Neehum 3 - mzwDBL

Niniwe tena bwɛɛlɛ

¹ Bwɛjen nɛŋkpoa ne nyosonteŋna aa su o ta la tena bwɛɛlɛ. Kondɔɔh su he bwa, he dɔma ɛɛ ba a pae kaa.

² Hɛɛ no chweremi baa dɛ cha jaɡre, ne a torɔɡore baa vɔrɔwa pɛla nakpale sii, ne chwae jaɡre aa dɛ chwa kohona, dɛ kwaa baa vɔwa pɛl jaɡre la jaeh aa dɛ jah sii.

³ Laa tena soɡe jaɡre ta dɛɛ chwa dɛ́ ka yo, dɛɛ beɡre kerele fal fal, lampeare ɛɛ nyɛɡle al-al ken. Nɛra serewɔ pirim, lala daŋɛ chɔ ba ta nyoa dɔe, nɛra ɛɛ laala.

⁴ A bwa cheɡɛ Niniwe tena baa do kɛ hanjwamane la pɛlchɔɡa ta. Ba cheɡɛ voɡra nɛɛ dɛ ɡel nɛra pɛla do ba nɛ. Ba kpɔ jwamane ŋwɛnɛ ta dɛ lawɛ harɛre nɛra kɛrɛdɛ yoma, ne sɔm ŋwɛnɛ ta, dɛ lawɛ nɛra bane ɡe.

⁵ Koranar Bwa Kooro ŋɔ, “Niniwe, n cheɡɛ he nɛ. Mɛɛ laa he yalee kpɔ he mun ta, dɛ́ ɡel harɛre nɛra bwa nae, ásɛ sihiih kpoe ba siwi ta.

⁶ Mɛɛ kpɔ doŋaa ta he nɛ, n siwi aa hen su, dɛ́ ɡel nɛra bwa kpɔ sie pa he nɛ.

⁷ Nomɛlbwa waa nae la ɛɛ le habɔɔ dɛ́ ŋɔ, ‘Niniwe chɔɡɔ kwaraa. Umee dɛ́ wi tɛo wɔ? Leperaa ń dɔ nɛn ó larawe o bwara ɔ?’ ”

⁸ He ɡwaa bwɛjen Tebes waa chɔ Nael Moo nyoa nee bar o bwa la kɛɛ? Nee laanee tɔɔ ɡbemɡbe, dɛ do kɛŋɔ danjwɛ.

⁹ Onee dɛɛ nyiŋi Itiopia ne Ijipt harɛre ta, o kpeɡri ta nyoa dɔe, Put ne Lebya harɛre nɛra bwa ɡe jao dɛɛ chao.

¹⁰ Kɛ ba wono ba yo he nɛra, dɛ laɡ ba kaa harɛfale bɛl ta. Ba lawɛ bechale dɛ kpɔ ba cha harɛ ba bini toɡri chɔ fɔɡbaahna. Ba lawɛ nomonjena dɛ bil daa ba nyuune ta, dɛ kpɔ jɔɡrɔre do sitɔɔla.

¹¹ Gɛɛ he Niniwe tena ɡe ɛɛ ba dɛɛra dɛ́ chwa ka sɔh, dɛ́ nyin bɔr ka marɛ he dɔma bɛ heyaa na.

¹² Dekpeɡa aa tɔ heyaa ɡbemɡbe la bwa do kɛŋɔ fiɡ daa aa nɔnɛ a nɔnloɡla, dɛ ba yiiɡi daa la aa, o nɔna yon ba lee naate waa dia la nyoa bini.

¹³ He laa tena bwa berɛ haahna. He bwɛjena doonyoo pilo paɡri nɛɛ tɛ he dɔma, a doonyoo ɡbeni bwa fuoh.

¹⁴ Hé dɔ nee cheɡ kohona, tɔe baa dɛ ba ba tɔ heyaa do la wa. Hé nyiŋi he dekpeɡa ta a do kpeɡri. Hé ɡbɛr teera dɛ́ saa a lawɛ, dɛ́ kpɔ he te dɛ́ teŋe berekese.

¹⁵ Belaa nii ɛɛ ba heyaa fuih, ba kpoo heyaa laa ta, dɛ́ he heyaa kɛŋɔ tontombɛ yon di kwaa la. Hé ɡel he nɛra warɛ kɛ hɔɔhre, kɛɛ tontombɛ.

¹⁶ He ɡelɔ he bonadiire warɛ dɛ ɡwaa weweela. Kɛ ba do kɛŋɔ tontombɛ ken, dɛ́ chɔɡ harɛ kwaa bwa kwaraa dɛ́ ir kaa.

¹⁷ Nɛra baa dɛ daah heya, ne nɛra baa dɛ ɛ toma koodem bela la, ba do kɛŋɔ tontombɛ aa wura ba maɡre danjwɛɛre ta waa saŋ, dɛ wee baa le aa, a yon ir kaa la, nomɛlbwa aa wola bela aa ira kaa jemɛ.

¹⁸ Asiiria koojen, nɛra baa dɛ nyiŋi he harɛ ta kɛ peteɡra la bwa chɔɔɡɔ. He nomonjena bwa serewɔ. He nɛra la bwa peɡrɔ dɛ do bwea dor, nomɛlbwa toole dɛ́ boa ba nyoa.

¹⁹ Komɛlbwa aa won ɡel he ŋwɛra tonɛ, bola baa do heyaa la ɛɛ kpoo heyaa. Nomɛlbwa waa no he waa sie ɛɛ lɛo dɛ́ lɔ kpaŋa ta he nɛɛ a wa. Umee wola he nyubinikpeɡ haa ɛa aa wola nyoa dɔe la nyoŋwaara nae ba nɔ?