Neehum 2 - mzwDBL

Bwɛjen Niniwe chɔɡa wa

¹ Niniwe tena, nomɛl dɛ ba ba yo heya. Hé daah he dekpeɡ la! Hé ta sie ŋwɛnɛ ta! Hé che kiŋkiŋ, dɛ́ kpɔ he te ka yo!

² Korowii berɔ dɛɛ ba Jekɔb jirima kpɔe tɛo, kɛŋɔ waa kpɔ Israel tena jirima tɛɛ ba la. A lole kɛŋɔ nɛnchɔɡa chɔɡ ba bwa, harɛ la chɔ pɛɛ, dɛ chɔɡ ɡrepo daa baa kpɔ a nɔna dɛɛ ɛ sen bwa.

³ Kwaa Niniwe dɔma aa kpɔa dɛɛ tɔ ba te ɡbemɡbe laa ta la swɛɛrɔ, laala baa doa ɡe swɛɛ. Torɔɡore baa vɔwa pɛl jaɡre nɛɛ dɛɛ la laa bune dɛ nyɛɡle, awola baa kpɔ ba te dɛɛ kaa laa la. Ba ir ba lampeare nyundua dɛɛ aah ba.

⁴ Laa tena kpɔ torɔɡore baa vɔwa pɛl jaɡre dɛɛ che a bini la chwa jo fɔɡbaahna, dɛ la dɛɛ ba fɔɡbaah bɛlbwa ta. Ba do kɛ baa choŋi kapɛle ken, dɛ teŋe wɔrɔbe nɛɛ baa kaa, kɛŋɔ bwaala aa dɛ nyɛɡle ken.

⁵ Niniwe laa nomoa le o laa tena baa kpeɡa, kɛ ba lɔ nakpale ŋwɛnɛ ta dɛɛ ba. Ba chwao dɛ ka marɛ bwɛjen la danjwɛ, dɛ kpɔ kon tɔ ba te ɡbemɡbe.

⁶ Gbeni baa kpɔa tɔ nee la nyoa la pilo, asɛ koodem la bwa kuuɡi.

⁷ A chɛ kɛ Niniwe chɔ pɛɛ, ásɛ ba lawɛ o nɛra laa ta kaa. O toli ɛɛ wiu kɛŋɔ kwehre ken, dɛɛ lɔ ba bambile á baɡle kɛ ba dɛ di suna.

⁸ Nɛra le Niniwe dɛɛ kaa kɛŋɔ nee aa pala le tam ta ken. Ba bala dɛ yer ba ŋɔ, “Hé ɡel! Hé ɡel!” Kɛ nomɛlbwa aa habɔɔ berɛ.

⁹ Hé pa ba suuɡapoŋa ne ba suuɡaswɛm kɛŋɔ laa ta kwa. Kondɔɔh su bwɛɛ la bwa, a ta nyoa dɔe.

¹⁰ Niniwe bwa chɔɡɔ, ba pa o kwaa bwa kwaraa, o chɔ pɛɛ. Ɔmee su o nɛra bwa, ba natuune sɔɔh, ba bwara ɛɛ sa, ba siebɔra ɡwaŋre.

¹¹ Bɔkwa waa pu bwɛɛ o fa aa do kɛŋɔ nyujentena sobɔr laɔ? Niniwe tena fa aa lɔ ba bwɛɛ kɛŋɔ nyujente ombal ne onnee, dɛ so bela dɛɛ dɛ́ɛ a bii, a ne a biirii ba dɛɛ ka, aa wola komɛlbwa ɔmɛ.

¹² Ba do kɛŋɔ nyujente aa kpo ol, dɛ peeɡe o bini tɛ o haah ne bii, dɛ che ol la su o bɔɔ bini.

¹³ Koranar Bwa Kooro ŋɔ, “N cheɡɛ he nɛ. Mɛɛ fuh torɔɡore haa vɔwa pɛl jaɡre laanee. Baa kpoo he laa tena laa taa, dɛ́ pa laala haa paa le bane be la. Baa he toroma taa no kpa bwa.”