Mumpar 46 - mzwDBL

Jekɔb Ijipt harɛ ta kaala wa

¹ Jekɔb kpɔ kwaa waa dɔa bwa, dɛ chiɡ ŋwɛnɛ ta, dɛ ba tel Beɛseeba. O kpoo kwaa ɛ saraha tɛ Korowii o mɛɛ Aesek aa tomɔ la bela.

² Korowii kpɔ o te baɡlo bela deera ta jwaana dɛ yerɔ ŋɔ, “Jekɔb.” Asɛ o sɛh dɛ ŋɔ, “Menee la.”

³ Belaa Korowii ŋɔ o be ŋɔ, “Menee Korowii he mɛɛwa aa tom mɛ la. Bɛ ɔmɛ kɛŋɔ he dɛ kaa Ijipt harɛ ta. Mɛɛ ɡeloo he mun ya bela taeh.

⁴ Mɛɛ teŋɛ he nɛɛ kaa bela, ásɛ dɛ berɛ ba he naanar ne a ɡɛ Keenan harɛ nɔ ta. He dɛ ba sewaa, Josef ɛɛ lawɛɛ he sewɛ.”

⁵ Belaa o le Beɛseeba asɛ o bii la kpɔ o ne ba ɡe bii ne haahna do kon waa do kɛŋɔ torɔɡo ba vɔwɛ pɛl jaɡre Ijipt kooro aa kpɔa tom ba ŋɔ bá kpɔ ba kpɔɔ ba la bini.

⁶ Ba kpɔ ba kondɛɛra ne kwaa baa dɔa Keenan harɛ bwa ba Ijipt. Jekɔb kpɔ o naanar bwa ja kaa,

⁷ o bibaala ne o bihaahna ne o naanar baa ɛ bibaala ne bihaahna bwa.

⁸ Jekɔb bibaala baa ja o nɛɛ dɛ la Ijipt harɛ ta laanee nɔ, Rubinii ɛ o binomoa.

⁹ Rubin bibaalaa nɔ, Hanɔk ne Palu ne Hɛsrɔn dɛ Kaami.

¹⁰ Simeon bibaalaa nɔ, Jɛmoɛl ne Jamin ne Ohad ne Jakin ne Soha dɛ Swaul. Swaul nɔ nyaa ɛ Keenan te la.

¹¹ Lewi ɡe bibaalaa nɔ, Gɛsɔn ne Kohat dɛ Merari.

¹² Juda ɡe bibaalaa nɔ, Ɛr ne Onan ne Seela ne Pɛrɛs dɛ Sɛra. Kɛ Ɛr ne Onan te sewɛ Keenan harɛ ta. Pɛrɛs bibaalaa nɔ, Hɛsrɔn ne Hamul.

¹³ Isaaka ɡe bibaala nɔ, Tola ne Pua ne Jasub dɛ Simron.

¹⁴ Sebulon ɡe bibaalaa nɔ, Sered ne Ɛlɔn dɛ Jaleel.

¹⁵ A ɡɛ bibaala nɔɔ Lea lolɛ tɛ Jekɔb ɡɛ saŋ baa soɡe Mɛsopoteemea harɛ ta Daena waa ɛ o bihaah la habɔɔ. Dɛ o bihaahna ne bibaala dɛ naanar o ne Lea aa dɔa la bwa lɔ fifraatoro dɛ batoro.

¹⁶ Gad ɡe bibaalaa nɔ, Sefon ne Haɡi ne Suni ne Ɛsbɔn ne Ɛre ne Arodi dɛ Areli.

¹⁷ Aasa ɡe bibaalaa nɔ, Imna ne Isva ne Isvi dɛ Bɛrea. Sera ɡee jaa dɛ ɛ bihaah. Bɛrea ɡe bibaalaa nɔ, Heba ne Malkeɛl.

¹⁸ A ɡɛ bibaala fi dɛ banumɛl nɔɔ Silpa waa ɛ Lea tolo la lolɛ ba ɛ o ne Jekɔb naanar. Onee Laban lawɛ tɛ o bihaah Lea tolo la.

¹⁹ Jekɔb haah Rakɛl ɡe bibaalaa nɔ, Josef ne Bɛnjamen.

²⁰ Josef aa lɔ Ijipt la, o lolɛ bibaala banɛ. Banee Manasɛ ne Efrem. Haah o ne waa lol ba la sɔne Asenat waa ɛ sɔfo Pɔtefɛra bihaah, dɛ o soɡe On. O sɔn bɛl ɡee Hɛleopɔles.

²¹ Bɛnjamen ɡe bibaalaa nɔ, Bɛla ne Bɛka ne Asbɛl ne Gɛra ne Naaman ne Ehi ne Rɔs ne Mupim ne Hupim dɛ Aad.

²² A ɡɛ bii nɔɔ Rakɛl ne Jekɔb lolɛ. Ba lɔ fi dɛ banaarɛ.

²³ Dan ɡe bibaalee nɔ, Husim.

²⁴ Naftale ɡe bibaalaa nɔ, Jaseel ne Guni ne Jesa dɛ Silem.

²⁵ A ɡɛ bibaala banuanɛ nɔɔ Bilha waa ɛ tolo Laban aa lawa tɛ o bihaah Rakɛl la lolɛ, ba ɛ Jekɔb bibaala ne naanar.

²⁶ Jekɔb naanar baa teŋɛ o nɛɛ dɛ la Ijipt la lɔ fifraanumɛl dɛ banumɛl. O bibaala haahna te ta jae.

²⁷ Josef lolɛ bibaala banɛ Ijipt. Anomanta, dɛ ba jao waa, dɛ Jekɔb ne o bii dɛ o naanar baa la Ijipt la lɔ fifraanuanɛ.

²⁸ Baa dɛ tel Ijipt la, Jekɔb tomɛ Juda ŋɔ ó la ka ŋɔ Josef be ŋɔ ó ba tɔ o sie dɛ́ kaa o ne Gosen harɛ. Baa tel bela la,

²⁹ Josef jo o kon waa do kɛŋɔ torɔɡo la bɛl bini, asɛ dɛ ka cheme o mɛɛ. Baa chema la, Josef ɡbaaro pɛl o te dɛ wi taeh.

³⁰ Belaa Jekɔb ŋɔ Josef be ŋɔ, “Taraken maa nae dɛ jemɛ kɛŋɔ he ta soɡe le nɔ, mɛɛ won sewɛ name.”

³¹ Asɛ Josef ŋɔ o dɔɔranar ne o mɛɛ lolanar baa kaa la be ŋɔ, “A chɛ kɛ ń la ka ŋɔ kooro be ŋɔ n dɔɔranar ne n mɛɛ lolanar bwa baa soɡe Keenan harɛ ta la ba n be.

³² Mɛɛ ŋɔ o bee ŋɔ he ɛ peteɡra dɛɛ nyiŋi kondɛɛra ta, anomanta, he ba he kondɛɛra ne he kwaa haa dɔa bwa ne.

³³ Dɛ Kooro baa yerɛ heya dɛ bɔɔ toma haa dɛ ɛ wa aa,

³⁴ hé nyiŋi kɛrɛdɛ dɛ́ ŋɔ o be ŋɔ haa ira bwa, kondɛɛra ta nyiŋa toma ɡboo hɛɛ ɛ ɡɛ ya naawa aa ɛa wubwa la. O no ɡɛ naa, wɛɛ ɡeloo he so Gosen harɛ bonɔ.” Dɛ Ijipt tena kii peteɡra, a waa Josef ŋɔ ba ŋɔ ɡɛ la.