ vɔwɛ nyoa, dɛ soŋe Korowii Waa Dɛ Di Kora Nyundua ŋɔ,

⁵ “N Naa Korowii haa dɛ di kora nyundua, he kan dɛ do ɔma kohona. He dɛ teŋɛ fɔo he ne nɛra baa dɛ nyini aa fɔwa, dɛɛ teŋɛ he Mmarare ta kasinteŋ ne.

⁶ Cheɡ deŋne dɛ́ no men maa ɛ he bonɔɔ wesoŋa maa kpɔa dɛɛ bil he sie chɔɔ ne jwaana, he bonɔɔna baa ɛ Israel tena nɔ wa. N dɛ bol n wechɔɡa ne ya Israel tena bwa kwa, dɛ anɔ la n naawa aa ɛa dɛ jo he nɛɛ bwa.

⁷ Ya ɛ nyubinikpeɡ, dɛ jo he nɛɛ kɛrɛdɛ. Ya ta waa he fa aa kpɔa tɛ he bonɔɔ Mosis dɛɛ do yaa a ta, ne mmarare la ta teŋɛ.

⁸ Lii waa he fa aa do he bonɔɔ Mosis dɛ ŋɔ, ‘Dɛ he Israel tena waa ta kasinteŋ dɔe yaa, mɛɛ lɔ heyaa peɡre harɛre ta,

⁹ kɛ dɛ he berɔ ba n be dɛ ba teŋɛ waa maa dɛ do heyaa a ta tenaa, hale dɛ ba lawɛ heyaa laa ta kaa bojaŋ harɛ jaɡa kwaraa naa, mɛɛ boa he nyoaa, dɛ́ lawɛ heyaa ba bela maa lea cheɡ ŋɔ baa tom mɛ la.’

¹⁰ N Naa Korowii, ba ɛ he bonɔɔna ne he ɡbaɡba nɛra. He kpeɡri ne he bokpeɡa nee he lɛɛ ba.

¹¹ Cheɡ deŋne no n wesoŋa ne he bonɔɔna baa dɛ nyin ba kpɔ duure tɛɛ la wesoŋa. Gel a chiɡ mɛ kɛrɛdɛ fini, dɛ́ ɡel koojen na n sum.” Gɛ saŋ dɛ menee dɛɛ do Koojen Atasɛksɛs sen.