Mumpar 33 - mzwDBL

Jekɔb kaa cheme Esɔ

¹ Jekɔb aa dɛ kaa la, o ha sie dɛ na kɛŋɔ Esɔ ne o bonɔɔna lafraanaarɛ aa dɛ ba, asɛ Jekɔb bɔne o bii la bini tɛ o haahna Lea ne Rakɛl dɛ ba toli banɛ la.

² O ɡelɔ o toli la lawɛ ba bii tɔ sie mɔɔ Lea ne o bii teŋɛ, asɛ Rakɛl ne Josef ka mun ta.

³ Jekɔb berɔ ka tɔ ba bwa sie, asɛ waa dɛ bɛne Esɔ la, o ba harɛ kera anuanɛ mɔɔ dɛ tel o be.

⁴ Esɔ aa nao la, o chwao dɛ ka ɡbaaro pɛl o te dɛ kpɔ o nɔɔra dawɛ o vaama ta dɛ mo o lwɛɛma, ba bwa berɛ wi.

⁵ Esɔ na haahna la ne bechale la, dɛ pɛɛro ŋɔ, “Aah bamewa ɡee ja he nɛɛ nɔɔ?” Asɛ Jekɔb chaŋe dɛ ŋɔ, “A ɡɛ bii nɔ, Korowiirii sune n nɛɛ dɛ kpɔ ba tɛ mɛ.”

⁶ Anee o toli la ne ba bii ba ɡuŋi Esɔ harɛ,

⁷ asɛ Lea ɡe ne o bii ba ɡuŋu, asɛ Josef ne Rakɛl ɡe ka mun dɛ ba ɡuŋu harɛ.

⁸ Esɔ bɔɔro ŋɔ, “Nɛra maa chem ba ba kpɔ kondɛɛra damanta dɛɛ kaa la ɡe sɛ?” Anee Jekɔb chaŋe ŋɔ, “N kpɔa dɛɛ ba ba tɛɛ ásɛ he sie lɛ n nɛ.”

⁹ Belaa Esɔ ŋɔ, “N nime dɛɛɡe, anɔ la n ɡbabir aa dɔa warɔ. Gel a che tɛɛ.”

¹⁰ Anee Jekɔb ɡe ŋɔ, “Akai, n dɛ soŋe dɛ he sie lɛ n nɛɛ tenaa he kpɔ. Taraken maa nae nɔ, a denɔ ɛɛ mɛ kɛŋɔ maa na Korowii ken.

¹¹ N poori, sɛh dɛ́ lɛ kwaa maa kpɔa dɛɛ tɛɛ nɔ. Korowii cha mɛ kohona dɛ sune n nɛɛ asɛ dɛ tɛ mɛ komɛlbwa.” Ba bolɔ la sie kɛrɛdɛ mɔɔ Esɔ ta ba lɛ.

¹² Asɛ Esɔ ŋɔ, “Ya kaa. Kɛ mɛɛ tɔ he siee.”

¹³ Jekɔb ɡe berɔ ŋɔ o be ŋɔ, “He nao kɛŋɔ n bii nɔ nɔn kao, asɛ n peera ne nae ne a bii aa dɛ ɔr la bwa ɡe waa hiah mɛ. Maa won kpɔa valɛ kohona tɔpebir a ba serewe.

¹⁴ Amɔ tɔ sie ásɛ n ɡe ne n nae nɔ ne n bii nɔ valɛ tama tama ka tel kɛŋɔ yaa ba he be Edom.”

¹⁵ Anee Esɔ ŋɔ, “Amɔ mɛɛ ɡel n bonɔɔna nɔ bini banee tɛɛ he ne baa ba.” Asɛ Jekɔb ŋɔ, “Bonɔɔna la ɡela dɛ tɛ mɛ te waa ta hiaeh. Nyinaa mɛɛ nyin kɛŋɔ he sie lɛ n nɛ.”

¹⁶ Awola tenten la, Esɔ ne o bonɔɔna la chiɡ ŋwɛnɛ ta dɛ kaa Edom harɛ ta.

¹⁷ Kɛ Jekɔb te kaa Sukot harɛ ta, dɛ ka do o dea, asɛ dɛ do patare tɛ o kondɛɛra ɡe. A waa ba pa bela sɔn Sukot la. O munii patare.

¹⁸ Waa le Mɛsopoteemea la, o kaa bwɛjen Sɛkem waa lɔ Keenan harɛ ta, dɛ ka baŋre o tɛnte dea bɛne bwɛjen la.

¹⁹ O yawɛ harɛ waa baŋre o tɛnte dea o ta la suuɡapoŋa lafa le Sɛkem mɛɛ Hamɔ bii be.

²⁰ O ɛ kon baa ɛ saraha o ta dɛɛ tɛ Korowii bela, asɛ dɛ pa o sɔn ‘Korowii Israel tena aa dɛ tomɔ’.