Mumpar 27 - mzwDBL

Aesek swee andɛɛɡa tɛ Jekɔb

¹ Aesek baa hwɛɛh dɛ nyoŋe. Awola bɛl, o yerɛ o binomoa Esɔ dɛ ŋɔ, “N bie.” O sɛh ŋɔ, “N mɛɛ men la.”

² Belaa o ŋɔ o be ŋɔ, “Taraken n hwɛɛhrɔ, maa n seo tɔpere jemɛ.

³ Anomanta, kpɔ he laala, he hɛma ne to, dɛ́ kaa kpɔɡ bini ka nyin ol

⁴ dɛ́ ba daa n pɛla kondikwaa tɛ mɛ n di, ásɛ n soŋe andɛɛɡa le Korowii be tɛɛ mɔɔ dɛ́ sewɛ.”

⁵ Gɛ saŋ Aesek aa dɛ bol waa Esɔ be la, dɛ Rebɛka dɛ no. Anomanta, Esɔ aa kaa kpɔɡ bini dɛ́ ka nyin ol ba tɛ o mɛɛ la,

⁶ Rebɛka ŋɔ Jekɔb be ŋɔ, “Na, n noɔ kɛŋɔ he mɛɛ aa dɛ bol he dɔɔ be ŋɔ

⁷ ó kaa kpɔɡ bini ka nyin ol ba daa o pɛla kondikwaa ba tɛo ó di, ásɛ o soŋe Korowii andɛɛɡa tɛo mɔɔ dɛ sewɛ.

⁸ Anomanta, n bie, cheɡ deŋne dɛ́ no waa maa dɛ ba he be bola nɔ dɛ́ ɛa.

⁹ Ir la kondɛɛra la bini dɛ́ ka lawɛ bohloni anɛ aa wera ba tɛ mɛ, ásɛ n kpɔ daa he mɛɛ pɛla kondikwaa tɛo ɡɛ waa dɛ nyin.

¹⁰ Ásɛ he kpɔ ka tɛo o di, dɛ́ soŋe andɛɛɡa tɛɛ mɔɔ wɛɛ sewɔɔ waa o sewɛ.”

¹¹ Anee Jekɔb ŋɔ o nya be ŋɔ, “N dɔɔ aa dɔ pona, n te aa wola pona dɔe nɔ,

¹² dɛ n mɛɛ kaa laɡ mɛ dɛ kpɔ nɔn valɛ n bwara aa, aa ka ɛ kɛŋɔ neɡraa mɛɛ neɡro wa aa? Taahna kwaraa wɛɛ ba n taahna, dɛ́ ɡel andɛɛɡa soŋa dɛ́ tɛ mɛ.”

¹³ Belaa o nya chaŋo ŋɔ, “N bie, he te ka ɛ wobɛlbwa maa bola la, ásɛ a habɔɔ wobɛlbwa ba dawɛ n nɛ.”

¹⁴ Ate, o la ka lawɛ boohna la ba tɛ o nya, asɛ o kpɔ ɛ kondikwaa aa do som ɡɛ o mɛɛ aa dɛ nyin.

¹⁵ O kpɔ Esɔ bonɔnlaala ba do Jekɔb.

¹⁶ O berɔ kpɔ boohna la tɔne bɔle o nɔɔra, ne o baŋa bela pona aa wola toole la.

¹⁷ O kpɔ kondikonsoma la ne paanoo waa ɛa la do Jekɔb nɔn ta o ka tɛ o mɛɛ.

¹⁸ Waa la kondikwaa la ne la, o yerɛ o mɛɛ, asɛ o sɛh dɛ pɛɛ ŋɔ, “Umee yɔ?”

¹⁹ Anee Jekɔb sɛh ŋɔ, “Menee he binomoa Esɔ, n ba ol la ne dɛ́ ba ɛ ɡɛ haa ŋɔa la. Ir so dɛ́ di kwaa la, ásɛ dɛ soŋe Korowii andɛɛɡa tɛ mɛ.”

