Mumpar 30 - mzwDBL

¹ Rakɛl aa naa kɛŋɔ o ta bie lolɛ tɛ Jekɔb la, o mee Lea dɛ ŋɔ Jekɔb be ŋɔ, “Gel n lolɛ bii, dɛ ɡɛ laa aa, amɔ te mɛɛ sewɔɔ.”

² Anee Jekɔb baah di o nɛ, o ŋɔ, “Bɛ n nɛɛ nya, n laa Korowii dɛ tɛɛ bii.”

³ Belaa Rakɛl ɡe chaŋe ŋɔ, “N tolo Bilhaa la, kpɔɔ ásɛ o lolɛ bie tɛ mɛ, á che o nɛɛ ń ɡe dɔ bii.”

⁴ Anomanta, o lawɔ tɛ Jekɔb o mo.

⁵ Asɛ o kpoŋe tea dɛ lolɛ bibaa tɛ Jekɔb.

⁶ Anee Rakɛl ŋɔ, “Korowii bol n waa tɛ mɛ. O no n wesoŋa dɛ tɛ mɛ bibaa, asɛ dɛ pa o sɔn Dan.”

⁷ Bilha berɔ kpoŋe tea dɛ lolɛ bibaa ja.

⁸ Asɛ Rakɛl ŋɔ, “N ne n nahaah yoo taeh, kɛ n pɔ o nɛ.” Anomanta, o pa bie la sɔn Naftale, o munii yoi.

⁹ Lea ɡe aa baa na kɛŋɔ o lol teŋo la, o lawɛ o tolo Silpa tɛ Jekɔb o mo.

¹⁰ Asɛ o lolɛ bibaa tɛo.

¹¹ Anee o ŋɔ, “N nyu wer,” asɛ dɛ pa bie la sɔn Gad.

¹² Silpa berɔ lolɛ bibaa tɛ Jekɔb ja,

¹³ asɛ Lea ŋɔ, “N sie lɛo name. Taraken n bala ɛɛ dɛɛ yer mɛɛ nɛn waa na som.” Asɛ dɛ pa bie la sɔn Aasa.

¹⁴ Rubin aa baa kpeɡ la, o la koo jaaɡe koma saŋ, dɛ ka kpɔ kwaane aa won ɡela baa ne haah ɛɛ nyin dɔŋa dɛ́ dɔ bii ba tɛ o nya Lea. Asɛ Rakɛl ŋɔ o be ŋɔ, “Tɛ mɛ he bie kwaa nɔ ane.”

¹⁵ Asɛ Lea ŋɔ, “Lɛɛ haa lɛ n jaa nɔ ɡbo ta maɡra aa, he berɔ dɛɛ nyin he lɛ n bie kwaa nɔ o be ja aa?” Anee Rakɛl ŋɔ, “Dɛ hɛɛ tɛ mɛ he bie kwaa nɔ anee yaa, mɛɛ sɛoh dɛ tɛ he ne Jekɔb kalaŋre jwaana nɔ ne.”

¹⁶ Belaa Jekɔb aa le koo dɛɛ ba jɔmɔra la, Lea ka chemo dɛ ŋɔ, “N ne henee dɛɛ ba chɔe fini jwaana nɔ ne, dɛkalkɛ n kpɔ n bie kwaa la ane lɛɛ le Rakɛl be.” Asɛ o ne o chɔ jwaana la ne.

¹⁷ Korowii no o wesoŋa asɛ o kpoŋe tea ja dɛ lolɛ binuete tɛ Jekɔb.

¹⁸ Anee Lea ŋɔ, “Korowii tɛ mɛ n kembɔr, dɛkalkɛ n lawɛ n tolo tɛ n jaa asɛ o ne o chɔ.” Anomanta, o pa o sɔn Isaaka.

¹⁹ O berɔ kpoŋe binumɛlte tea, dɛ lolɛ bibaa tɛ Jekɔb.

²⁰ Asɛ o ŋɔ, “Korowii kɛ mɛ kondɛɛɡe. Name te n jaa ɛɛ dɛɛ duu mɛɛ, dɛkalkɛ n lolɛ bibaala banumɛl bwa tɛo.” Anomanta, o pa bie la sɔn Sebulon.

²¹ A habɔɔ la, o lolɛ bihaah dɛ pa o sɔn Daena.

²² Korowii no Rakɛl wa dɛ no o wesoŋa dɛ tɛo lol.

²³ Anomanta, o lolɛ bibaa dɛ ŋɔ, “Korowii tɛ mɛ bibaa dɛ laa sihiih kpɔ n sie.”

²⁴ O pa bie la sɔn Josef. Dɛ ŋɔ, “Korowii berɔ jaa mɛ bibaa.”

Jekɔb kondɛɛra yae wa

²⁵ Josef lola habɔɔ la, Jekɔb ŋɔ Laban be ŋɔ, “Tɛ mɛ ŋwɛnɛ ásɛ n berɛ kaa n bwɛ.

