Mumpar 41 - mzwDBL

Ijipt kooro deera

¹ Bene anɛ habɔɔ la, awola bɛl, Ijipt harɛ ta kooro deero, dɛ o cheɡɛ Nael Moo nyoa o harɛ ta bela,

² o na nae anuanɛ aa do bwara, dɛ le moo la ta dɛ baa chwe kpɔɡa o nyoa.

³ Belaa nae anuanɛ ane ɡe le moo la ta ba. Dɛ ate ɡwaŋrɔ dɛ doŋ dɛ ka che anɔ la jwɛh,

⁴ asɛ nae aa ɡwaŋra la lawɛ anɔ la aa do bwara la liɡli, asɛ o den har dom ta.

⁵ O berɔ chɔ dom, dɛ dee ja asɛ boyu anuanɛ sɛɡle daa beŋkpoŋ ta dɛ ta pure. A bwa ɡe mao kɛrɛdɛ.

⁶ Asɛ anfala anuanɛ ɡe berɛ sɛɡle daa la bampera. Peuwɔb bɛl tao le wee leebɔr dɛ ba chɔɡ a te, a ta wone ta pure.

⁷ Boyu aa wola wone ta pure la kpɔ anɔ la aa ta pure la liɡli, asɛ kooro la har dom ta.

⁸ Tɔ aa pera chɔɔ la, dɛ o liire chɔɡɔ, anomanta, o yerɛ dobodobo tena ne wejerema baa lɔ harɛ la ta ba o be. O taa o deera la ba be, kɛ bɛlbwa ta wone baɡle a mun.

⁹ Belaa sendoola nomoa la ŋɔ kooro be ŋɔ, “N dɛ nyin ń bol fini kɛŋɔ n ɛ wechɔɡa.

¹⁰ He baah fa di n ne paanowɔɔra nomoa nɛ, a che a ta he lawɛ yaa do dea nɛra baa dɛ daahne la nomoa dem.

¹¹ Awola bɛl, n ne paanowɔɔra nomoa la deero asɛ a mune koɡre.

¹² Dɛ ya ne Hibru te bonɔɔ bɛlee ba pɛ do dea. Dɛ o ɛ nomoa la waa dɛ daah yaa la bonɔɔ. Yaa bol ya deera la baɡlo la, o wono baɡle yaa a mun.

¹³ Gɛ waa baɡle ya deera la mun la a ɛ ɡɛ. He berɔ kpɔ n toma do n nɔn ta, asɛ dɛ kpo paanowɔɔra nomoa la.”

¹⁴ Belaa kooro tomɛ ŋɔ bá ka kpɔ Josef ba. Ba kaa lawɔ le dea warane, dɛ fonɛ o nyu ne o tampona, dɛ kpɔ laalafala doo, dɛ ba o ne kooro sie.

¹⁵ Kooro ŋɔ Josef be ŋɔ, “N deero, kɛ nomɛlbwa toole dɛ baɡ mɛ a mun, n no he waa kɛŋɔ he won deera mun baɡla.”

¹⁶ Anee Josef ŋɔ, “N naa, n laa dɛ́ baɡle deera nɔ mun. Korowiirii dɛ́ won baɡle a mun tɛɛ.”

¹⁷ Asɛ kooro ŋɔ o be ŋɔ, “N deero dɛ che Nael Moo nyoa,

¹⁸ belaa n na nae anuanɛ aa do bwara dɛ do wer, dɛ le nee la ta baa chwe kpɔɡa o nyoa.

¹⁹ A habɔɔ, nae anuanɛ ane ɡe le nee la ta ba. Dɛ a te ɡwaŋrɔ dɛ doŋ kɛrɛdɛ. N ta nae aa doŋa ɡɛ nae Ijipt harɛ nɔ ta bobɛlbwa bwa.

²⁰ Nae aa ɡwaŋra dɛ doŋ la kpɔ nae anuanɛ aa do bwara dɛ tɔ sie le la liɡli.

²¹ Aa lawɛ a bala la liɡli tonɛ la, aa jemɛ kɛŋɔ a di kwaane kwara. Dɛ a ta doŋo ɡɛ aa doa la. N den har dom ta.

