Mumpar 32 - mzwDBL

Jekɔb kpɔ o te dɛ́ ka cheme Esɔ

¹ Jekɔb chiɡ ŋwɛnɛ ta dɛɛ kaa, asɛ nyundua toroma ba chemo.

² Waa na ba la, anee o ŋɔ, “Korowii soŋnibɔree bonɔ.” Asɛ dɛ pa bela sɔn Mahanaim.

³ Belaa Jekɔb tomɛ toroma ŋɔ bá tɔ o sie dɛ́ kaa o dɔɔ Esɔ be. Dɛ Esɔ soɡe harɛ bɛl baa dɛ yerɛ bela Edom.

⁴ Jekɔb do toroma la ŋɔ bá ka ŋɔ o be ŋɔ, “He bonɔɔ Jekɔb ŋɔ, o kaa so Laban be, belaa o do dɛ ba le fini,

⁵ o dɔ nae ne keeɡore, ne boohna ne peera dɛ nɛndɔɔla baala ne haahna bwa. Taraken, o dɛ tomɛ nɛra ŋɔ ba ba bol hen haa ɛ o dɔɔ be, ásɛ he jemɛ o waa dɛ́ lɛo silɛɛ ne.”

⁶ Toroma la aa bera ba la, ba baa bol o be ŋɔ, “Ya kaa bol he dɔɔ Esɔ be. Baala lafraanaarɛ ja o nɛ do ŋwɛnɛ ta taraken dɛɛ ba dɛ́ ba cheme.”

⁷ Jekɔb aa no ɡɛ la, o ɔmɔ kohona o bwara yɔr, asɛ dɛ bɔne o nɛra la ne peera ne nae, dɛ nyoɡmare la bini bɔre anɛ.

⁸ O liiro kɛŋɔ dɛ Esɔ ba dɛ yo baŋ bɛl nɛra aa, ba kar la ɛɛ won dɔ bɔr dɛ́ chwa kaa.

⁹ Belaa o soŋe Korowii ŋɔ, “Korowii n nabaa Abraham ne n mɛɛ Aesek aa tomɛ, hen ŋɔ n be ŋɔ ń berɛ kaa n bwɛ n lolanar bini, dɛ ŋɔ hɛɛ ɡeloo n wobɛlbwa do wer.

¹⁰ He teŋa haa teŋa dɛɛ nyin mɛ, ne he kasinteŋ haa ɡela n na nɔ bini bɛlbwa ta men maa ɛ he bonɔɔ nɔ chɛɛ. N fa aa ɡale Jɔɔdan Moo la, dɛ n ta komɛlbwa kpoŋe nemenɛ n daŋɡbala ɡbo, taraken he berɛ ɡel n ya dɛ ɛ nɛmbele banɛ.

¹¹ N dɛ soŋe kɛŋɔ he lɛɛ mɛ le n dɔɔ Esɔ nɔn ta. N dɛ ɔmɛ kɛŋɔ o bɛ yaa ba yo, dɛ́ kpoo n ne n haahna ne bii bwa.

¹² Henee ŋɔa ŋɔ hɛɛ ɡeloo he naanar warɛ kɛŋɔ, mpo nyoa hɛŋle nomɛlbwa aa wola won kur ba.”

¹³ Jekɔb chɔ bela awola jwaana la bwa, asɛ dɛ chale o kondɛɛra la bini ane dɛ́ kpɔ ka tɛ Esɔ.

¹⁴ O lawɛ bohneenanar lafraanɛ ne bombala fifraanɛ, peneenanar lafraanɛ dɛ pebala fifraanɛ,

¹⁵ nyoɡma neenanar fifraatoro ne a bii, naneenanar fifraanaarɛ ne ambala ɡe fi ne keeɡo neenanar fifraanɛ dɛ ambala ɡe fi.

¹⁶ Kondɛɛra waa peɡri a bini la, o ŋɔ bá kpɔ ka tɛ o dɔɔ, a bɛlbwa kapa ne nɛn waa dɛ nyiŋa. Asɛ dɛ ŋɔ o bonɔɔna la be ŋɔ, “Hé tɔ n sie, ásɛ dɛ ɡel he baahna tɛr.”

