Mumpar 37 - mzwDBL

Josef ne o dɔɔranar wa

¹ Jekɔb soɡe Keenan harɛ ta, bela o mɛɛ fa aa soɡa la.

² Kenii o bii ne o naanar waa do, Jekɔb bie Josef aa di bene fi dɛ anuanɛ la, dɛ o ne o dɔɔranar dɛ nyiŋi kondɛɛra ta. O mɛɛ haahna banɛ baa dɛ yer ba Bilha ne Silpa la biirii ban. Josef yon ba taa dichɔɡa o dɔɔranar aa dɛ di o mɛɛ be.

³ Dɛ Josef ɛ Jekɔb banjenbie, anomanta, dɛ o dɛ nyin o waa ɡwaa o bii la bwa. Asɛ o nyarɛ batakaarejaŋ ondɛɛɡe bɛl baa di ɡwini dawɛ o ta tɛo.

⁴ O dɔɔranar aa baa na kɛŋɔ o mɛɛ dɛ nyin o waa dɛ ɡwaa ba la, ba haoh, baa on sie tɛ kwaraa.

⁵ Awola jwaana bɛl Jekɔb deero dɛ taa baɡle o dɔɔranar. A taa ba haoh kohona kwara.

⁶ O ŋɔ ba be ŋɔ, “Hé cheɡ deŋne dɛ́ no n deera nɔ.

⁷ Ya dɛ vɔwɛ jaaɡe koo ta, asɛ bɛlbwa bil o kwaa dɛɛ korɛ. Belaa n kwaa maa vɔwa la ir che, asɛ he kwaa la ba bar n kwaa la cheme dɛɛ ɡuŋa.”

⁸ Asɛ o dɔɔranar la bɔɔro ŋɔ, “Amɔ he dɛ lii kɛ he dɛ ba bá di kora dɛ́ nyiŋi ya nɛɛ kɛɛ?” Belaa o haeh la berɛ ɡwaa kohona kwara.

⁹ O berɔ dee anfala ja dɛ taa baɡle o dɔɔranar la ŋɔ, “Hé no, n deero asɛ wee ne korobie dɛ weweela fi dɛ beŋkpoŋ ɛɛ ɡuŋ mɛ.”

¹⁰ Josef aa taa ɡɛ waa nɔ o mɛɛ ne o dɔɔranar be la, o mɛɛ kaoh dɛ ŋɔ, “Bɔkwa ɡe deeraa do ken? Amɔ n ne he nya ne he dɔɔranar ɛɛ bao dɛ́ ba ɡuŋi kɛɛ?”

¹¹ Ate, o dɔɔranar la bwaawee ir o nɛɛ kɛrɛdɛ, kɛ o mɛɛ te kpɔ waa la do o nyu bini.

Josef dɔɔranar yoɡu

¹² Awola bɛl, o dɔɔranar la kpɔ o mɛɛ kondɛɛra la kaa dibɔr Sɛkem pera,

¹³ asɛ Jekɔb ŋɔ Josef be ŋɔ, “He dɔɔranar kpɔ kondɛɛra kaa dibɔr Sɛkem pera, n dɛ́ tomɛ ba be.” Asɛ o chaŋe ŋɔ, “N mɛɛ, mɛɛ lao.”

¹⁴ O mɛɛ ŋɔ o be ŋɔ, “La dɛ́ ka na he dɔɔranar ne ɡɛ kondɛɛra la aa doa, ásɛ dɛ ba bol n be.” O tomɔ le Hɛbrɔn Fɛlembɔjen bɔr pera dɛ kaa Sɛkem.

¹⁵ Waa le Sɛkem dɛ kaa ɡaaɡe ba bɔr la, baa bɛl nao kɛŋɔ waa lɔ kpɔɡ bini bela dɛɛ ɡaaɡe. Asɛ dɛ bɔɔro ŋɔ, “Bɔkwaa hɛɛ nyin bonɔ nɔ?”

¹⁶ Asɛ o chaŋo ŋɔ, “N dɔɔranar ne ba kondɛɛra bɔree mɛɛ ɡaaɡe. N poori, hɛɛ won chaɡ mɛ bela baa lole naa?”

¹⁷ Baa la chaŋo ŋɔ, “Ba le bonɔ. N noɔ kɛŋɔ baa dɛ bol dɔŋa be ŋɔ ba kaa Dotan.” Anomanta, o ti o dɔɔranar la dɛ ka na ba Dotan bela.

