Mumpar 38 - mzwDBL

Juda ne Taama

¹ A ɡɛ saŋ la, Juda ɡel o bala la, dɛ ka so Hira be, bwɛɛ Adulam ta.

² Waa kaa so bela la, o na bihaah bɛl dɛ moo, o mɛɛ ɛ Keenan te baa yerɔ Sua.

³ Juda ne haah la kpoŋe tea dɛ lolɛ bibaa baa yerɔ Ɛr.

⁴ A habɔɔ, o ne o kpoŋe tea ja dɛ lolɛ bibaa baa yerɔ Onan.

⁵ O berɔ lolɛ bibaa ja, asɛ dɛ pa o sɔn Seela. Gɛ saŋ baa lolɔ la, dɛ ba soɡe bwɛɛ bɛl baa dɛ yerɔ Kesib.

⁶ Baa lɔ bela la, Juda mo haah tɛ o binomoa Ɛr. Haah la sɔne Taama.

⁷ Dɛ Ɛr ɛ wechɔɡ-ɛɛ Korowii be, asɛ Korowii kpoo.

⁸ Anee Juda ŋɔ Onan be ŋɔ, “Kpɔ he dɔɔ haah mo, dɛ́ lolɛ bii tɛo o mun bɛ he.”

⁹ Dɛ Onan jemɔ kɛŋɔ a ɡɛ bii la aa won ɛ o kwa, anomanta, o ne haah la chɔɔ waa, o bane aa dɛ ba la, ɡɛɛ o ɡel a ba ta harɛ, ásɛ o bɛ won kpoŋe tea, dɛ́ lolɛ bii ba ɛ o dɔɔ kwa.

¹⁰ Korowii be la, dɛ a ɡɛ liire nɔ ɛ wechɔɡa, asɛ dɛ kpo o ɡe.

¹¹ Belaa Juda ŋɔ o hela Taama be ŋɔ, “Kaa ka so doŋa ta he mɛɛ dem, dɛ́ ka tel kɛŋɔ n bie Seela aa baa kpeɡ.” O liiro kɛŋɔ o ɡe ken ɛɛ ba sewɔɔ kɛŋɔ o dɔɔranar. Asɛ haah la kaa o mɛɛ dem dɛ ka so.

¹² Aa baa la sie la, Juda haah sewɔ. Waa baa dɔ bolarawa tonɛ la, o ne o dam Hira waa le Adulam la Temna, bela baa dɛ fonɛ o peera pona.

¹³ Belaa nomɛl ŋɔ Taama be ŋɔ, “He helabaa dɛ ba ba kaa Temna dɛ ka fonɛ o peera pona.”

¹⁴ Asɛ o foo o laala waa doa so doŋa ta la bil, dɛ kpɔ kon waa chaahna bɔle nyu, dɛ ka so bwɛɛ Enaem doonyoa, Temna ŋwɛnɛ ta. Dɛkalkɛ dɛ o nao kɛŋɔ Seela kpeɡo, asɛ ba ɡe ta on kpɔe tɛo ŋɔ o yalɔ.

¹⁵ Juda aa fɛra baa kaa Timna la, o nao kɛŋɔ waa kpɔ kon bɔle o nyu dɛ so, dɛ liiru hanjwamane bɛl.

¹⁶ Belaa o pere kpɔ o be dɛ ŋɔ, “Gel n ne he ka chɔ,” Dɛ waa jemɛ kɛŋɔ o hela Taamaa. Anee o chaŋe ŋɔ, “Aah bɔkwaa hɛɛ ba n tɛɛ mɔɔ n ne he chɔɔ?”

¹⁷ Asɛ Juda ŋɔ, “Mɛɛ ɡeloo ba lawɛ bombie ba tɛɛ.” Anee haah la ŋɔ, “Bɔkwaa hɛɛ ba kpɔe tɛ mɛ ń cheɡ ka tel saŋ haa ba o ne nɔ?”

