Mumpar 31 - mzwDBL

Jekɔb chwao le Laban be

¹ Jekɔb noɔ kɛŋɔ Laban bibaala aa dɛ bol ŋɔ, “Jekɔb kpɔ ya mɛɛ kwaa waa dɔa la bwa. O kondɔɔh waa dɔa nɔ bwa le ya mɛɛ kwaa ta.”

² Jekɔb nyiŋi Laban dɛ na kɛŋɔ ɡɛ o ne o fa aa doa wubwa la ta ɡɛ doe kpa.

³ Belaa Korowii ŋɔ Jekɔb be ŋɔ, “Berɛ kaa he lolanar bini, he naawa harɛ la ta. Mɛɛ teŋɛ he nɛɛ.”

⁴ Anomanta, o tomɔ ba ka yerɛ Rakɛl ne Lea ŋɔ bá chemo kpɔɡ bini bela o ne o kondɛɛra aa lole la.

⁵ Asɛ o ŋɔ ba be ŋɔ, “N nao kɛŋɔ n ne he mɛɛ ta ɡɛ ya fa aa doa wubwa la doe kpa. Kɛ Korowii n naawa aa tomɔ la ta teŋɛ n nɛ.

⁶ He bwa ɡe nao ɡɛ maa kpɔ n bokpeɡa bwa ɛ toma dɛ tɛ he mɛɛ.

⁷ O ɡarɔ faah mɛ n kembɔr dɛ beɡra kera fi. Kɛ Korowii ta on ŋwɛnɛ tɛɛ asɛ o won ɛɛ mɛ wechɔɡa bɛlbwa.

⁸ Saŋ bɛlbwa waa ŋɔ, ‘Peera ne boohna aa lɛɡre laanee dɛ́ ɛ he kembɔr’ la, ɡɛɛ a bwa loɡle dɛ lɛɡre. O berɔ ŋɔ, ‘Pera ne boohna aa peeɡe laanee dɛ́ ɛ he kembɔr’ aa, ɡɛɛ a bwa loɡle dɛ peeɡe.

⁹ Gɛ ŋwɛnɛ nɔ taa a che Korowii ɡel n dɔ kondɛɛra le he mɛɛ kwaa ta.

¹⁰ Peera la teene kpoŋa saŋ la, n deero dɛ na kɛŋɔ bombala aa dɛ jweera la peeɡɔ dɛ lɛɡre.

¹¹ Belaa nyundua torome bɛl yer mɛ deera la ta dɛ ŋɔ, ‘Jekɔb’ asɛ n sɛh ŋɔ ‘Menee nɔ.’

¹² Anee o ŋɔ, ‘Ha sie dɛ nyiŋi na, bombala bwa aa dɛ jwee la peeɡɔ dɛ lɛɡre. Dɛkalkɛ n na ɡɛ Laban aa dɛ ɛɛ bwa.

¹³ Menee Korowii maa kpɔ n te baɡle Bɛtel asɛ he kpɔ bwe bɛl pa bela, dɛ fuɡe noo ta o ta, dɛ kpɔ dɛɛ lii mɛ, dɛ baɡ mɛ nyoa la. Ir dɛ́ kpɔ he te dɛ́ berɛ kaa harɛ baa lolɛ o ta la ta.’ ”

¹⁴ Belaa Rakɛl ne Lea ŋɔ o be ŋɔ, “N mɛɛ kon bɛlbwa ta kae dɛ o sewaa yá dɔ kpa.

¹⁵ O ɛ yaa kɛ nɛŋhɔɔhra dɛ yoɡ yaa. Suuɡa waa yoɡ yaa dɛ lɛ la ɡe, o di a bwa.

¹⁶ Kondɔɔh Korowii aa ɡela he dɔ le ya mɛɛ kwaa ta la berɛ ya ne ya bii kwa. Ɛ wobɛlbwa Korowii aa ŋɔa he ɛ.”

¹⁷ Belaa Jekɔb kpɔ o te, dɛ lawɛ o haahna ne bii so nyoɡmare ta, dɛ́ kaa Keenan o mɛɛ harɛ ta,

¹⁸ dɛ kpɔ o kondɛɛra waa dɔa Mɛsopoteemea harɛ ta bwa, ne komɛlbwa waa dɔa ɡe ja dɛɛ kaa o mɛɛ Aesek be Keenan harɛ ta.

¹⁹ Laban kaa o peera pona fona, asɛ Rakɛl ŋwɛ ba dem voɡa aa lɔ o mɛɛ be.

²⁰ Jekɔb ta ɡelɛ Laban jemɛ kɛŋɔ o dɛ kaa o bwɛ.