²⁰ Asɛ Aesek ŋɔ, “N bie, he denɔ dɔ warane to.” Anee Jekɔb chaŋe ŋɔ, “Korowii haa dɛ tomɔ laanee tɛ mɛ hɛɛra.”

²¹ Anee Aesek ŋɔ Jekɔb be ŋɔ, “Tuuh ba ásɛ n lawɛ na kɛŋɔ Esɔɔ hen kpelaa?”

²² Asɛ o suuh tel o mɛɛ be o kpɔ o nɔn laɡro dɛ ŋɔ, “Taa nɔ te dɛ le Jekɔb taa, kɛ nɔɔra nɔ te le Esɔ nɔɔra.”

²³ O ta wone jemɛ kɛŋɔ Jekɔboo dɛkalkɛŋɔ, dɛ o nɔɔra dɔ pona kɛŋɔ Esɔ nɔɔra. Anomanta, o fe dɛ nyin o soŋe andɛɛɡa tɛo.

²⁴ O berɔ pɛɛro ja ŋɔ, “Esɔɔ hen kpelaa?” O ɡe sɛh ŋɔ, “Ɔɔh, menee.”

²⁵ Anee Aesek ŋɔ, “N bie, kpɔ kondikwaa la tɛ mɛ, ásɛ n kpɔ ol la bɛl chwe, dɛ́ soŋe andɛɛɡa le Korowii be tɛɛ. Asɛ o kpɔ tɛo o di, dɛ kpɔ senfala ɡe tɛo o nyɔ ja.”

²⁶ Belaa o mɛɛ ŋɔ o be ŋɔ, “N bie suuh tel, dɛ́ ɡbaa mɛ pɛl he bambile, dɛ́ mo n lwɛɛma.”

²⁷ Asɛ o suuh tel o mɛɛ, dɛ ɡbaaro pɛl o bambile, dɛ mo o lwɛɛma. Waa no o bie Jekɔb laala la sɔɔh la, o soŋe andɛɛɡa Korowii be tɛo dɛ ŋɔ, “N bie sɔɔh do kɛŋɔ harɛ Korowii aa ɡela o ɛ harɛdɛɛɡe sɔɔh.

²⁸ Kórowii pili nyundua dɛ́ nɛ bwaala, dɛ́ tɛɛ hɛɛra he konduula bwa do wer, he dɔ kondikwaa ne senfala kohona.

²⁹ Harɛre nɛra ɛɛ tomɛɛ, dɛ́ ɡuŋii harɛ. Hɛɛ ɛ nomoa he nya bii bwa nɛɛ, ásɛ ba ɡuŋi harɛ. Nomɛlbwa waa taahnee la, á berɛ ɡure o nyu ta, ásɛ nomɛlbwa waa soŋe andɛɛɡa tɛɛ la, ó ɡe dɔ andɛɛɡa.”

³⁰ Aesek aa soŋe Korowii andɛɛɡa tɛ Jekɔb tonɛ asɛ o le kaa la, o dɔɔ Esɔ ɡe le kpaah bɔr ba.

³¹ O ɡe daa kondikonsoma ba tɛo. Asɛ dɛ ŋɔ o be ŋɔ, “Ir so ásɛ dɛ di ol maa kaa kpoo ba ɛ kondikwaa ba tɛɛ nɔ, dɛ́ soŋe Korowii andɛɛɡa tɛ mɛ.”

³² Belaa o mɛɛ bɔɔ ŋɔ, “Umee hen ɔ?” O chaŋe ŋɔ, “Menee he binomoa Esɔ.”

³³ Anee o mɛɛ kpɔ bochechela dɛ bɔɔro ŋɔ, “Aah dɛ umee kpɔ kpɔɡ bini ol dɛ daa ba tɛ mɛ laɔ? Gɛ kondikwaa laanee n di tonɛ, dɛ soŋe Korowii andɛɛɡa tɛ naate, dɛ he ɡe deno baa jo la. Kasinteŋ, o wobɛlbwa ɛɛ do werii tɛo!”

