Mumpar 40 - mzwDBL

Ijipt kooro sendoo ne paanowɔɔ wa

¹ A ɡɛ waa nɔ habɔɔ la, nɛn waa dɛ do Ijipt kooro sen, ne paanowɔɔra nomoa bwa ɛ kooro wechɔɡa.

² Kooro la baah di a ɡɛ nomonome banɛ nɔ nɛɛ kɛrɛdɛ,

³ asɛ dɛ laɡ ba do dea. Nomoa waa chɔ nɛra baa dɛ daah kooro dem la, o deemii o kpɔ ba do. A ɡɛ dea la binii ba lawɛ Josef ɡe do.

⁴ Ba chɔ bela biɡri, asɛ nomoa la kpɔ wobɛlbwa do Josef nɔn ta wɛɛ nyiŋi ba nɛ.

⁵ Jwaana bɛl baa chɔ dea la bini la, kooro nomonome la deero. Bɛlbwa deera waa deera la ɡe korɔ.

⁶ Tɔ aa pera chɔɔ la Josef ba ba be, waa baa na ba la, o nao kɛŋɔ ba liire chɔɡɔ.

⁷ Asɛ o bɔɔ ba ŋɔ, “Ɛrɛɛ he so sum ne ɡɛ nɔɔ?”

⁸ Anee ba chaŋe ŋɔ, “Ya deero, kɛ bɛlbwa deera waa deera la ɡe korɔ, ya ta nomɛlbwa dɔe ó baɡle yaa a mun bonɔ yaa lole nɔ.” Ate Josef ŋɔ, “Korowiirii dɛɛ tɛ nɛn wejema ó won baɡle nɛn deera mun. Hé baɡle ásɛ n no.”

⁹ Belaa sendoola nomoa la baɡle o deera la dɛ ŋɔ, “N deera la ta la, n na daa baa kpɔ o nɔna dɛɛ ɛ sen la kɛ waa cheɡɛ n sie,

¹⁰ asɛ kpala atoro do o ta. Waa moɡɛ papooni la, dɛ fee ɡe deno do a ta. Dɛ nɔna ba a ta a den be ɡe.

¹¹ Dɛ n kpoŋe kooro numol dɛ harame daa la nɔna nee dɛɛ do o bini dɛ́ kpɔ tɛo.”

¹² Anee Josef ŋɔ o be ŋɔ, “Kenii he deera la mun ɛɛ baɡle. Daa kpala atoro la cheɡɔɔ tɛ tɔpera atoro.

¹³ Tɔpetooro wee la, kooro ɛɛ lee dɛ́ berɛ kaa he ne he tombena ta. Ásɛ he kpɔ kooro numol do o nɔn ta kɛŋɔ he fa aa dɛ doo sen la.

¹⁴ Kɛ dɛ wobɛlbwa ba dɛ kaa kɛrɛdɛ dɛɛ tɛɛ naa, lii n wa. Berɛ takapɔ na n sum, dɛ́ bol n waa baɡle kooro, ásɛ o lee mɛ dea maa chɔa nɔ.

¹⁵ Kpeɡri nee ba kpɔ mɛ le Hibru tena harɛ ta, dɛ ba n ne Ijipt bonɔ. Maa lɔ bonɔ ɡe nɔ, n ta waa maa ɛa a chɛ kɛ ba do mɛ dea nae.”

¹⁶ Paanowɔɔra nomoa la aa noa kɛŋɔ Josef wono baɡle o dɔŋ la deera la mun tɛo a do som la, o bol o be ŋɔ, “N ɡe deero dɛ che paanoo wɛɡrɛre atoro.

¹⁷ Dɛ paanoo bwa soo siwi aa ɛ Ijipt kooro kwaa su wɛɡrɛ waa chɔŋɛ nyundua tenten la bini, asɛ jumbii ɛɛ dia.”

¹⁸ Belaa Josef chaŋe dɛ ŋɔ, “Kenii he deera la mun ɛɛ baɡle. Wɛɡrɛre atoro la cheɡɔɔ tɛ tɔpera atoro.

¹⁹ Tɔpetooro wee la, kooro ɛɛ teŋe he nyuu, dɛ́ kpɔe ka saɡɛ daa ta, ásɛ jumbii ba di he ola.”

²⁰ A habɔɔ tɔpetooro wee la, kooro la dɛ di o lola tɔpere, asɛ dɛ yerɛ o nomonome bwa. O le o sendoola nomoa la ne paanowɔɔra nomoa la, dɛ kpɔ ba ba o nɛra la sie.

²¹ O berɛ sendoola nomoa la toma tɛo

²² asɛ dɛ teŋe paanowɔɔra nomoa la nyu ɡɛ Josef aa bola la.

²³ Kɛ sendoola nomoa la aa bera kaa o toma ta kooro dem la, o soh wobɛlbwa. O ta wone lii Josef waa tamaa bɛlbwa.