¹⁷ O ŋɔ o bonɔɔ waa tɔ sie la be ŋɔ, “Dɛ n dɔɔ Esɔ cheme dɛ bɔɔre ŋɔ he dɔɔree umeo? Leperaa hɛɛ kaa lɔ? Ume kondɛɛraa he kpɔ dɛɛ kaa laa,

¹⁸ he chaŋe ŋɔ, ‘He bonɔɔ Jekɔb kwaa. O lawa ŋɔ ń kpɔ ka tɛ o dɔɔ Esɔ. O ɡe lɔ mun ta dɛɛ ba.’ ”

¹⁹ Gɛ tentenee o ŋɔ nɛn nɛɛte, ne toorote, ne banɔ la bwa waa kpɔ kondɛɛra do ba nɔn ta la be ŋɔ, “Dɛ he cheme Esɔ aa, hé bwa ɡe ŋɔ o be ɡɛ.

²⁰ Hé berɛ ɡel ó jemɛ kɛŋɔ o bonɔɔ Jekɔb ɡe lɔ habɔɔ dɛɛ ba. Dɛ ń tɔ sie, dɛ́ kpɔ koŋkɛɛla nɔ ba tɛɛ, ásɛ mɔɔ o tel he be. Ásɛ dɛ he nao waa, he ken ɛɛ kpɔɔ kɛɔ.”

²¹ Ba kpɔ koŋkɛɛla la tɔ sie dɛ kaa asɛ o te berɛ chɔ bela waa choɡa la.

Jekɔb ne nyundua torome jwiira wa

²² Awola jwaana ne la, o iro dɛ kpɔ o haahna banɛ Bilha ne Silpa, dɛ o toli banɛ ne o bii fi dɛ beŋkpoŋ la dɛ kpɔ ba le Jabɔk Moo leebɔɔ.

²³ Waa kpɔ ba le nee la tonɛ la, o berɛ ba kpɔ komɛlbwa ɡe waa dɔa la ɡe le,

²⁴ asɛ dɛ ɡbo ka baŋ bela. Belaa baa bɛl ba jwiiru, ba kpoŋe dɔŋa bini awola jwaana la ne, dɛ ka tel kɛŋɔ aa baa ka tama ásɛ bɔr chaah.

²⁵ Baa la aa baa na kɛŋɔ waa won ɡo Jekɔb la, o kpɔ nɔn lɔ Jekɔb kɛɡra asɛ o sor.

²⁶ Baa la ŋɔ, “Kpɔ mɛ ta n kaa, bɔr dɛ chaah.” Asɛ Jekɔb ŋɔ, “Maa hen ta, nemenɛ haa swee andɛɛɡa tɛ mɛ mɔɔ.”

²⁷ Baa la bɔɔro ŋɔ, “He sɔne ɛrɔɔ?” Anee o ŋɔ, “N sɔne Jekɔb.”

²⁸ Asɛ baa la berɛ ŋɔ, “He sɔne laa Jekɔb kpa. He ne Korowii ne nɛwɛnyina yoo, ba ta wone pɔ he nɛ, anomanta, he sɔne Israel.”

²⁹ Jekɔb ŋɔ o be ŋɔ, “N poori, chaɡ mɛ he sɔn.” Anee o chaŋe ŋɔ, “Ɛrɛ waa hɛɛ nyin dɛ́ jemɛ n sɔn nɔɔ?” Asɛ o swee andɛɛɡa tɛo bela.

³⁰ Belaa o ŋɔ, “N na Korowii siwi ne dɛ ta so mkpa ta.” Anomanta, o pa bela sɔn Pɛneɛl.

³¹ Jekɔb aa le Pɛneɛl dɛɛ kaa la dɛ wee leɔ. O kɛɡra la aa sora nomanta, dɛ o dɛ chole o ta.

³² Dɛ kpoŋe ba le fini Israel tena aa ol kɛɡra di. Baa la aa kpɔ nɔn lɔ Jekɔb kɛɡra ta o sor la nomanta.