²¹ O kpɔ komɛlbwa dɛ ɛ warane dɛ le kaa. O kaa ɡale Yufretis Moo la, dɛ kpɔ sie pa Gelead deŋɡarere harɛ ta dɛɛ kaa.

Laban ti Jekɔb

²² A tɔpetooro wee laanee ba ŋɔ Laban be ŋɔ Jekɔb chwao.

²³ Belaa o kpɔ o lolanar bane ja o nɛɛ ba ti Jekɔb, dɛ ka puu Gelead deŋɡarere harɛ ta bela. Aa ɛ tɔpera anuanɛ ŋwɛnɛɛ.

²⁴ Korowii ba Laban be deera ta awola jwaana, dɛ ba ŋɔ o be ŋɔ, “Nyiŋi kɛrɛdɛ dɛ bɛ Jekɔb ba aah ŋwɛnɛ bɛlbwa ta.”

²⁵ Dɛ Jekɔb baŋre o tɛnte dea Gelead deŋɡarere harɛ ta, asɛ Laban ɡe ne o nɛra baŋre ba kon baŋ bɛl.

²⁶ Laban la Jekɔb be dɛ ka ŋɔ, “Ɛrɛɛ he ɛɛ mɛ ɡɛ nɔɔ? He neɡ mɛ dɛ kpɔ n bihaahna chwa kɛŋɔ haa kaa yo laa dɛ laɡ ba la.

²⁷ Ɛrɛɛ he neɡ mɛ dɛ sɔh dɛ chwa he ta men amaneɛ ba bɔe nɔɔ? He ɡelɔ n deŋne no aa, n fe kpɔ janjela ne kwaa baa dɛ yiiɡa kɛŋɔ loŋa ba tae ŋwɛnɛ silɛɛ ne.

²⁸ He ta ɡelɛ n mo n bii ne naanar lwɛrɛme dɛ ta ba ŋwɛnɛ. Gɛnewaa he ɛ ɡɛ la!

²⁹ N fe dɔ ŋwɛnɛ kɛŋɔ ń won ɛɛ wechɔɡa, kɛ dɛ jwaana ne la, Korowii he mɛɛ aa tomɔ la kah mɛ ŋɔ n bɛ hen aah ŋwɛnɛ bɛlbwa ta.

³⁰ N jemɔ kɛŋɔ he sie cheɡɛ chiŋ hɛɛ nyin bɔr dɛ́ kaa he bwɛ. Aah dɛ ɛrɛ waa he berɛ ŋwɛ n voɡa nɔɔ?”

³¹ Belaa Jekɔb chaŋo ŋɔ, “Ɔmaa n ɔmɛ, n liiro ŋɔ he ken ɛɛ lɛ he bihaahna la n bee.

³² Nyiŋi, nomɛlbwa haa na voɡa la o be la, a chɛ kɛ bá kpoo. Ya nɛra nɔ ɡe lɔ bonɔ dɛ́ di yaa danseɛ, komɛlbwa waa ɛ he kon la, ásɛ he kpɔ.” Dɛ Jekɔb ta jemɛ kɛŋɔ Rakɛlee ŋwɛ o mɛɛ Laban voɡa la.

³³ Laban kaa jo Jekɔb tɛnte dea bini dɛ ka ɡaaɡe, dɛ le ka jo Lea ne o toli la ɡe kon bini o ta voɡa la nae. Belaa o berɛ la Rakɛl ɡe kon bini.

³⁴ Ajaah dɛ onee kpɔa do kon baa kpɔa dawɛ nyoɡma ta dɛɛ so o ta la lɔɡa dɛ so a ta. Dɛ Laban kaa nyiŋi o dea kɛ o ta an nae.

³⁵ Asɛ Rakɛl ŋɔ o mɛɛ be ŋɔ, “N poori n mɛɛ, bɛ ɡel he baah di. Maa won ir che he sie, dɛkalkɛ n le dahara.” Laban nyiŋi o tɛnte dea bini kɛ wɛɛ na voɡa laanee, kɛ o ta an nae.

³⁶ Belaa Jekɔb kpɔ bandia dɛ bɔɔro ŋɔ, “Bɔkwa wechɔɡaa n ɛɔ? Mmara besoo n koni asɛ he ti mɛ kɛŋɔ nɛnchɔɡe nɔɔ?

³⁷ Haa nyiŋi n bone bwa bini nɔ, he dem kon besoo he na nɔ? Kpɔ bil n ne he nɛra baa lɔ bonɔ nɔ sie, ásɛ ba pa bole.

³⁸ N ne he soɡoo bene fifraanɛ, he boohna ne peera maa nyiŋi a ta ɡe ya tɛɛ kɛrɛdɛ. N ta he pebal bɛlbwa ɡe kpoe di bwa.

