Mumpar 24 - mzwDBL

Aesek ne o haah Rebɛka

¹ Abraham biɡro dɛ hwɛɛh ɡe kɛrɛdɛ. Dɛ Korowii tɛo hɛɛra o wobɛlbwa ta.

² Asɛ o ŋɔ o bonɔɔna bwa nomoa waa dɛ nyiŋi o komɛlbwa ta dem bela la be ŋɔ, “Gɔɔ nɔɔra nyundua,

³ dɛ́ ŋwɛɛ Korowii waa lɔ nyundua ne harɛ bwa la, kɛŋɔ haa Keenan tena maa soɡe ba baah nɔ bihaahnee nyin tɛ n bie nɔ.

⁴ N ɡbaɡba harɛ ta ne n lolanar binii mɛɛ nyin kɛ he mo haah tɛ n bie Aesek.”

⁵ Belaa o bonɔɔ la bɔɔro ŋɔ, “Dɛ haah maa nyin tɛo la ŋɔ waa won teŋɛ n nɛɛ dɛ́ ba harɛ nɔ ta naa, ń kpɔ he bie la berɛ kaa harɛ haa le o ta ba bonɔ la ta kɛɛ?”

⁶ Asɛ o ɡe chaŋe ŋɔ, “Nyiŋi kɛrɛdɛ dɛ bɛ berɛ kpɔ n bie la kaa harɛ la ta kpa.”

⁷ Dɛ berɛ ŋɔ, “Korowii Waa Dɛ Di Kora Nyundua laanee kpɔ mɛ le n mɛɛ dem ne harɛ baa lol mɛ o ta la ta, dɛ ŋwɛɛ baɡ mɛ kɛŋɔ n naanaree wɛɛ ba ɡɛ harɛ nɔ kpɔe tɛ. Wɛɛ ɡeloo o nyundua torome tɔ he sie, ásɛ he won ka dɔ haah ba tɛ n bie nɔ.

⁸ Kɛ dɛ haah la ta sɛɛh dɛ teŋɛ ba naa, amɔ dɛ he ta ŋwɛɛra haa ŋwɛɛra la ta toe. Kɛ nyiŋi kɛrɛdɛ kɛŋɔ ŋwɛnɛ bɛlbwa ta la haa n bie kpɔ kaa bela.”

⁹ Asɛ Abraham bonɔɔ la ɡɔɔ nɔɔra nyundua o sie, asɛ dɛ ŋwɛɛ a ɡɛ ŋwɛɛra la baɡlo.

¹⁰ Belaa bonɔɔ la kpɔ o nomoa nyoɡmare fi, dɛ kpɔ nomoa la laaladɛɛɡa bwa soo siwi ja, dɛ chiɡ ŋwɛnɛ ta kaa Neehɔ bwɛ, Mɛsopoteemea harɛ ta.

¹¹ Waa vala dɛ tel bwɛɛ la dahare awola bɛl la, dɛ bɔr dɛ jo haahna ɛɛ la jɔmɔrpoli, asɛ o ɡel nyoɡmare la ɡuŋi harɛ bule bɛl nyoa.

¹² Ate, o soŋe Korowii ŋɔ, “N Naa Korowii n dɔɔ Abraham aa dɛ tomɛ, n dɛ soŋe, ɡel a chiɡ mɛ kɛrɛdɛ fini, dɛ́ teŋɛ nyoa haa baɡɛ n dɔɔ la ta.

¹³ Bule nɔ jwɛɛh bonɔ maa cheɡa nɔ, dɛ bwɛɛ nɔ toli balɔ ŋɔ bá ba dɔ ne aa,

¹⁴ ɡel onɔ la maa ŋɔ ó choɡ o nee ásɛ n nyɔ ane la sɛh, dɛ́ berɛ ŋɔ wɛɛ tɛ n nyoɡmare nɔ ɡe anee á nyɔ la, ó ɛ haah haa dɛ ba kpɔe tɛ Aesek la. A taa mɛɛ ba cheɡa dɛ́ jemɛ kɛŋɔ he teŋɛ nyoa haa baɡɛ n nomoa la ta.”

¹⁵ O nyoa taa lɔ a ɡɛ waa nɔ ta wɛɛ bol la, dɛ tolo Rebɛka polvii chɔŋɛ o vam ta o ba le. Abraham nime Neehɔ ne o haah Milka bibaa Bɛtoɛl biee.

¹⁶ Rebɛka wer tolo kɛrɛdɛ. Waa baa jemɛ bwa. O kaa dɔ nee dɛɛ ba.

¹⁷ Asɛ bonɔɔ la chwa dɛ ka chemo dɛ ŋɔ, “N dɛ soŋe ɡel n nyɔ he nee nɔ tama ane.”

¹⁸ Anee o chaŋo ŋɔ, “N dɔɔ, nyɔ ane.” Asɛ o ɛ warane choɡ nee la dɛ kpoŋa nɔn ta dɛ ɡel o nyɔ.

¹⁹ Waa ɡela o nyɔ tonɛ la, Rebɛka berɛ ŋɔ, “Mɛɛ ka dɔ anee ba tɛ he nyoɡmare nɔ ɡe a nyɔ vaɡɛ.”