²⁶ Gel n kpɔ n haahna ne bii maa ba he be dɛ ba ɛ toma dɔɔ ba la kaa. He ɡbabir na ɡɛ maa tomɛ.”

²⁷ Anee Laban ŋɔ o be ŋɔ, “Dɛ hɛɛ sɛoh waa, ɡel n ne he so. N nao kɛŋɔ he nomanta, Korowii swee andɛɛɡa tɛ mɛ.

²⁸ Gel n jemɛ kembɔr maa chɛ kɛ n kpɔ tɛɛ, ásɛ n nyin tɛɛ.”

²⁹ Belaa Jekɔb ŋɔ o be ŋɔ, “He ɡbabir jemɛ ɡɛ maa tomɛ ka tel, ne ɡɛ maa nyiŋi he kondɛɛra ta a do wer nyiŋa maa nyiŋi a ta kɛrɛdɛ la wa.

³⁰ A fa lɔ tamaa ken mɔɔ n ba, a berɔ ya kohona, asɛ Korowii tɛɛ hɛɛra bobɛlbwa maa dɛ la. Taraken, tɔpere telo kɛŋɔ n ɡbabir ɡe vɔrɔwe n dem.”

³¹ Anee Laban bɔɔro ŋɔ, “Aŋwɛnɛɛ hɛɛ nyin kɛ n bɔe nɔ?” Jekɔb ŋɔ, “Maa kembɔr bɛlbwa nyin. Dɛ he fe ɛɛ sɛh ɡɛ maa dɛ ba bola nɔ taa tɛ mɛ tenaa, he kondɛɛra la taa mɛɛ ba nyiŋa.

³² Anee kɛŋɔ, ɡel n ka nyiŋi he kondɛɛra la bwa bini fini dɛ́ lawɛ pebie bɛlbwa waa ɛ ombiŋi ne bombiire aa lɛɡra kɛɛ dɛ peeɡe la. Anee ɛ kembɔr maa dɛ nyin.

³³ A ba ɡɛ naa, kerekere hɛɛ won jemɛ kɛŋɔ n ɛ nɛndɛɛɡe. Tɔpebɛl haa ba ŋɔ he nyiŋi n toma ɛɛ bini la, pebie bɛlbwa waa wola ombiŋi ɛɛ ne bombiire aa wola lɛɡrɛ kɛɛ dɛ peeɡe koo n kwaa ta naa, amɔ jemɛ kɛ dɛ ŋwɛɛ n ŋwɛ.”

³⁴ Anee Laban ŋɔ, “N sɛh ɡɛ. Yaa ɛ ɡɛ haa bola nɔɔ.”

³⁵ Awola tɔpere la, Laban lawɛ bombala aa lɛɡra ne anloni aa peeɡa kɛɛ anɔ la aa lɛɡre ampoŋa do o bii nɔn ta baa nyiŋi a ta. O lawɛ peera aa bira bwa ɡe jaa ba.

³⁶ Asɛ dɛ ɡel tɔpera atoro ŋwɛnɛ ta o ne Jekɔb baah ta, asɛ Jekɔb ɡe ɛɛ nyiŋi kondɛɛra la kar ta.

³⁷ Belaa Jekɔb teŋe daa ane kɛŋɔ sɛsɛ ne chɛnchɛne daa kpala, dɛ lɔ a pɛɡa peri ta, asɛ a to dɛ peeɡe.

³⁸ O kpɔ daa la paaɡe kon aa dɛ nyɔ nee o bini la sie. Dɛkalkɛŋɔ belaa aa jwee.

³⁹ Anomanta, aa ba dɛɛ nyɔ nee la asɛ daa la paaɡe ɡɛ la, aa kpoŋe teene dɛɛ ba loɡla la, a loɡle bii aa peeɡa, anla aa lɛɡra ne anchɛchɛra.

⁴⁰ Jekɔb pere a bii la le anɔ la ta, dɛ ɡel anɔ la aa kaa la sie chaɡɛ Laban kwaa la waa paaɡe daa a sie la ne ambiŋere la be. Asɛ dɛ teɡɛ o ɡbabir kwaa la kaa baŋ bɛl, o ta an kpɔe koo Laban kwaa la ta.

⁴¹ Jekɔb kpɔ daa la ba pa a sie a nenyɔɔ kwaa la bɔr bela, ásɛ anɔ la a bwara aa kpeɡa dɛ peeɡe la ba dɛ jwee dɔŋa aa, á kpoŋe teene a bii la do kɛŋɔ daa la ken.

⁴² Kɛ anɔ la a bwara aa wola kpeɡe la te, o ta daa la kpɔe paaɡe a sie. Labanee dɔ anɔ la aa wola kpeɡe la, asɛ Jekɔb ɡe dɔ anɔ la aa kpeɡa la.

⁴³ A cheɡɛ a ta Jekɔb ba ɛ kondɔɔh dɛ dɔ kondɛɛra ne nɛndɔɔla ne nyoɡmare dɛ keeɡore kohona.