³⁹ Anɔ la konchɔɡa aa dɛ kpoora bwa la, n ɡbabirii dɛɛ bɔe a kem. Anɔ la baa dɛ ŋwɛa webaŋa ne jwaana ɡe bwa la, he ɡelɔ mɛɛ bɔe a kem.

⁴⁰ Dɛ n dɛ na wahala, webaŋa wee dɛ kpo mɛ jwaana waa ɛɛ kpo mɛ, dɛ maa won dom chɔ.

⁴¹ Dɛ kenii mɛɛ na bene fifraanɛ la bwa n ne haa soɡa. Bene fi dɛ anaarɛɛ n ɛ toma dɛ dɔ he bihaahna banɛ, asɛ bene anumɛl ɡe n ɛ toma dɛ dɔ kondɛɛra. Anɔ bwa habɔɔ la, he beɡre n kembɔr kera fi.

⁴² Korowii n nabaa Abraham ne n mɛɛ Aesek aa tomɔ la laa teŋɛ n nɛɛ aa, he fe ɡelɔ n kpɔ nɔŋɡbala kaa. Kɛ Korowii na n wenaale ne n toma maa ɛa, a waa dɛ jwaana ne o ba pa bole la.”

Jekɔb ne Laban fɔo fɔwa

⁴³ Ate, Laban chaŋe ŋɔ, “N biirii haahna nɔ, ba bii ɡe n kwaa, asɛ kondɛɛra nɔ bwa ɡe ɛ n kwa. Komɛlbwa aa lɔ bonɔ ɛ n kon. Kɛ n bihaahna nɔ ne ba ɡe bii nɔ, maa won kpoŋ ba.

⁴⁴ Taraken n sɛoh kɛŋɔ n ne he fɔwɛ fɔo. Gel ya pa bwea dawɛ dɔŋa nɛ á baɡle ya fɔo la.”

⁴⁵ Asɛ Jekɔb kpɔ bwe bɛl pa bela ŋɔ bá kpɔ dɛɛ lii ba fɔo la.

⁴⁶ Jekɔb ɡelɔ o bonɔɔna pa bwea a daŋɛ chɔ, asɛ Jekɔb ne Laban dɛ bonɔɔna la bwa pɛ so a jwɛh, dɛ di kwa.

⁴⁷ Laban pa bela sɔn Jeɡar Sahaduta, asɛ Jekɔb ɡe pa o sɔn Galiid.

⁴⁸ Belaa Laban ŋɔ Jekɔb be ŋɔ, “Bwea nɔ aa darawe dɔŋa nɛɛ nɔɔ dɛ́ lii ya nɛra banɛ nɔ fɔo la.” A waa ba pa bela sɔn Galiid, o munii danseɛ bwea la.

⁴⁹ Dɛ ŋɔ, “Yaa dɛ peɡri dɔŋa baah nɔ, Korowii nyiŋi ya nɛ.” Asɛ dɛ pa bela sɔn Mispa.

⁵⁰ Dɛ berɛ ŋɔ, “Dɛ he ka dɛ fiiɡi n bihaahna nɔ kɛɛ dɛ ka mo haahna ja ba nɛ aa, a lole kɛŋɔ maa belaa do te, kɛ Korowii te ɛɛ nao.

⁵¹ Bwea aa darawe dɔŋa nɛɛ laanee nɔ, asɛ bwe maa kpɔa pa n ne he bwa kpɔ dɛɛ lii waa nɔ ɡee nɔ.

⁵² Bwea aa darawe dɔŋa nɛɛ nɔ ne onɔ maa kpɔa pa nɔɔ dɛɛ ba chɔe dɛ lii yaa. Maa bwea nɔɔ ɡale dɛ́ ba yoi, hé ɡe bɛ an ɡale dɛ́ ba yoo mɛ.

⁵³ Korowii ya nabaa Abraham ne Neehɔ aa tomɔ laanee dɛ́ bol ya baah waa dɛ́ pa bole.” Anomanta, Jekɔb ŋwɛɛ Korowii o mɛɛ Aesek aa ɔmɔ dɛ tomɔ la kɛŋɔ wɛɛ teŋɛ waa waa bola la taa.

⁵⁴ O ɛ saraha deŋɡarere harɛ baa soɡa la ta, dɛ yerɛ o lolanar la ba ba di kondikwaa la. Baa dia tonɛ la, ba chɔ bela awola jwaana.

⁵⁵ Tɔ aa pera chɔmbibi la, Laban mo o bihaahna ne o naanar la lwɛrɛme, dɛ swee andɛɛɡa tɛɛ ba dɛ berɛ kaa o bwɛ.