Mumpar 34 - mzwDBL

Daena ne Sɛkem tena wa

¹ Awola bɛl, Jekɔb ne o haah Lea bihaah Daena iro ŋɔ o dɛ la ka chɔɔ Keenan haahna bane.

² Hivi tena Kooro Hamɔ bibaa Sɛkem nao dɛ lawɔ, dɛ ɡuɡru o ne o chɔ.

³ Dɛ o sie lɛ bitolo la nɛɛ kɛrɛdɛ, asɛ o bambile lawɔ wɛɛ di o deŋna.

⁴ Sɛkem ŋɔ o mɛɛ be ŋɔ, “N mɛɛ, n dɛ nyin kɛŋɔ he ka nyin Daena tɛ mɛ ń mo.”

⁵ Dɛ Jekɔb noɔ kɛŋɔ Sɛkem ɡuɡri o bihaah Daena o ne o chɔ, kɛ bela la, o ta wobɛlbwa chaŋɛ, dɛkalkɛ dɛ o bibaala la kaa nae ne dibɔr ba ta balɛ mɔɔ.

⁶ Kooro Hamɔ la Jekɔb be o ne o ka bol wa,

⁷ dɛ Jekɔb bii la ɡe denɔ le kpɔɡ bini ba. Baa baa no waa la la, a we ba nɛ, asɛ ba baah di kohona kɛŋɔ Sɛkem aa ɛ wedoŋa dɛ nyiŋi Israel tena nyubaah kɛŋɔ waa ɡuɡri ba nimambie o ne o chɔ la.

⁸ Belaa Kooro Hamɔ ŋɔ Jekɔb be ŋɔ, “N bie Sɛkem dɛ nyin he bie Daena. N poori, kpɔɔ tɛ mɛ n tɛo ó mo.

⁹ Gel ya nyoa pɛ yaa mo he bihaahna, ásɛ he ɡe ɛɛ mo ya kwa.

¹⁰ Hɛɛ won so ya be bonɔ, harɛ ɡee dena chɔ kaa la. Hɛɛ won ka so bobɛlbwa haa dɛ nyin, dɛɛ di bona dɛ́ dɔ kwa.”

¹¹ Asɛ Sɛkem ŋɔ Daena mɛɛ ne o dɔɔranar be ŋɔ, “Hɛ́ɛ sɛoh dɛ́ ɛ ɡɛ tɛ mɛ naa, komɛlbwa haa lɛ la, mɛɛ tɛ heyaa.

¹² Hé chaɡle kwaa haa ŋɔ ń kpɔ ba ɛ haah la bwara wa. Hé baɡle ɡɛ bwa haa dɛ ba lɛɛ, ásɛ n bɔ tɛ heya, he sɛoh kɛŋɔ n moo ɡbosoroo tenaa.”

¹³ Sɛkem aa ɡuɡri ba nimambie Daena o ne o chɔ nomanta, Jekɔb bii la neɡre o ne o mɛɛ Hamɔ.

¹⁴ Ba ŋɔ ba be ŋɔ, “Yaa won ɛ ɡɛ. Yaa sɛh ya nimambie yalɛ baa waa wola o pen teŋe. A ɡɛ waa nɔ ɛ sihihwa dɛ tɛ yaa.

¹⁵ Waa aa ɡel ya sɛh laanee kɛŋɔ, hé ɡel he bibaala bwa teŋni ba pena kɛ yan.

¹⁶ Ate naa, aa maɡroo kɛŋɔ ya mo dɔŋa bihaahna. Ya ne hɛɛ pɛo so dɛ́ ɛ nɛmbeŋkpoŋ.

¹⁷ Dɛ he ta penteŋ la ta sɛɛh tenaa, yaa kpɔ ya nimambiee dɛ́ ir harɛ nɔ ta kaa.”

¹⁸ Waa baa bola la wer dɛ tɛ Hamɔ ne o bie Sɛkem.

¹⁹ Sɛkem aa dɛ nyin tolo la kohona nomanta, o ta waa la kpɔe tuuɡi harɛ. Dɛ o waa dɔ nyɛl ɡwaa nɛra baa lɔ o mɛɛ dem bela bwa.

²⁰ Kooro Hamɔ ne o bie Sɛkem la ba bwɛɛ la doonyoa baa soɡa dɛɛ bol waa la, dɛ ka cheme bwɛɛ la tena dɛ ŋɔ,

²¹ “Ya ne nɛra la som, hé ɡel ba so dɛɛ ɛ ba toma. Harɛ la kan ba dɔ bɔr dɛ so. Yaa wonoo mo ba bii, ásɛ ba ɡe mo ya kwa.

²² Dɛ yaa ɛ waa baa kpɔ bil ya sie yaa, anee dɛ́ ɡel ba sɛh ya ne ba so. Anee kɛ yaa teŋe ya pena kɛ ban.

²³ A ba ɡɛ naa, ba kondɛɛra ne komɛlbwa aa ya kwaa ɛa? Hé ɡel ya sɛh ásɛ ya ne ba so.”

²⁴ Bwɛɛ la tena bwa sɛh waa Hamɔ ne o bie Sɛkem aa bola la ta, asɛ ba teŋni bwɛɛ la baala bwa pena.

²⁵ Baa teŋni ba pena tɔpetooro wee a ta ɛɛ wee ba la, Jekɔb bibaala banɛ baa dɛ yer ba Simeon ne Lewi, ba ne Daena aa pɛ nya la iro kpɔ ba tokobie, asɛ dɛ piɡri bwɛɛ la tena dɛ jo ba bini dɛ kpoo ba baala te bwa.

²⁶ Ba kpo Kooro Hamɔ ne o bie Sɛkem ɡe, dɛ lawɛ Daena le Sɛkem dem bela dɛ kpɔɔ kaa.

²⁷ Baa kpoo ba tonɛ la, Jekɔb bibaala baa kaa la jo bwɛɛ la bini dɛ pa ba komɛlbwa dɛ kpɔ tɔ ɡuɡra baa ɡuɡri ba nimambie dɛ lawɔ chɔ la wel.

²⁸ Ba larawe peera ne nae, keeɡore ne kwaa aa lɔ bwɛɛ la ta, dɛ ka pa ba kooni kwaa bwa ɡe,

²⁹ ne kondɔɔhkwaa te bwa ne haahna ne bechale, asɛ dɛ pa ba deene bini laala bwa dɛ chea kaa.

³⁰ Asɛ Jekɔb ŋɔ Simeon ne Lewi be ŋɔ, “He nyin waa dɛ ba dawɛ n nɛ, dɛ ɡel dɔm ba chɔ n ne Keenan ne Pɛrɛs tena baa soɡe harɛ nɔ ta la baah ta. Yaa wola kanɛ nɔ, dɛ ɡɛ nɛra nɔ kaa pɛ nyoa ŋɔ bá ba yoo mɛ naa, amɔ dɛ ya bwaa dena dɛɛ ba hee laɔ.”

³¹ Anee ba chaŋe ŋɔ, “Yaa won so nyiŋi ba ɛ ya nimambie kɛŋɔ hanjwamane.”