Neehum 1 - mzwDBL

¹ Waa aa chiɡ bwɛjen Niniwe, Korowii bol baɡle Neehum waa le Ɛlkɔs chaahna ta, asɛ o chwerɛ bil laanee nɔ.

Korowii baah di Niniwe tena nɛ

² Korowii dɛ mee, dɛ ɡel o dɔma wechɔɡa ɛɛ ɡure ba nɛ. O baah dɛ di ba nɛɛ wɛɛ bɔ ba kem bwaawee ne, dɛɛ tɛr banɔ la baa haoh deŋne. O teŋɔ kpɔ o bandia dɛɛ ta o dɔma nɛ.

³ Korowii baah aa di warawara, o dɔ kpeɡri kohona. Waa wechɔɡ-ɛɛ bɛlbwaa ɡel dɛ o ta o deŋne tɛrɛ. Bobɛlbwa Korowii aa dɛ valɛ la, belaa kawulewule ne dompeu ɛɛ ta, asɛ baama ɛ o nakpale tutuɡ.

⁴ O dɛ bol wa mpo hweeh, dɛ́ ɡel neerare bwa hweeh. Basan harɛdɛɛɡe ne Kaamɛl Bwejen bwa dɛ hol, asɛ Lɛbanɔn daa fee bwa ɡe ɛɛ serewe.

⁵ Bwejena dɛ jiɡri o sie, deŋɡarere ɛɛ mwɛɛ. Korowii leɔ dɛɛ ba naa, harɛ bwa ne nɛra baa lɔ o ta bwa dɛ chel.

⁶ O baah diu waa, umee dɛ́ won che a nyoa ɔ? Umee dɛ́ won ba o sie o bandichɔɡe ta nɔ? O baah diu kohona naa, a do kɛŋɔ baa fuɡe nii ta ken, bwea bwa dɛ peɡri burbur ken o sie.

⁷ Korowii wer, o kpɔ nɔn dɛɛ tɔ o nɛra nɛɛ ba wenaale tɔpere, dɛɛ nyiŋi nɛra baa dɛ yaradao nɛ.

⁸ Kɛ Niniwe te, wɛɛ chɔɡoo kɛŋɔ nee waa sua dɛɛ chɔɡ kwa, ásɛ dɛ doŋi o dɔma ta biro ta.

⁹ Korowii vɔrɔwa bɛlbwa dɔma aa vɔrɔwa la, wɛɛ chɔɡ a bwaa, wekpeɡa bɛlbwa aa berɛ ba nɛɛtena kpa.

¹⁰ He sennyɔɔra, nii ɛɛ fuh heyaa kɛŋɔ sɔɔhne aa kaɡre dawii baah ken.

¹¹ Niniwe, he taa nɛnchɔɡe le dɛɛ vɔrɔwe Korowii vɔrɔwa, dɛɛ baɡle nɛra wechɔɡa ŋwɛnɛre.

¹² Anomanta, kenii Korowii ɛɛ bol o nɛra Juda tena be, “A lole kɛŋɔ Asiiria tena kpeɡri, dɛ warɛ dɛ dɔ nɛra bá ba cha ba, kɛ mɛɛ chɔɡ baa le harɛ nɔ ta bá he kwaraa. Juda tena, menee ɡela he fa na wahala, kɛ maa berɛ ɡel he na ɡɛ kpa.

¹³ Mɛɛ teŋe kpeɡri Asiiria tena aa dɛ di he nɛɛ la taa, dɛ́ chaa jɔɡrɔre aa vɔrɔwe heyaa la.”

¹⁴ Kenii Korowii bol he Asiiria tena waa bil, “Haa naanaree dɔ dɛ́ kpɔ he sɔna pa ba. Mɛɛ chɔɡ voɡa haa sɛah daa nee, dɛ anɔ la haa loɡa a do he voɡa deene bini la. Mɛɛ kwi he lalbɔɔ bil, dɛkalkɛ he waa ta tɔnɔ bɛlbwa dɔe.”

¹⁵ Hé ha sie nyiŋi bwejena dor! Nɛn waa kpoŋe amanesoma dɛ valɛ bela, dɛɛ bol deŋnesɔɔhna wa. Juda tena, hé di he tɔpejena la, dɛ́ kpɔ kwaa haa baɡɛ Korowii nyoa la ba tɛo. Nyubinikpeɡ tena aa heyaa ba yo he harɛ ta kpa. Mɛɛ chɔɡ ba bwaa kwaraa.