³⁴ Esɔ aa no ɡɛ la, o do lɔŋɔ kohona lokua ne, dɛ ŋɔ o mɛɛ be ŋɔ, “N mɛɛ, amɔ soŋe Korowii andɛɛɡa tɛ n ɡeɔ?”

³⁵ Asɛ o mɛɛ ŋɔ, “He nime baa neɡ mɛ dɛ ɡel n soŋe anla n fe aa soŋe tɛɛ la tɛo.”

³⁶ Anee Esɔ ŋɔ, “O sɔn Jekɔb la maɡre o ne. O munii neɡra. Anɔɔ jaa nɛɛtena waa faah mɛ. O lɛ n nomonome, asɛ dɛ lɛ soŋa he fe aa soŋe tɛ mɛ la ɡe ja.” Dɛ berɛ bɔɔro ŋɔ, “Amɔ he ta wobɛlbwa dɔe dɛ́ soŋe Korowii andɛɛɡa tɛ mɛ kpa aa?”

³⁷ Belaa Aesek chaŋo ŋɔ, “N dɔɔ kpɔɔ ɛ he nomoa, dɛ kpɔ he lolanar bwa ɛ o bonɔɔna. N tɛo hɛɛra ásɛ o konduula bwa do wer o dɔ kondikwaa ne senfala kohona. Bɔkwaa kaa ń soŋe tɛɛ jaɔ?”

³⁸ Esɔ toɔh marɛ o mɛɛ dɛ soŋo ŋɔ, “Amɔ wesoŋa beŋkpoŋ ɡboo he dɔ dɛ tɛ Jekɔb haa wola bɛlee dɔ tɛ n te kpa aa? Soŋe andɛɛɡa tɛ n ɡe.” Asɛ dɛ wi kohona.

³⁹ Belaa o mɛɛ Aesek ŋɔ, “Korowii aa nyundua pili dɛ́ nɛ bwaala tɛɛ, waa hen harɛdɛɛɡee tɛ he so dɛ́ dɔ kondikwa.

⁴⁰ Yoi ɡboo hɛɛ ba dɛɛ yoi mɔɔ dɛ́ dɔ kwaa di, dɛɛ tomɛ he nime. Kɛ he baa tomɔ la sie tama naa, hɛɛ yoo, dɛ́ berɛ won lɛ he te.”

Jekɔb aa chwaa kaa Laban be

⁴¹ Gɛ Jekɔb aa neɡre o mɛɛ o soŋe andɛɛɡa tɛo la, Esɔ haoh. O lii o nyu bini ŋɔ, “Aa biɡri bɛlbwa n mɛɛ sewɛ. Ba baa ɛ o lwe tonaa, ásɛ n kpo Jekɔb.”

⁴² Waa dɛ kpɔ ɡɛ liire nɔ la, Rebɛka noɔ asɛ dɛ tomɛ ba ka yerɛ Jekɔb ba, dɛ ŋɔ o be ŋɔ, “He dɔɔ Esɔ dɛ vɔrɔwe he vɔrɔwa kɛŋɔ wɛɛ kpoe.

⁴³ Taraken n bie, no n waa nɔ. N dɛ nyin kɛŋɔ he le bonɔ warane, dɛ́ kaa n dɔɔ Laban be Haran.

⁴⁴ He laŋaa, he so bela tama ka tel kɛ he dɔɔ baah aa sɔɔhno mɔɔ.

⁴⁵ He dɔɔ baa soh wobɛlbwa o baah sɔɔhnoo waa, mɛɛ tomɛ nɛra he bee ásɛ he berɛ ba. Maa won so nyiŋi n bii banɛ bwa serewe tɔpebeŋkpoŋ.”

⁴⁶ Belaa Rebɛka ŋɔ Aesek be ŋɔ, “N sie aa Hiti bitoli nɔ nɛɛ lɛ. N kii ba kɔkɔkɔ. Dɛ Jekɔb ŋɔ wɛɛ mo ba bini bɛlee yaa, mɛɛ sewɔɔ hɛo.”