¹⁸ Waa dɛ tel bela la, o dɔɔranar la te tɔ sie nao kɛŋɔ o taa lɔ bojaŋ. O ne bela tela la, dɛ ba te vɔrɔwɔ tonɛ kɛŋɔ ba kpoo.

¹⁹ Ba ŋɔ dɔŋa be ŋɔ, “Deera te laanee ka dɛ ba la.

²⁰ Hé ba ya kpoo, dɛ́ kpɔɔ ta kɔlɔŋ nɔ bɛl nee aa wola toole o bini nɔ bini, dɛ́ ka ŋɔ olchɔɡe bɛl lawɔ chwe, dɛ́ na ɡɛ o deera waa deera la aa dɛ ba chiɡa.”

²¹ Rubin takapɔ kɛŋɔ o fee lɛo ta, dɛ ŋɔ, “He bɛ ɡel ya kpoo.”

²² Dɛ berɛ ŋɔ, “He bɛ on kpo. Hé kpɔɔ ta kɔlɔŋ nɔ bɛl bini.” Gɛ aa ɛ o won lɛo le ba nɔn ta, dɛ́ kpɔɔ ka tɛ ba mɛɛ la waa o bol ɡɛ.

²³ Josef aa tel o dɔɔranar la be la, ba laa o batakaarejaŋ ondɛɛɡe baa di ɡwini dawɛ o ta la wur,

²⁴ dɛ kpɔɔ ka ta kɔlɔŋ la bini. Dɛ nee bɛlbwa toole o bini.

²⁵ Ba soɡo dɛɛ di kwa, belaa ba ha sie nyiŋi, dɛ na Ismael bonadiire ne ba nyoɡmare aa cheɡɛ konsɔɔhsoma baa dɛ fuah, ne dapɛɡa ane baa dɛ ɛ ane tɛɛɡa, ne korobo le Gelead harɛ baa kaa Ijipt harɛ.

²⁶ Anee Juda ŋɔ o bala la be ŋɔ, “Dɛ ya kpo ya nime nɔ dɛ tɔ a ta naa, bɔkwa tɔnɔɔ yaa ba dɔe yɔ?

²⁷ Hé ɡel ya yoɡu tɛ Ismael tena nɔ dɛ bɛ o haakɛ lɛ, o ɛ ya nime, ya bini bɛlee.” Asɛ ba sɛh ɡɛ waa bola la ta.

²⁸ Bonadiire la aa tel ba be la, o dɔɔranar la lawɔ le kɔlɔŋ la bini, dɛ yoɡu tɛɛ ba suuɡapoŋa fifraanɛ, asɛ ba kpɔɔ kaa Ijipt harɛ ta.

²⁹ Rubin aa bera la kɔlɔŋ la ta dɛ ka na kɛŋɔ o toole bela la, asɛ o laa o batakaare kɛɛ, a baɡle kɛŋɔ o loo kuu.

³⁰ O berɔ ba o bala la be dɛ ba ŋɔ, “N nime la toole bela! Ɛrɛɛ mɛɛ ba ɛɛ yɔ?”

³¹ Anee ba kpo booh la bɛl, dɛ kpɔ Josef batakaare la mili o chal la,

³² asɛ dɛ kpɔ ka chaɡle ba mɛɛ dɛ ŋɔ, “Batakaare nɔɔ ya na, nyiŋi na kɛŋɔ he bie la kon laanee kɛɛ?”

³³ Waa nyiŋa na la, o jemɔ asɛ dɛ chaŋe ŋɔ, “N bie batakaaree kpela! Olchɔɡe bɛl lawɔ chwe, o ka toɡri o bini.”

³⁴ Belaa Jekɔb loo ku o laa o batakaare kɛɛ, dɛ kpɔ lweyal tɔ dɛ ɛ o bie la lwe dɛ la sie.

³⁵ Asɛ o bii ne o lolanar bwa ba dɛ ba larawe o bwara. Kɛ o ta larawa la noɛ dɛ ŋɔ, “N wii nɔɔ dɛ́ kpɔ mɛ kaa n bie be lalabwɛ.” Anomanta, o wi o bie la kɛrɛdɛ.

³⁶ Ismael bonadiire la ɡe yoɡ Josef tɛ Ijipt te Pɔtefa. O ɛ Ijipt harɛ ta kooro laa tena baa dɛ daah o dem la bwa nomoa.