²² N berɔ chɔ dom dɛ dee ja, asɛ boyu anuanɛ sɛɡle daa beŋkpoŋ ta dɛ ta pure, a bwa ɡe mao kɛrɛdɛ.

²³ Asɛ anfala anuanɛ ɡe berɛ sɛɡle daa la bampera. Peuwɔb bɛl tao le wee leebɔr dɛ ba chɔɡ a te, a ta wone ta pure.

²⁴ Anɔ la aa wola wone ta pure la kpɔ anuanɛ aa ta pure la liɡli. Maa taara baɡle dobodobo tena la, bɛlbwa ta wone baɡ mɛ a mun.”

²⁵ Belaa Josef ŋɔ Ijipt kooro be ŋɔ, “N naa kooro, he deera anɛ la bwa dɛ baɡle webeŋkpoŋ. Korowii ɡelɔ he na waa waa dɛ ba ɛɛ.

²⁶ Nae anuanɛ aa do bwara la cheɡɔ tɛ bene anuanɛ, asɛ boyu anuanɛ aa ta pure kɛrɛdɛ la ɡe che tɛ bene anuanɛ. Webeŋkpoŋii a bwa ɛɛ baɡle.

²⁷ Asɛ naɡwaŋre anuanɛ aa doŋa dɛ ka mun le nee la ta ba la, ne boyu waa sɛɡla anuanɛ peuwɔb le wee leebɔr ba chɔɡa a ta wone ta pure la, ɡe cheɡɔ tɛ kɛŋɔ lɔr ɛɛ bao bene anuanɛ.

²⁸ N naa kooro, ɡɛ n fa aa bol he be la, waa Korowii aa dɛ nyin ɛɛ laanee o ɡel he na la.

²⁹ Kondikwa ɛɛ ba Ijipt harɛ nɔ ta bobɛlbwaa taeh bene anuanɛ.

³⁰ A habɔɔ la, lɔr ɛɛ chiɡ harɛ nɔ taa bene anuanɛ, ásɛ nɛn soh kɛŋɔ kondikwaa fa balɔ ka. Dɛkalkɛ lɔr la ɛɛ chɔɡ harɛ nɔɔ.

³¹ Lɔr la kpeɡri waa dɛ ba doe harɛ nɔ ta kohona nomanta, nɛn dɛ ba soeh kɛŋɔ kondikwaa fa lɔ harɛ nɔ ta taeh.

³² He deera bele anɛ la dɛ baɡle kɛŋɔ Korowii ɡbaɡbaa ɛa ɡɛ, kɛ waa ɡel a biɡri ásɛ a chiɡ.

³³ Anomanta, n naa kooro, nyin nɛn waa ɛ wejereme dɛɛ no waa mun, dɛ́ kpɔ Ijipt harɛ nɔ do o nɔn ta.

³⁴ A chɛ kɛ he nyin nomonome bane ɡe, ba nyiŋi dɛɛ lɛ kondikwaare bene anuanɛ la ta, ɡɛ saŋ kondikwa aa ba warɛ harɛ nɔ ta kohona la. Bá bɔne a bini bɔre anue dɛ́ lɛ bɔrbeŋkpoŋ.

³⁵ Gel ba lɛ boyu a ɡɛ bene la ta bwɛjena ta cheɡ he sɔn ta.

³⁶ Anee dɛ́ ba ɛ kondikwa bene anuanɛ lɔr waa dɛ ba bala harɛ nɔ ta la. Ásɛ lɔr bɛ harɛ nɔ ba chɔɡ.”

³⁷ Kooro ne o nomonome bwa sɛh ɡɛ waa la ta.

³⁸ Asɛ kooro ŋɔ o nomonome la be ŋɔ, “Dɛ Josef laa, nomɛlbwa toole, o nɛɛ Korowii Doma so, onee dɛ́ won nyiŋi kondikwaa nɔ ta.”

³⁹ Belaa kooro ŋɔ Josef be ŋɔ, “Korowiirii baɡle anɔ bwa, anomanta, ya bwa nao kɛŋɔ he dɔ wejema dɛɛ no waa mun dɛ ɡwaa nomɛlbwa.

