Mumpar 29 - mzwDBL

Jekɔb aa ba Laban be o dem wa

¹ Jekɔb ŋwɛnɛ waa valɔ la, o kpɔ sie chaɡɛ wee leebɔr dɛ kaa bela harɛ la ta.

² Waa kaa tel kpɔɡ bini bobɛl la, o na kɔlɔŋ, asɛ peera aa wara kuore atoro chɔ baro. Gɛ kɔlɔŋ nɔ taa ba dɔ nee tɛa aa nyɔ. Bwe baa kpɔa tɔ o nyoa la kan kɛrɛdɛ.

³ Peera la bwa baa cheme kɔlɔŋ la ta naa, ɡɛɛ peteɡre la ɡbili bwe la le o nyoa, dɛ́ dɔ nee tɛa á nyɔ, ásɛ o berɛ ɡbili tɔ.

⁴ Belaa Jekɔb pɛɛ peteɡra la ŋɔ, “Yabala, leperaa he leɔ?” Asɛ ba chaŋe ŋɔ, “Ya le Haran.”

⁵ O berɔ pɛɛ ba ŋɔ, “He jemɛ Neehɔ naa baa dɛ yerɔ Laban la aa?” Ba ɡe ŋɔ, “Ɔɔh, ya jemɔ.”

⁶ Anee Jekɔb bɔɔ ba ŋɔ, “O lea aa?” Ba ŋɔ, “O bwara kpeɡri.” Ba ŋɔ, “Nyiŋi na, o bihaah baa dɛ yerɔ Rakɛl la ne o peeraa dɛɛ ba la.”

⁷ Asɛ Jekɔb ŋɔ ba be ŋɔ, “Wee ta nyɛɡre he ba boa peera nɔ nyoa la, hé tɛa nee a nyɔ dɛ berɛ kpɔa kaa dibɔr.”

⁸ Belaa ba chaŋe ŋɔ, “Yaa won ɛ ɡɛ, nemenɛ a bwa ba boa nyoa bonɔ, ásɛ ya ɡbili bwe nɔ le kɔlɔŋ nɔ nyoa mɔɔ dɛ́ tɛa nee a nyɔ.”

⁹ O ne ba ta aa dɛ bol waa la dɛ Rakɛl ne o mɛɛ peera la ɡe balɔ dɛ ba jo. O te la, dɛ peera nɛɛ wɛɛ nyiŋi.

¹⁰ Jekɔb aa na o naara peera kɛ Rakɛl dɛ ba a ne la, o la kɔlɔŋ la ta dɛ ka ɡbili bwe la le o nyoa, dɛ dɔ nee tɛa a nyɔ.

¹¹ Asɛ dɛ ka ɡbaa Rakɛl pɛl o bambile, dɛ mo o lwɛɛma dɛ wi.

¹² Jekɔb ŋɔ o be ŋɔ, “He mɛɛ lolee men, n nyaa Rebɛka.” Asɛ Rakɛl chwa dɛ ka ŋɔ o mɛɛ be.

¹³ Laban aa no o manaara Jekɔb waa la, o chwao ka chemo dɛ ɡbaaro pɛl o te dɛ ba o ne dem. Asɛ Jekɔb bɔ o amaneɛ bwa.

¹⁴ Asɛ Laban ŋɔ, “Kasinteŋii, n lole tentenee hen.” Asɛ Jekɔb so o be korobibir bwa.

Jekɔb tomɛ o naara dɛ kpɔ o bihaahna mo

¹⁵ Belaa Laban ŋɔ o be ŋɔ, “Bɛ koh kɛŋɔ n lolee hen nomanta hɛɛ ɛ tomaa dɛɛ tɛ mɛ pɛɛ. Suuɡa aŋwɛnɛɛ hɛɛ nyin kɛ ń bɔ dɛɛ tɛɛ nɔ?”

¹⁶ Dɛ o dɔ bihaahna banɛ. Nomoa la sɔne Lea asɛ bechala la ɡee Rakɛl.

¹⁷ Dɛ Lea sibie aa were kɛrɛdɛ, kɛ dɛ Rakɛl te wer tolo kohona.

