Mumpar 49 - mzwDBL

Jekɔb swee andɛɛɡa tɛ o bibaala

¹ Jekɔb yerɛ o bibaala asɛ dɛ ŋɔ, “Hé bwa ba cheme, ásɛ n baɡle heyaa waa aa dɛ ba he nɛɛ bala kerekere.

² Hé bwa ba cheme dɛ no. Hé ba no he mɛɛ Jekɔb wa.

³ Rubin haa ɛ n binyoa nɔ, henee n kpeɡri. Henee n tɔ sie lolɛ n bonɔɔne saŋ, dɛ dɔ jirima ne bokpeɡa ɡwaa n bii bwa.

⁴ He we-ɛɛla do kɛŋɔ nehɛma, he jirima tonɔ. Dɛkalkɛ he lawɛ n hanɛɛte chɔ n chɔɔbɔr, dɛ kpɔ doŋa kah mɛ.

⁵ Simeon ne Lewi ɛ nimanar. Ba kpɔ ba dɔmkwaa dɛɛ ba yoi ne.

⁶ Maa ba nɛɛ ja ba wobɛlbwa baa vɔrɔwe ta. Ba baah diu waa, ba dɛ kpoo nɛra, dɛɛ ŋwɛne nae ɡe nakpale pɛɛpɛɛ á bɛ won valɛ.

⁷ Ba bandia ne ba nyubinikpeɡ nomanta, bá bwɛɛlɛ! Mɛɛ lɔ ba naanaree peɡre Israel harɛ bwa. Dɛ laɡ ba le ba nɛra bini.

⁸ Juda, he dɔɔranar ɛɛ duurii, ásɛ he nɔn dawɛ he dɔma nɛ. He dɔɔranar ɛɛ ba ɡuŋi he siee.

⁹ Juda do kɛŋɔ nyujente ken. Kpaahna taa he che dɛ kpeɡ. O chɔ harɛ kɛ nyujente aa, umee dɛ wonu wɔ?

¹⁰ Koodaŋɡbala aa o nɔn ta lee ba, mmarare doe ɡe aa o habɔɔ le, ásɛ harɛre nɛra kpɔ koŋkɛɛla baa tɛo, dɛ́ ba ɡuŋi o sie dɛɛ duuru.

¹¹ Daa baa kpɔ o nɔna dɛɛ ɛ sen la taa wɛɛ ba o keeɡo bie lawa vɔwɛ. A sen nee wɛɛ ba o laala chɛɡa.

¹² Sen ɛɛ ɡeloo o sibie swɛɛ, ásɛ na-elne kohona ɡe ɡel o nyena to.

¹³ Sebulon sobɔree mpo nyoa, o jwɛh ka tel Sidon, ásɛ stiimaere che bela wobɛlbwa aa wola an ɛ.

¹⁴ Isaaka do kɛŋɔ keeɡo ɡwaŋe, dɛ chɔ o bone baah ta,

¹⁵ o nao kɛŋɔ bela waa dɛ ba ona la ɛ bodɛɛɡe asɛ silɛɛ do bela aa, wɛɛ kpɔ vaamaa lɛa, dɛ́ kpɔ o te tɛ tomkpeɡa.

¹⁶ Dan ɛɛ ba nyiŋi o nɛra nɛɛ. Baa doo kɛŋɔ Israel deene aa kaa la.

¹⁷ Wɛɛ ɛɔ kɛŋɔ domkpule, dɛ́ chɔ ŋwɛnɛ nyoa, dɛ́ choɡe jaaɡɔ nakpala, ásɛ nɛn waa soɡe o ta la ka le habɔɔ.

¹⁸ N Naa Korowii, n soɡoo dɛɛ kpa kɛŋɔ he ba dɛ́ ba lɛ yaa.

¹⁹ Ŋwɛɛra ɛɛ bao dɛ́ ba yo Gad. Kɛ o ɡe ɛɛ berɔ teŋɛ ba nɛɛ dɛ́ yoo ba.

²⁰ Aasa harɛ ɛɛ ɛ kondikondɛɛɡaa, wɛɛ kpɔ anɔ la aa dɔ pɛlaa ka tɛ kooro.

²¹ Naftale ɡe ɛɛ doo kɛŋɔ welo waa kpaŋa dɛ chwa dɛɛ kaa. Wɛɛ lolɛ bii ba do wer.

²² Josef ɡe do kɛŋɔ daa waa won nɔna kohona, dɛ che nee nyoa, o kpala ɛɛ teeh danjwɛɛ.

²³ O dɔma ɛɛ ba yoo á do kpeɡri, dɛ́ teŋɛ o nɛɛ dɛɛ tao hɛma.

²⁴ Nemenɛ Korowii, o mɛɛ Jekɔb Kpeɡnɛn waa tomɔ nomanta, wɛɛ do kpeɡrii dɛ́ kpoŋe o to bini kiŋkiŋ. Peteɡre waa dɛ lɛ Israel tena, dɛ do kɛ Bwetal laanee dɛ́ chao.

²⁵ Korowii he mɛɛ aa tomɔ laanee dɛ́ chae. Korowii Waa Ɛ Kpeɡri Bwa Dɔɔ sweere andɛɛɡa dɛ́ pili nyundua bwaala nɛ tɛɛ, dɛ́ tɛɛ nee aa le harɛ bini. Onee dɛ́ tɛɛ kondɛɛra ne naanar kohona.

²⁶ He naawa sweera baa sweera tɛ he mɛɛ la ɡwaa kondɛɛɡa haa dɛ naa deŋɡarere dor. Korowii le Josef cheɡ dɛ tɛo a ɡɛ hɛɛra nɔ a dawɛ o tile ta, dɛkalkɛ o ɡwaa o dɔɔranar.

²⁷ Bɛnjamen do kɛŋɔ noniete o sie aa beɡre ol lawa dɛ́ di. Chɔɔ ne jɔmɔra bwaa o te ɛɛ kpoo ola dɛɛ dia.”

²⁸ Gɛɛ Israel deene fi dɛ anɛ la waa do. Gɛɛ ba mɛɛ Jekɔb bol ɡɛ saŋ waa sweera tɛɛ ba la.

Jekɔb seo ne o huɡa wa

²⁹ Ate, Jekɔb berɛ ŋɔ o bii la be ŋɔ, “Taraken, n dɛ ba sewa. N baa sewaa, hé ka huɡ mɛ n mɛɛwa huɡri bɔr o fa aa lɔ Hiti te Efron koo ta.

³⁰ Makpɛlaa o do, o bɛne Mamre waa lɔ Keenan harɛ ta. Abraham yawɛ a ɡɛ bɔr nɔ ne koo la le Efron be o ɛ ba huɡri bɔr.

³¹ Belaa ba huɡe Abraham ne o haah Saara. Dɛ huɡe Aesek ne o haah Rebɛka ɡe. Belaa n huɡe Lea ɡe.

³² Koo la ne bwebɔɔ waa lɔ o ta la, yawaa n naa Abraham yawɔ le Hiti tena be. Hé huɡ mɛ bela.”

³³ Jekɔb aa bol o waa bwa tonɛ o bii la be la, o kpɔ o nyu bil kapuri ta dɛ sewɛ.