⁴⁰ Mɛɛ kpɔe he chɔ n harɛ nɔ bwa nyoa, ásɛ nomɛlbwa ɛɛ teŋɛ he waa ta. Kora nɔ ɡbo taa n ɡwaale.”

⁴¹ Dɛ ŋɔ Josef be ŋɔ, “N kpɔ Ijipt harɛ nɔ bwa do he nɔn ta.”

⁴² Kooro laa o noniseɡ o nyanyini kon aa dawɛ o ta la foo do Josef, dɛ kpɔ yapondɛɛɡe batakaare ɡe doo, dɛ kpɔ suuɡaswɛm jɔɡrɔre baŋa kwaa ɡe do o baŋa.

⁴³ O ɡelɔ o so o koo kon waa do kɛ torɔɡo bini, asɛ nɛra tɔ o sie dɛɛ ŋɔ, “Hé tɛ ŋwɛnɛ! Hé tɛ ŋwɛnɛ!” Gɛɛ a do ba kpɔ Josef cheɡ ŋɔ wɛɛ nyiŋi Ijipt harɛ la bwa ta.

⁴⁴ Asɛ kooro la ŋɔ o be ŋɔ, “Menee kooro te, kɛ nomɛlbwa ta ŋwɛnɛ dɔe kɛ o ɛ wobɛlbwa dɛ le he habɔɔ.”

⁴⁵ O kpɔ Ijipt harɛ sɔn pao ŋɔ baa yerɔ Safenat Panea, dɛ mo haah ɡe tɛo. O haah la sɔne Asenat. Sɔfo Pɔtefɛra bihaahnee. Dɛ sɔfo nɔ soɡe bwɛjen On, o sɔn bɛl ɡee Hɛleopɔles. Asɛ Josef ka ɡaaɡe Ijipt harɛ ta bwa.

⁴⁶ Josef di bene fifraatoro mɔɔ dɛ pa kooro toma la mun.

⁴⁷ Bene anuanɛ kondikwa aa ɛa kohona la, koo kwaa ɛo kohona harɛ la ta,

⁴⁸ asɛ Josef ɡel ba boa kondikwaa aa bala bene anuanɛ la ta la nyoa cheɡ bwɛjena ta. Bwɛɛre aa bar bwɛjen bɛlbwa kondikwaa la, ba dɛ cheɡa bwɛjen la ta.

⁴⁹ Josef ɡelɔ ba lɛ kondikwaa cheɡ a warɛ kɛŋɔ mpo nyoa hɛŋle ken, anomanta, o berɔ ɡel a maɡa.

⁵⁰ Sɔfo Pɔtefɛra waa le bwɛjen On bihaah Asenat lolɛ bibaala banɛ tɛ Josef mɔɔ lɔrchɔɡe la ba.

⁵¹ Josef pa o binomoa la sɔn Manasɛ. O munii Korowii ɡelɔ n soh n wenaale ne n mɛɛ lolanar bwa wa.

⁵² O pa binɛɛte la ɡe sɔn Efrem. O munii Korowii tɛ mɛ bii harɛ maa na wahala o ta la ta.

⁵³ Bene anuanɛ kondikwaa aa bu Ijipt harɛ ta la ba a jaɡa,

⁵⁴ asɛ bene anuanɛ lɔr Josef aa bol o waa la ɡe pa mun. Lɔr chole harɛre bwa ta, kɛ dɛ kondikwaa bu Ijipt te.

⁵⁵ Lɔr aa baa pa mun Ijipt harɛ ta bwa ɡe la, bela tena wio no kooro la ŋɔ ó tɛɛ ba kondikwa. Asɛ o ŋɔ bá la Josef be, ásɛ ɡɛ bwa waa ŋɔ la, bá ɛ.

⁵⁶ Lɔr la aa chole Ijipt harɛ la ta o nyoa do kpeɡri la, Josef ɡelɔ ba pili deene baa kwaa boyu cheɡ a bini la bwa, dɛ yoɡ dɛɛ tɛ Ijipt tena.

⁵⁷ Nɛra le harɛre ta dɛ la Josef be Ijipt harɛ, dɛ kaa yawɛ boyu, dɛkalkɛ dɛ lɔr la nyoa kpeɡri bobɛlbwa.