Mumpar 9 - mzwDBL

Korowii ne Nowa fɔo fɔwa wa

¹ Asɛ Korowii swee andɛɛɡa tɛ Nowa ne o bii dɛ ŋɔ, “Hé loɡle bii kohona dɛ́ ya dɛ́ warɛ do harɛ nɔ ta bobɛlbwa.

² N kpɔ ola ne jumbii aa dɛ ɡah nyundua, ne kwaa aa dɛ tuuɡi tea ta, ne anɔ la aa dɛ huuh, ne pɛŋa bwa do he nɔn ta, ásɛ a bwa ɛɛ ɔmɛ heya.

³ Hɛ́ɛ won di a ɡɛ ola a siwi aa lole la, hɛ́ɛ wonoo kpoora di. Gɛ maa tɛ heyaa papooni, asɛ a ɛ kondikwaa tɛ heyaa la, ɡɛɛ n kpɔ a ɡe dɛɛ tɛ heya.

⁴ Kɛ he bɛ konlale di, dɛkalkɛ o sewɔ ta baŋa. Komɛlbwa mkpa lɔ o chal ta.

⁵ Gɛɛ nɛwɛnyini bɛlbwa ɡe waa kpo o dɔŋ la, mɛɛ ba o deŋne tɛra. Ásɛ olchɔɡe bɛlbwa ɡe waa kpo nɛwɛnyini la, ń tɛr o deŋne.

⁶ Nomɛlbwa waa kpo o dɔŋ la, ɡɛɛ o dɔŋ bɛl ɡe ɛɛ ba o kpoe, dɛkalkɛ ɡɛ Korowii aa doa laanee o ta nɛwɛnyini.

⁷ Hé loɡle bii, ásɛ dɛ ya warɛ kohona, ásɛ he naanar su harɛ nɔ ta bobɛlbwa.”

⁸ Anee Korowii ŋɔ Nowa ne o bii baa ja o nɛɛ la be ŋɔ,

⁹ “Taraken n ne hen, ne he naanar dɛ ba fɔo fɔwa,

¹⁰ ne kpɔɡ bini ola ne kwaa aa dɛ tuuɡi tea ta, ne anɔ la aa dɛ huuh, ne jumbii ne kondɛɛra bwa aa ja he nɛɛ dɛ le daka la bini la.

¹¹ Waa aa lɔ n ne he fɔo nɔ ta laanee kɛŋɔ, saŋkama bɛlbwa toole mɛɛ ba ɡela nee su dɛ́ ba chɔɡ kontaala bɛlbwa kpa, ásɛ nee bɛlbwa ɡe aa won su kohona dɛ́ chɔɡ harɛ nɔ.”

¹² Asɛ Korowii ŋɔ, “Mɛɛ tɛɛ kon waa dɛ baɡle fɔo n ne haa fɔwa laanee, ó do le tɛ he ne hweera kwaa bwa saŋ bɛlbwa dɛɛ la.

¹³ Mɛɛ ɡeloo n bwaala deŋɡare do nyundua baama bini, dɛɛ baɡle fɔo n ne haa fɔwa harɛ nɔ ta la.

¹⁴ Dɛ baama baa tɔ bobɛlbwa, asɛ bwaala deŋɡare le a bini naa,

¹⁵ a taa mɛ ba fɔo la n ne hen ne hweera kwaa bwa soo siwi aa fɔwa la nae. Aa won ba kɛ nee ɛɛ ba suu dɛ́ ba chɔɡ kontaale bɛlbwa kpa.

¹⁶ Saŋ bɛlbwa, dɛ bwaala deŋɡare baa le baama bini naa, a taa mɛɛ ba nae dɛ́ lii fɔo la n ne hweera kwaa bwaa fɔwa harɛ nɔ ta la.”

¹⁷ Anomanta, Korowii ŋɔ Nowa be ŋɔ, “N bwaala deŋɡare nɔɔ dɛ́ baɡle kɛ n ne hweera kwaa bwa fɔwɛ fɔo harɛ nɔ ta.”

Nowa ne o bibaala wa

¹⁸ Nowa bibaala baa ja o nɛɛ dɛ le ɡbera la bini laanee Sɛm ne Ham dɛ Jafɛt. Dɛ Ham bibaa sɔne Keenan.

¹⁹ Banɔɔ Nowa bibaala batoro la, asɛ a che ba nɛɛ nɛwɛnyina warɛ harɛ nɔ ta la.

²⁰ Dɛ Nowa dɛ parɛ. Onee pa mun parɛ daa koo, dɛ du daa ane ba kpɔ a nɔna dɛɛ ɛ sen.

²¹ Waa kpɔ ane ɛ sen dɛ nyɔ la, o dɛɛrɔ dɛ ka chɔ mumɡbal o dea.

²² Asɛ o bibaa Ham, waa ɛ Keenan mɛɛ la, na kɛ o mɛɛ chɔ mumɡbal, asɛ o le dɛ ka taa baɡle o bala banɛ la.

²³ Belaa Sɛm ne Jafɛt kpɔ yal, asɛ dɛ ka paɡri bɔle ba vaama ta, dɛ valɛ mumur, dɛ kpɔ yal la ka tɔ ba mɛɛ. Baa wola nyin kɛ ba siwi na ba mɛɛ mumɡbal la waa ba berɛ ba habɔɔ chaɡɔ dɛ kpɔ yal la ka tɔɔ la.

²⁴ Sen la aa baa le Nowa sie ta o ir la, o no waa la o bii la bwa bini bechala la aa ɛɔ la.

²⁵ Asɛ o ŋɔ, “Bwɛɛlɛ Keenan! Hɛɛ ɛ yomii, dɛ́ do he dɔɔranar lɔɡa.”

²⁶ Asɛ o berɛ ŋɔ, “Hé kpɛɛ Korowii Sɛm aa dɛ tomɔ, Keenan ɛɛ tomɛ Sɛmii.

²⁷ Kórowii tɛ Jafɛt naanar kohona, ba ne Sɛm bwa pɛ so bobeŋkpoŋ! Keenan ɛɛ ɛ yomii do Jafɛt lɔɡa dɛɛ tomɔ.”

²⁸ Nee la aa sua dɛ ba hweeh la, Nowa berɔ so dɛ di bene lafraatoro fifraanue.

²⁹ Waa baa sewɛ la, dɛ o di bene lafraanuanaarɛ fifraanue.