Mumpar 39 - mzwDBL

Josef ne Pɔtefa haah wa

¹ Ismael tena la kpɔ Josef kaa Ijipt, dɛ ka yoɡu tɛ Pɔtefa waa ɛ Ijipt kooro nɛra baa dɛ daahno la nomonome la bɛl.

² Korowii teŋɛ Josef nɛ, anomanta, o ɡelɔ o wobɛlbwa do wer tɛo asɛ o so nomoa la dem.

³ O nomoa la ɡe nao kɛŋɔ Korowii teŋɛ o nɛ dɛ ɡel o wobɛlbwa do wer tɛo.

⁴ Anomanta, Pɔtefa sie lɛ o nɛ asɛ dɛ kpɔɔ ɛ o bonɔɔ, dɛ ɡel wɛɛ nyiŋi o dem ne o komɛlbwa waa dɔa ta.

⁵ Dɛ le a ɡɛ saŋ nomoa la aa kpɔ o dem do o nɔn ta la, Korowii swee andɛɛɡa tɛ nomoa la ne o dem komɛlbwa dɛ o koo kwa.

⁶ Pɔtefa kpɔ komɛlbwa do o nɔn ta dɛ laa liire kpɔ a ta. Kwaa waa dɛ lii a waa kondikwa waa di ɡbo. Dɛ Josef mao kɛrɛdɛ dɛ do wer bonɔɔ ɡe.

⁷ Aa ba dɛ la sie la, Pɔtefa haah pɛla lawɛ Josef dɛ ŋɔ o ne o chɔ.

⁸ Kɛ Josef ta sɛɛh, asɛ dɛ ŋɔ o nomoa haah la be ŋɔ, “N dɔɔ aa dɛ yarada mɛ kohona nomanta, o kpɔ komɛlbwa waa lɔ o dem bonɔ, ne o komɛlbwa waa dɔa do n nɔn ta, waa wola a waa lii kpa.

⁹ Nomɛlbwa toole dɛ dɔ kpeɡri n nɛɛ dem bonɔ nemenɛ on. O ta komɛlbwa ɡe waa lɔ dem bonɔ kpɔe sɔɔh mɛ, nemenɛ he ɡbosoroo dɛkalkɛ o haahnee hen. Ɛrɛɛ mɛɛ ba wona ɛ a ɡɛ wechɔɡa nɔ dɔŋa dɛ́ jo Korowii nɛɔ?”

¹⁰ Dɛ tɔperee bwaa o swe dɛɛ marɛ Josef nɛɛ ŋɔ o ne o chɔ asɛ o yon vɛh, hale waa o jwɛɛh kwaraa la.

¹¹ Awola bɛl, Josef lɔ dem bela dɛɛ ɛ o toma. Dɛ dem bela bonɔɔna la bɛlbwa toole.

¹² Belaa haah la ta lawɛ o yal kpoŋe dɛ ŋɔ, “Gel n ne he chɔ.” O ta sɛɛh, dɛ yo lɛ o te dɛ chwa le buse, asɛ a ka o yal la do haah la nɔn ta.

¹³ Haah la aa naa kɛŋɔ o ɡel o yal la do o nɔn ta kaa la,

¹⁴ o yerɛ bonɔɔna baa lɔ dem bela la dɛ ŋɔ, “Hé no waa nɔ. Hibru te nɔ n jaa aa kaa lawɛ ba dem bonɔ nɔ dɛ ɛ yaa sisawa. O baa jo n be dea ŋɔ o fee paɡ mɛ, asɛ n do lɔŋɔ kohona.

¹⁵ Maa dɛ dooɡe lɔŋɔre ɡɛ la, o chwao le a ka o yal chɔ n jwɛh.”

¹⁶ Haah la kpɔ yal la cheɡ, dɛ ka tel kɛŋɔ Pɔtefa aa bala.

¹⁷ Belaa o bol waa la o be dɛ ŋɔ, “Hibru te bonɔɔ haa ba o ne dem bonɔ la ba n be dea dɛ ba ɛɛ mɛ chɔɡa wa.

¹⁸ Kɛ maa do lɔŋɔ la, o chwao le buse warane dɛ ɡel o yal.”

¹⁹ Pɔtefa aa no ɡɛ la, o baah diu

²⁰ dɛ ɡel ba ka lawɛ Josef ba do dea, bela kooro aa lawɛ nɛra dɛɛ do la, asɛ o chɔ bela.

²¹ Kɛ Korowii teŋɛ o nɛ, dɛ tɛo jirima dɛ ɛo kɛrɛdɛ, dɛ ɡel nomoa waa dɛ nyiŋi ba nɛɛ dea bela la sie lɛ o nɛ.

²² Anomanta, o kpɔɔ ɛ o bala baa do ba dea la bwa nomoa, asɛ wɛɛ nyiŋi ba wobɛlbwa baa dɛ ɛa bela ta.

²³ Korowii aa dɛ nyin Josef waa dɛɛ nyin kɛ o wobɛlbwa do wer tɛo la nomanta, o ɡelɔ nomoa waa dɛ nyiŋi ba nɛɛ la laa o sie kpɔ waa Josef aa chɔ a nyoa la ta.