Mumpar 28 - mzwDBL

¹ Belaa Aesek yerɛ Jekɔb dɛ swee andɛɛɡa tɛo dɛ berɛ ŋɔ, “Bɛ Keenan harɛ nɔ ta haahna nɔ bini bɛlbwa mo.

² Ir dɛ́ kaa Mɛsopoteemea harɛ ta, dɛ ka mo haah le he nya mɛɛ Bɛtoɛl dem. Ka mo he naara Laban bihaahna la bini bɛl.

³ Kórowii Waa ɛ Kpeɡri Bwa Dɔɔ la che he mun ta, dɛ́ swee andɛɛɡa tɛɛ he hahmor ta, ásɛ he lolɛ bii kohona á che a ta he ɛ harɛre nɛra ɡalɡa naa.

⁴ Onee dɛ́ che he ne he naanar mun ta, ɡɛ waa cheɡɛ Abraham mun ta la, ásɛ harɛ nɔ yaa ɛ hɔɔhra o ta Korowii kpɔ tɛ Abraham nɔ ɛ he kon.”

⁵ Belaa Aesek ta Jekɔb ŋwɛnɛ o kaa Mɛsopoteemea harɛ ta Bɛtoɛl bibaa Laban be. Rebɛka waa lolɛ Jekɔb ne Esɔ la dɔɔree. O ɛ Aram te.

⁶ Esɔ nao kɛŋɔ Aesek swee andɛɛɡa tɛ Jekɔb, dɛ tao ŋwɛnɛ ŋɔ o kaa Mɛsopoteemea harɛ ka mo haah bela, dɛ ŋɔ o bɛ Keenan harɛ bihaah mo,

⁷ asɛ Jekɔb no o nya ne o mɛɛ deŋna wa dɛ kaa bela.

⁸ Esɔ ɡe nao kɛŋɔ Keenan harɛ haahna wa aa were o mɛɛ be kwaraa,

⁹ asɛ o chiɡ ŋwɛnɛ ta dɛ kaa Ismael waa ɛ Abraham bie la be dɛ ka mo o bihaah baa dɛ yerɔ Mahalat la ja o haahna la nɛ. O nime sɔne Nɛbayɔt.

Jekɔb deera waa deera Bɛtel

¹⁰ Belaa Jekɔb le Beɛseeba dɛ chiɡ ŋwɛnɛ ta dɛɛ kaa Haran.

¹¹ Waa dɛ kaa la, o kaa tel bobɛl bɔr joo o chɔ, dɛ kpɔ nyu serɛ bwe bɛl.

¹² O chɔe bini la, o deero dɛ na kɛŋɔ sanjol le nyundua ba chiɡ harɛ, asɛ nyundua toroma teeh dɛ la dɛɛ ba.

¹³ Dɛ Korowii cheɡɛ o jwɛh dɛ ŋɔ, “Menee Korowii, menee he mɛɛ Abraham ne Aesek tomɛ la. Harɛ haa chɔ o ta nɔ, he ne he naanaree mɛɛ ba kpɔe tɛ.

¹⁴ He naanar ɛɛ warɔɔ kɛŋɔ harɛ nɔ ta teera, dɛ́ yɛɛ kaa harɛ nɔ ta bobɛlbwa. He ne he naanar nɛɛ aa ba cheɡa, ásɛ n swee andɛɛɡa tɛ harɛ nɔ ta nɛra bwa.

¹⁵ Berɛ lii kɛŋɔ mɛɛ teŋɛ he nɛɛ, dɛ́ tɔ he nɛɛ bobɛlbwa haa dɛ ba kaala, dɛ́ berɛ ba he ne harɛ nɔ ta ja. Maa hen ta bwa, nemenɛ n ɛ waa maa baɡɛ nyoa la.”

¹⁶ Jekɔb aa ir dom ta la, o ŋɔ, “Amɔ Korowii lɔ bonɔ asɛ n ta jemɛ!”

¹⁷ Asɛ ɔmee lawɔ o ŋɔ, “Bonɔ ɔma kɛrɛdɛ! Bonɔ ɛɛ ɛ Korowii demii. Bonɔ ɛ doonyoa baa kpɔ o ta dɛɛ kaa nyundua.”

¹⁸ Tɔ aa pera chɔmbibi la, o kpɔ bwe waa kpɔ o nyu serɛ o ta la pa bela harɛ la ta, dɛ́ kpɔ dɛɛ lii bela, dɛ fuɡe noo ta o ta dɛ kpɔ do Korowii nɔn ta.

¹⁹ Dɛ pa bela sɔn Bɛtel. Wubwa la dɛ o sɔne Lus.

²⁰ Asɛ Jekɔb baɡɛ Korowii nyoa ŋɔ, “Dɛ hɛɛ ja n nɛɛ dɛ́ kpɔ nɔn tɔ n nɛɛ n ŋwɛnɛ maa dɛ kaa nɔ ta, dɛ́ tɛ mɛ kondikwaa ne yal maa tɔ,

²¹ ásɛ n berɛ ba n mɛɛ dem deŋnesɔɔhna ne naa, hɛɛ ɛ Korowii maa dɛɛ tomɛɛ.

²² Bwe maa kpɔa pa dɛ kpɔ dɛɛ liiri nɔɔ dɛɛ ba he torome bɔr ɛɛ. Ásɛ komɛlbwa ɡe haa tɛ mɛ la, bɔre fi bɛlbwa la, mɛɛ tɛɛ bɔrbeŋkpoŋii.”