Mumpar 6 - mzwDBL

Nowa bere saŋ nee waa sua wa

¹ Nɛwɛnyina aa dɛ warɛ harɛ nɔ ta asɛ dɛɛ loɡle bihaahna la,

² belaa nyundua nɛra la aa naa kɛŋɔ harɛ nɛra la bihaahna la wer la, ba kpɔ ba bini bane mo, asɛ ba ne ba so.

³ Anee Korowii ŋɔ, “Maa ɡel n Doma waa dɛ tɛ mkpa la do nɛwɛnyini bini saŋ bɛlbwa dɛɛ la. Baa wonoo sewɛ. Taraken, nɛn aa biɡra kwaraa la, anee bene lafa fifraanɛ ɡbo, dɛ o sewɔ.”

⁴ A ɡɛ saŋ ne a habɔɔ bwa la, dɛ nɛra bane lole baa yer ba Nefilim dɛ do harɛ nɔ ta, ba kpeɡo kohona dɛ do kpeɡri. A ɡɛ nɛra nɔ ɛ harɛ nɛra la bihaahna baa lol ba ne nyundua nɛra la naanar. A ɡɛ nɛra nɔɔ kpeɡa kohona a ɡɛ saŋ tena la bini dɛ dɔ sɔna la.

⁵ Korowii aa baa na ɡɛ nɛwɛnyina nyubinikpeɡ aa kana kohona harɛ nɔ ta dɛ dɔ liichɔɡa ɡbosoroo tɔpere bɛlbwa la,

⁶ o bambile bini chɔɡɔ kɛ waa ta nɛwɛnyina ba harɛ nɔ ta. Gɛ waa nɔ aa we o nɛɛ kohona nomanta o ŋɔ,

⁷ “Mɛɛ chɔɡ nɛwɛnyina maa taa bwaa, ne ola ne jumbii ne kwaa aa dɛ tuuɡi tea ta ne anɔ la aa dɛ huuh bwa, dɛkalkɛ a dɛ we n nɛɛ kɛ maa taa.”

⁸ Kɛ Korowii sie lɛ Nowa te nɛ.

Nowa wa

⁹ Kenii Nowa bwara waa do. Waa ira ɡɛ saŋ la, dɛ o ɡboo ɛ nomɛl o wa aa toɡra, wechɔɡa bɛlbwa aa wola toole o nɛ. Anomanta, o ne Korowii kpɔ darame.

¹⁰ O lolɛ bibaala batoro asɛ dɛ pa bɛl sɔn Sɛm, nɛɛte ɡe Ham, asɛ toorote la ɡe Jafɛt.

¹¹ Dɛ nɛra baa kaa la te bwa ɛ wechɔɡ-ɛɛra Korowii be, asɛ naɡrenyin we-ɛɛla su harɛ la ta bobɛlbwa.

¹² Korowii aa nyiŋi nɛra la, o nao kɛ ba bwa ɛ wechɔɡa, dɛkalkɛ bɛlbwa dɛ ɛ ɡɛ waa dɛ nyin dɛ nyoɡre Korowii ŋwɛnɛ.

¹³ Asɛ Korowii ŋɔ Nowa be ŋɔ, “N dɛ ba nɛra bwa chɔɡa le harɛ nɔ ta. Mɛɛ chɔɡ baa, dɛkalkɛ ba ɡelɔ naɡrenyin we-ɛɛla perɛ harɛ ta bwa. Kasinteŋ, mɛɛ chɔɡ ba ne harɛ bwaa.

¹⁴ Anomanta, Nowa, ka nyin daa waa kpeɡa, dɛ́ kwaa dakajen waa won nee sie vala kɛŋɔ ɡbera, ásɛ dɛ bɔne o bini kɛŋɔ deene, ásɛ dɛ kpɔ kootal maa o bini ne o habɔɔ bwa.

¹⁵ Dɛ he dɛ ba daka la kwaara aa, ɡel o jaŋne ɛ naɡale lafraanaarɛ fifraanue, ásɛ o paɡri ɡe ɛ naɡale fifraanuanɛ dɛ anue, ásɛ o jaŋne dɛ́ kaa nyundua la ɡe ɛ naɡale fifraanaarɛ dɛ anue.

¹⁶ Ásɛ he tɔ o nyundua, kɛ dɛ́ ɡel bɔr chɔ o ne daka la baah ta dɛ baro dɛ ɛ naɡale beŋkpoŋ ne tama. Dɛ́ berɛ kpɔ daa, dɛ́ bɔne o bini chɔŋre dɔŋa nɛɛ atoro kaa nyundua, ásɛ dɛ nyin ɡbera do o ta.

¹⁷ N dɛ ba ɡela nee su dɛ́ tɔ harɛ nɔ bobɛlbwa, ásɛ dɛ chɔɡ n kontaala bwa. Komɛlbwa waa lɔ harɛ nɔ ta te bwa dɛ ba sewa.

¹⁸ N ne hɛɛ fɔwɛ fɔwee, ásɛ he kpɔ he haah ne he bibaala, ne ba ɡe haahna bwa jo daka la bini dɛ́ ja he nɛ.

¹⁹ Ásɛ dɛ lawɛ komɛlbwa soo siwi anɛnɛ, a bini bɛlbwa onnee ne ombal.

²⁰ Jumbii bwa ne ola ne kwaa aa dɛ tuuɡi tea ta, ne anɔ la aa dɛ huuh harɛ nɔ ta bwa anɛnɛ, onnee ne ombal ɛɛ ba he bee he lawa do daka la bini, ɡɛ aa ɛ ásɛ a bini bɛlbwa mun bɛ he.

²¹ Ásɛ dɛ nyin he ne kwaa la bwa kondikwaa do daka la bini.”

²² Nowa ɡe ɛ komɛlbwa Korowii aa doo ŋɔ o ɛ la bwa.