Mumpar 4 - mzwDBL

Keen ne Ebel wa

¹ Adam la o haah Hawa be, asɛ o kpoŋe tea dɛ lolɛ bie, asɛ haah la lii o nyu bini ŋɔ, “Korowii alaworomɛ, n dɔ bibaa, dɛ pa o sɔn Keen.”

² A habɔɔ, o lolɛ bɛl ɡe dɛ pa o sɔn Ebel. Ebel aa kpeɡa la, dɛ peeraa wɛɛ dɛɛ asɛ Keen ɡe ɛ paa.

³ A habɔɔ la, Keen kpɔ o koo kondikwa ane ba, dɛ ba ɛ saraha tɛ Korowii.

⁴ Asɛ Ebel ɡe nyiŋi o peera la bini dɛ lawɛ a biloɡla la dɛ kpoora, asɛ dɛ kpɔ a bodɛɛɡa bɔra la ka ɛ saraha tɛ Korowii. Korowii sie lɛ saraha Ebel aa baa ɛ tɛo la ta taeh,

⁵ kɛ o vɛh Keen ne kwaa waa kpɔa ba ɛ saraha tɛo la. Belaa Keen baah di asɛ o ŋweh.

⁶ Anee Korowii bɔɔro ŋɔ, “Ɛrɛɛ he baah di he ŋweh ɡɛ nɔɔ?

⁷ Wedɛɛɡaa he ɛa, he sie ɛɛ lɛo. Kɛ haa ɛ anɔ la aa wola were la nomanta, wechɔɡa dɛ yoi. Kɛ a chɛ kɛŋɔ hé won le a ta.”

⁸ Belaa Keen ŋɔ o nime Ebel be ŋɔ bá la koo. Baa lɔ bela la, Ebel ne ŋɔ o jemɛ dɛ Keen lawɔ asɛ dɛ kpoo.

⁹ Belaa Korowii bɔɔ Keen ŋɔ, “Leperaa Ebel dɔɔ?” Anee Keen ŋɔ, “N nɔn ta laa n nime do mɛɛ nyiŋi o nɛ. Maa jemɛ bela waa lole.”

¹⁰ Asɛ Korowii berɛ ŋɔ, “Ɛrɛɛ he ɛ waa aa do ken nɔɔ? He nime chal aa le harɛ la ta la dɛ baɡle kɛŋɔ he ɛ wechɔɡa a chɛ kɛŋɔ ń bɔe a kem.

¹¹ N taahne, dɛ doŋi le harɛ nɔ ta, haa won parɛ o ta kpa, he nime haa kpoo la nomanta.

¹² He paraa, he kondikwa aa ɛɛ ba. Haa soŋnibɔr ɡee dɔ. Gaaɡa ɡboo hɛɛ ba dɛɛ ɡaaɡa.”

¹³ Anee Keen ŋɔ Korowii be ŋɔ, “N wechɔɡa maa ɛa nɔ kembɔr ɡwaa n nɛɛ kohona to.

¹⁴ Na, he doŋ mɛ le he sie ne para ta. Taraken nɔ, maa soŋnibɔree dɔ harɛ nɔ ta bobɛlbwa kpa. Gaaɡa ɡboo mɛɛ ba mɛɛ ɡaaɡe, ásɛ nomɛlbwa waa na mɛ la, ó kpo mɛ.”

¹⁵ Anee Korowii ŋɔ, “Gɛ laa, nomɛlbwa waa kpoe la, wɛɛ dɔ he wechɔɡa nɔ kembɔr nɔ bele anuanɛɛ.” Asɛ Korowii do Keen dema, ásɛ a baɡle kɛŋɔ Korowii bɛ on kpo.

¹⁶ Belaa Keen le Korowii sie, dɛ ka so harɛ bɛl waa lɔ Eden wee leebɔr bobɛl baa dɛ yerɔ Nɔd.

Keen naanar wa

¹⁷ A habɔɔ, Keen ne o haah kpoŋe tea dɛ lolɛ bibaa dɛ pa o sɔn Enɔk, asɛ dɛ vɔrɔwe bwɛjen dɛ kpɔ bie la sɔn pao.

¹⁸ Enɔk ɡe aa kpeɡa la, o lolɛ bie dɛ pa o sɔn Irad. Irad aa baa kpeɡ la, o lolɛ Mahujael. Asɛ Mahujael ɡe aa ira la, o lolɛ Metusael. Asɛ Metusael ɡe aa baa kpeɡ la, o lolɛ Lamɛk.

¹⁹ Asɛ Lamɛk aa baa ir la, o mo haahna banɛ. Bɛl sɔne Ada asɛ nɛɛte la ɡe sɔne Siila.

²⁰ Ada bie waa lolɔ sɔne Jabal. Onee nɛra baa tɔ sie dɛ yon so tɛnte deene bini dɛɛ nyiŋi kondɛɛra ta bwa naa.

²¹ A habɔɔ la, Ada berɔ lolɛ bibaa, o sɔne Jubal. Onee nɛra baa tɔ sie kwaa bɛle ne janjelare la bwa naa.

²² Siila ɡe lolɛ bibaa, dɛ pa o sɔn Tubal Keen. Onee ira dɛ pa mun loɡɛ. Siila berɔ lolɛ bihaah, dɛ pa o sɔn Naama.

²³ Awola bɛl, Lamɛk ŋɔ o haahna la be ŋɔ, “Ada ne Siila, hé cheɡ deŋne no n waa nɔ. N haahna, hé no n be! Bonɔɔ bɛl do mɛ bol, asɛ n kpoo.

²⁴ Dɛ nɛn kpo Keen, wɛɛ dɔ o wechɔɡa kembɔr bele anuanɛɛ yaa, nomɛlbwa waa kpo mɛ la, wɛɛ dɔ n wechɔɡa kembɔr dɔŋa bele fifraanuanɛ dɛ anuanɛɛ.”

Sɛt ne Enɔs wa

²⁵ Adam ne o haah berɔ lolɛ bibaa. Anee o haah ŋɔ, “Korowii tɛ mɛ bie o ba chiɡ Ebel, Keen aa kpoo la naa ta.” Anomanta, o pa o sɔn Sɛt.

²⁶ Sɛt ɡe aa baa ir la, o lolɛ bibaa dɛ pa o sɔn Enɔs. Le a ɡɛ saŋee nɛwɛnyina pa mun dɛɛ yerɛ Korowii sɔn dɛɛ tomɔ.