Mumpar 3 - mzwDBL

Nɛwɛnyina deŋnekpeɡ wa

¹ Ola Korowii aa taa la bini la, dɛ harɛkon sie pilo ɡwaa a bwa. Harɛkon la baa pɛɛ haah la ŋɔ, “Kpelaa Korowii ŋɔ he bɛ daa nɔ bɛlbwa nɔn di naa?”

² Asɛ haah la chaŋo ŋɔ, “Dɛ́ ya won daa nɔ bɛlbwa nɔn dii.

³ Atane kɛŋɔ onɔ waa cheɡɛ bodɛɛɡe baa du daa nɔ baah tenten nɔ, Korowii ŋɔ ya bɛ o te leɡe a ba ɛ kɛŋɔ yaa di o nɔnee. Ya diu waa, yaa sewɔɔ.”

⁴ Belaa harɛkon la ŋɔ haah la be ŋɔ, “Nyosonee. Háa sewa ba.

⁵ Korowii jemɔ kɛŋɔ dɛ he di daa la nɔn aa, he sie dɛ ba pila, he jemɛ wedɛɛɡa ne anchɔɡa kɛ on ken. A waa o ŋɔ he bɛ di la.”

⁶ Dɛ haah la nao kɛŋɔ daa la nɔn la ɡe wer siwi ta dɛ do wer ne dii, dɛɛ tɛ wejema ɡe ja. Anomanta, o haŋrɔ kahonɛ dɛ cha ane di, dɛ kpɔ ane ka tɛ o jaa ɡe o di.

⁷ Baa dia tonɛ la, buɡ la ta, ba bwa sie pilo, ba na kɛŋɔ ba cheɡɛ mumɡbal. Anomanta, ba nyin ɔɡ papooni dɛ nyara dɛ kpɔ li.

⁸ Awola jɔmɔra ne la, ba noɔ kɛŋɔ Korowii dɛ valɛ bodɛɛɡe baa du daa la bini, asɛ ba chwa ka sɔh baŋ pera daa la bini ásɛ o bɛ ban na.

⁹ Anee Korowii yerɛ baa la ŋɔ, “Lee he dɔɔ?”

¹⁰ O sɛh dɛ ŋɔ, “N no he ɡbɔɡa daa la baah ta bela, asɛ n ɔmɛ dɛ ka sɔh dɛkalkɛ n cheɡɛ mumɡbal.”

¹¹ Anee Korowii pɛɛro ŋɔ, “Umee ŋɔ he be ŋɔ he cheɡɛ mumɡbal ɔ? He di daa la maa kaeh ŋɔ he bɛ o nɔn di la kɛɛ?”

¹² Asɛ baa la ŋɔ, “Ɔɔh. Haah la haa kpɔɔ ja n nɛɛ la, onee tɛ mɛ bɛl n di.”

¹³ Belaa Korowii pɛɛ haah la ŋɔ, “Ɛrɛɛ he ɛ ɡɛ nɔɔ?” Anee o chaŋe ŋɔ, “Harɛkon laanee neɡ mɛ asɛ n di.”

Korowii taah baa ne haah dɛ harɛkon

¹⁴ Belaa Korowii ŋɔ harɛkon la be ŋɔ, “Gɛ haa ɛa nɔ nomanta, N taahne, ásɛ a do kpeɡri tɛɛ ɡwaa kpɔɡ bini ola ne kondɛɛra bwa. He tea taa hɛɛ ba tuuɡa, dɛɛ di teera ka tel he serewe bena.

¹⁵ Mɛɛ kpɔ danchɔɡee ta he ne haah la baah ta, ásɛ he naanar ne o naanar hah dɔŋa dɛɛ la. Saŋ bɛlbwa waa nae la, wɛɛ paɡre he nyuu, ásɛ he ɡe choɡe o nalume.”

¹⁶ Korowii ŋɔ haah la be ŋɔ, “Weweele binii hɛɛ ba tea kpoŋa, dɛ́ lolɛ bonyɛɡa bini. He sie ɛɛ beɡre he jaa nɛɛ, ásɛ o di kpeɡri he nɛ.”

¹⁷ Dɛ ŋɔ baa la be ŋɔ, “Haa no he haah nyoa dɛ di daa nɔn maa ŋɔa he bɛ di nomanta, N taah harɛ nɔ waa haa ɛa la wa, tomkpeɡaa hɛɛ ba ɛɛ dɛ́ kwee bɔwɔb mɔɔ dɛ́ di kwa he soɡa bini bwa.

¹⁸ Sɔɔhne ne jabalnadaŋɛree dɛɛ ba harɛ la ta lee tɛɛ. Ásɛ hɛɛ di kpɔɡ bini kondikwa.

¹⁹ Hɛɛ kwee bɔwɔbee mɔɔ dɛ́ di kwa ka tel kɛŋɔ haa berɛ kaa teera maa kpɔa mae la bini, dɛkalkɛ teera hen, teera binii he berɛ dɛɛ ba kaala.”

²⁰ Baa la sɔne Adam. O pa haah la ɡe sɔn Hawa dɛkalkɛŋɔ on dɛɛ ba nɛwɛnyina bwa nya ɛɛ.

²¹ Korowii kpɔ ola tɔne tɛɛ ba ba kpɔ tɔ ba bwara.

Korowii doŋi Adam ne Hawa le Eden bodɛɛɡe bela

²² Belaa Korowii lii kɛŋɔ, “Name baa la jemɛ wedɛɛɡa ne wechɔɡa kɛŋɔ yan. Yá nyiŋi kɛrɛdɛ o bɛ daa waa dɛ tɛ mkpa la te nɔn ba tor di dɛ́ do le saŋ bɛlbwa.”

²³ Anomanta, Korowii doŋu le Eden bodɛɛɡe bela waa du daa la, dɛ ɡel o kaa parɛ harɛ waa mao le o ta la ta.

²⁴ Waa doŋi baa la le bela habɔɔ la, o kpɔ Kerobim ne tokobii bɛl waa dɛ nyɛɡle kɛ ninlao dɛɛ beɡre bobɛlbwa, dɛ ka cheɡ Eden bodɛɛɡe wee leebɔr pera, ásɛ nomɛlbwa bɛ won di daa la nɔna.