¹⁸ Bii la bwa bini la, dɛ Rakɛl nɛɛ Jekɔb sie ɛɛ lɛ, anomanta, o ŋɔ Laban be ŋɔ, “Hɛɛ tɛ mɛ Rakɛlee n mo te naa, mɛɛ ɛ he tomaa tɛɛ bene anuanɛ.”

¹⁹ Anee Laban ŋɔ, “Dɛ he laa aa, maa on kpɔ tɛ nomɛlbwa. So n be.”

²⁰ Anomanta, Jekɔb koh Rakɛl waa dɛ ɛ toma tɛ Laban bene anuanɛ. Nyina waa dɛ nyin Rakɛl kohona la ɡelɔ bene anuanɛ la do kɛŋɔ tɔpera tamaa ane ken o be.

²¹ Tɔpere la aa tela la, Jekɔb ŋɔ Laban be ŋɔ, “Bene anuanɛ la telo, tɛ mɛ n haah la ásɛ n mo name.”

²² Anomanta, Laban daa hanfalkondikwa dɛ yerɛ bwɛɛ la tena bwa ba cheme dɛ lɛ ba sie.

²³ Kɛ a jwaana la, Leaa Laban berɛ lawɛ ba tɛ Jekɔb asɛ o ne o ka chɔ.

²⁴ Dɛ berɛ lawɛ tolo baa dɛ yerɔ Silpa la ba tɛ Lea ŋɔ ó do o sie.

²⁵ Jekɔb ne haah la aa kaa chɔ la, bɔr chaahnɔ mɔɔ o ta na kɛŋɔ Leaa o ne o chɔ la. Belaa o la Laban be dɛ ka bɔɔro ŋɔ, “Bɔkwa waa he ɛɛ mɛ ken? Rakɛl waa laa n koh dɛ ɛ he toma aa? Aah ɛrɛ he berɛ neɡ mɛ ken nɔɔ?”

²⁶ Asɛ Laban chaŋe ŋɔ, “Gɛ laa a do ya harɛ nɔ ta. Nomoaa ba lawɛ dɛɛ tɛ yal mɔɔ bechala.

²⁷ Gel hanfalwaa nɔ yawanyoa ba kaa, ásɛ n kpɔ Rakɛl ɡe tɛɛ. Dɛ hɛɛ berɔ tom mɛ bene anuanɛ jaa.”

²⁸ Jekɔb sɛh ɡɛ waa ŋɔ o be la ta. Anomanta, yawanyoa la aa baa kaa la, Laban lawɛ Rakɛl ɡe tɛo ja.

²⁹ Asɛ dɛ lawɛ o tolo baa dɛ yerɔ Bilha tɛo ŋɔ ó do o sie.

³⁰ Jekɔb lawɛ Rakɛl ɡe o ne o chɔ. Dɛ o dɛ nyinu dɛ ɡwaa Lea dɛ koh a waa dɛ tomɛ Laban bene anuanɛ ja.

Jekɔb bii wa

³¹ Belaa Korowii aa naa kɛŋɔ o dɛ nyin Rakɛl waa dɛ ɡwaa Lea la, o tɛ Lea lol asɛ Rakɛl te ɛ hambara.

³² Lea kpoŋe tea dɛ lolɛ bibaa dɛ pa o sɔn Rubin. O munii kɛŋɔ Korowii na wahala maa lɔ a bini. “Name te n jaa ɛɛ dɛɛ nyin mɛɛ.”

³³ A habɔɔ, o berɔ kpoŋe tea dɛ lolɛ bibaa ja asɛ dɛ ŋɔ, “Korowii noɔ kɛŋɔ baa men nyin a waa o tɛ mɛ bie nɔ ja nɔ.” Dɛ pa o sɔn Simeon.

³⁴ O berɔ kpoŋe tea dɛ lolɛ bibaa ja. Dɛ ŋɔ, “Namee n jaa ɛɛ ba o bambile bwa kpɔe tɛ mɛ dɛkalkɛ n lolɛ bibaala batoro bwa tɛo.” Dɛ pa o sɔn Lewi.

³⁵ O berɔ kpoŋe tea ja, waa baa lolɛ la, dɛ bibaalee ja, asɛ o ŋɔ, “Name te mɛɛ jam Korowiirii.” Asɛ dɛ pa o sɔn Juda. A habɔɔ o lol che.