Mumpar 7 - mzwDBL

Nee waa sua la wa

¹ Korowii ŋɔ Nowa be ŋɔ, “He ne he bii ne he bii haahna bwa ka jo daka la bini. N nao kɛŋɔ harɛ nɔ ta, he ɡboo ɛ nɛn he wa aa toɡra.

² Kpɔ ola bwa soo siwi maa wola an kie bele anuanɛ, a bini bɛlbwa onnee ne bal kaa daka la bini, ásɛ ola bwa soo siwi maa kia ɡe bɛlbwa beŋkpoŋ, onnee ne ombal.

³ Jumbii ɡe, he kpɔ bele anuanɛ, onnee ne ombal. N dɛ nyin kɛ he ɛ ɡɛ maa baɡla nɔ, ásɛ a bini bɛlbwa soo siwi mun bɛ he, dɛ́ won ya kerekere.

⁴ Le fini dɛɛ kaa o yawanyoa, n dɛ ba ɡela bwaala nɛ kohona, waa ɡel bwa tɔpera fifraanaarɛ, dɛ́ chɔɡ komɛlbwa maa tao.”

⁵ Asɛ Nowa ɡe no wobɛlbwa Korowii aa doo la bwa.

⁶ Nowa bene lafraanumɛl taa a ɡɛ nee nɔ su dɛ chɔɡ harɛ nɔ la.

⁷ O ne o haah ne o bii, ne o bii haahna bwaa kaa jo daka la bini, ásɛ nee la bɛ ban kpɔ kaa.

⁸ Ola Korowii aa wola an kie ne anɔ la waa kia, ne jumbii ne kwaa aa dɛ tuuɡi tea ta ne anɔ la aa dɛ huuh,

⁹ anneena ne ambala bwa ja Nowa nɛ dɛ jo daka la bini ɡɛ Korowii aa doo la.

¹⁰ Tɔpera anuanɛ la habɔɔ la, nee la suu dɛ ba bɔle harɛ la bobɛlbwa.

¹¹ Nowa aa di bene lafraanumɛl korobinɛɛte ta, tɔpera fi dɛ anuanɛ la taa harɛ bobɛlbwa bule, asɛ nyundua pili dɛ nɛ bwaala kohona.

¹² Bwaala nɛo, waa ɡel bwa tɔpera fifraanaarɛ.

¹³ Awola bwaala la aa pa mun laanee Nowa ne o haah ne ba bii batoro, Sɛm ne Ham ne Jafɛt dɛ ba ɡe haahna bwa ka jo daka la bini.

¹⁴ Kpɔɡ bini ola bwa soo siwi ne kondɛɛra bwa, anjena ne anjeɡre, ne kwaa aa dɛ tuuɡi tea ta, ne anɔ la aa dɛ huuh, ne jumbii bwa soo siwii ba lawɛ do daka la bini.

¹⁵ Korowii kontaala te bɛlbwa, anneena ne ambalaa ja Nowa nɛ dɛ jo daka la bini,

¹⁶ ɡɛ Korowii aa do Nowa la. Asɛ Korowii laa doonyoa waa ŋɔa Nowa forɛ daka la ta la ɡbera laa tɔ o nɛ.

¹⁷ Nee la aa sua tɔpera fifraanaarɛ la, o wono ɡɔɔ daka la asɛ o jaah.

¹⁸ Waa baa su kohona la, bobɛlbwa baa do luŋri asɛ daka la won dɛɛ valɛ nee sie.

¹⁹ O wono su dɛ bɔle bwejena aa lɔ harɛ nɔ ta bwa ta,

²⁰ O suu dɛ ka tel kɛ waa bɔle bwejena ta asɛ dɛ ɡwaala a ka tama á ɛ naɡale fifraanɛ dɛ atoro kwara.

²¹ Korowii kontaala bwa, nɛwɛnyina ne ola, ne kwaa aa dɛ tuuɡi tea ta, ne anɔ la aa dɛ huuh, dɛ jumbii bwaa serewa.

²² Nɛwɛnyina ne ola ne kwaa aa dɛ tuuɡi tea ta, ne anɔ la aa dɛ huuh, ne jumbii bwaa o chɔɡ kwara. Nemenɛ Nowa ne banla baa dɔ bɔr ja o nɛɛ dɛ jo daka la bini laanee baa ka.

²³ Korowii chɔɡ hweera kwaa bwa aa lɔ harɛ nɔ ta.

²⁴ Nee la suu dɛ dɔ tɔpera lafa fifraanue dɛ o ta kan ɡɛ.