¹⁸ Anee Juda ɡe bɔɔro ŋɔ, “Bɔkwa konee hɛɛ nyin kɛŋɔ n kpɔ tɛɛ he cheɡ ɔ?” O ŋɔ, “He noniseɡ he sɔn aa dawɛ o ta ne he daŋɡbala.” Ate, o kpɔa tɛo mɔɔ o ne o ta chɔ, asɛ o kpoŋe tea.

¹⁹ Baa chɔa tonɛ la, haah la iro dɛ ka laa kon waa kpɔa bɔle o nyu la kpɔ bil, dɛ kpɔ laala waa kpɔa so doŋa ta la do.

²⁰ Juda aa kaala la, o kaa kpɔ bombie la tomɛ o dam Hira waa ɛ Adulam te la ŋɔ, ó kpɔ ba tɛ haah la dɛ́ lɛ kwaa waa kpɔa tɛo o cheɡ la ba. Waa laŋa la, o ta haah la ka pue bela.

²¹ O kaa pu baala bane bela asɛ dɛ bɔɔ ba ŋɔ, “Leperaa hanjwamane bɛl o fa aa soɡe Enaem doonyoa bonɔ la dɔɔ?” Asɛ ba chaŋo ŋɔ, “Hanjwamane bɛlbwa toole bonɔ.”

²² Asɛ o berɛ la Juda be dɛ ka ŋɔ, “Maa laŋa la, n ta on nae, asɛ dɛ bɔɔ baala bane baa lɔ bela o wa, ba ɡe ŋɔ hanjwamane bɛlbwa toole bela.”

²³ Belaa Juda chaŋe ŋɔ, “Gel laala la do o be. Ya bɛ a waa ta teŋɛ nɛra ba na dɛ mamɛ yaa. N lawɛ bombie tɛɛ ŋɔ he ka tɛo he ta on pue yaa, anee ɡɛ.”

²⁴ Dɛ ɛ korobie atoro habɔɔ nomɛl ba ŋɔ Juda be ŋɔ, “He helahaah kaa bɔ jwamane dɛ kpoŋe tea.” Belaa o ŋɔ, “He lawɔ le dɛ́ ka fuuh!”

²⁵ Baa lawɔ dɛɛ le la, anee o ŋɔ bá ka ŋɔ o helabaa Juda be ŋɔ, “Naate waa dɔ a ɡɛ noniseɡ ne daŋɡbala nɔ laanee do mɛ tea la.” Dɛ berɛ ŋɔ ba nyiŋi kwaa la dɛ́ na naate aa ɛ o kwa.

²⁶ Juda ɡe nao kɛŋɔ onee, asɛ dɛ ŋɔ, “Haah la waa toɡrɔ ɡwaa mɛ. N na n wechɔɡa maa ɛa kɛŋɔ maa wola ɡelɛ o yalɛ n bibaa Seela la.” A habɔɔ la, o ta o be laŋɛ kpa.

²⁷ Loltea aa baa lɔɔ la, ba jemɔ kɛŋɔ kparaa wɛɛ ba lola.

²⁸ Waa dɛ ba lola la, bii la bɛl tɔ sie kpɔ o nɔn le, asɛ haah waa dɛ lɛo lol la kpɔ jiseswɛm vɔwɛ o nɔn la ta dɛ ŋɔ “Onɔɔ tɔ sie.”

²⁹ Waa kpɔ jiseswɛm la vɔwɛ o nɔn tonɛ la, bie la berɔ kpɔ jo, asɛ nɛɛte la berɛ tɔ sie ba. Asɛ haah waa dɛ lɛo lol la ŋɔ, “Amɔ ŋwɛnɛ haa kpɔ o ta dɛ ba laanee nɔ kenɛ?” Asɛ o pa o sɔn Pɛrɛs.

³⁰ Dɛ berɛ lolɛ onɔ la jiseswɛm aa vɔwɛ o nɔn la. Asɛ ba pa o sɔn Sɛra.