²⁰ O ɛ warane dɛ fuɡe nee la kar do kon kondɛɛra aa dɛ nyɔ o bini la ta, dɛ berɛ ɛ warane kaa bule la ta ja, dɛ ka dɔ ane ba tɛa a nyɔ vaɡre.

²¹ Bonɔɔ la nyiŋu jeiih, o ta wobɛlbwa bolɛ dɛɛ lii kɛŋɔ o ŋwɛnɛ waa bao la, Korowii ɡelɔ wɛɛ ba hɛɛra dɔe kɛɛ?

²² Belaa nyoɡmare la aa nyɔ nee la tonɛ la, bonɔɔ la laa suuɡaswɛm noniseɡ baa kpɔa dɛɛ do mee o yoɡ do kpeɡri kohona do Rebɛka mee ta, dɛ berɛ kpɔ suuɡaswɛm nɔnloɡa do o nɔɔra.

²³ Asɛ dɛ pɛɛro ŋɔ, “N poori, ume biee hen ɔ? Yaa dɔ chɔɔbɔr he mɛɛ deemii yaa.”

²⁴ Asɛ o ŋɔ, “Milka ne Neehɔ bie Bɛtoɛl bihaahnee men.”

²⁵ Dɛ berɛ ŋɔ, “Ya dɔ kpɔɡa, ne kondɛɛra kondikwaa kohona, dɛ bela haa chɔ bwa.”

²⁶ Anee Abraham bonɔɔ la ɡuŋi harɛ dɛ kpɛɛ Korowii,

²⁷ dɛ ŋɔ, “Korowii n dɔɔ Abraham aa dɛ tomɛ, jam kɛŋɔ haa dɔ kasinteŋ dɛ teŋɛ dɛɛ nyin n dɔɔ nɔ. Asɛ dɛ kpɔ n naa andɛɛɡa ba n dɔɔ lolanar buse nɔ.”

²⁸ Belaa bitolo la chwa la o nya be dem, dɛ ka bol waa la bwa baɡle dem bela tena.

²⁹ Dɛ Rebɛka nimambie bɛl lole baa yerɔ Laban. Laban chwao le buse dɛ la baa la be bule la ta,

³⁰ dɛkalkɛŋɔ o na noniseɡ la aa lɔ o nime mee ta ne nɔnloɡa la aa lɔ o nɔɔra ta, dɛ no ɡɛ Rebɛka aa bol waa baa la aa bol o be la. O la baa la be, dɛ ka nao kɛŋɔ waa cheɡɛ o nyoɡmare jwɛɛh bule la ta.

³¹ Asɛ dɛ jaamo dɛ ŋɔ, “Korowiirii kpɔ he naa la. Dɛɛ ba! Ɛrɛɛ he ba che dahara ɡɛ nɔɔ? Dea haa chɔ ne bela he nyoɡmare nɔ aa chɔ bwa lole.”

³² Belaa Laban kpɔ o ne nyoɡmare la kaa dem, dɛ ka laa laala nyoɡmare la aa cheɡa la pur. Dɛ tɛa kpɔɡa ne kondikwa. Asɛ dɛ tɛ baala baa teŋɛ o nɛɛ la nee ŋɔ bá sarame nakpale.

³³ Ba baa tɛɛ ba kondikwa, anee Abraham bonɔɔ la ŋɔ, “Maa di, nemenɛ maa bɔ me amaneɛ mɔɔ.” Asɛ Laban ŋɔ, “Amɔ bɔ he amaneɛ ɔ.”

³⁴ Ate o ŋɔ, “Abraham bonɔɔnee men.

³⁵ Korowii ɛ n dɔɔ andɛɛɡa kohona dɛ tɛo kondɔɔh. O tɛo peera ne nae ne suuɡapoŋa dɛ suuɡaswɛm, dɛ tɛo yombaala ne yomhaahna ne nyoɡmare dɛ keeɡore.

³⁶ N dɔɔ Abraham haah Saara lolɛ bibaa tɛo o hanjeni bini. Asɛ Abraham kpɔ o komɛlbwa waa dɔa tɛ bie la.

³⁷ O ɡelɔ n ŋwɛɛ ntam ŋɔ, ‘Bɛ Keenan harɛ nɔ maa soɡe o ta nɔ haah mo tɛ n bie nɔ,

³⁸ kɛ ka mo haah le n mɛɛ dea tɛo.’

³⁹ Belaa n pɛɛ n dɔɔ ŋɔ, ‘Aah dɛ haah la ŋɔ waa n nɛɛ teŋɛ ba sɛ?’

⁴⁰ Anee o chaŋe ŋɔ, ‘Korowii maa dɛ tomɔ la ɛɛ tomɛ o nyundua toromee o ba ja he nɛɛ dɛ́ ɡel he dɔ hɛɛra, dɛ́ ka dɔ haah waa le ya dea ba tɛ n bie nɔ.

⁴¹ Dɛ he la dea maa le o ta, dɛ ba ta hen haah la tɛɛ kwaraa ɡba aa, dɛ he ta ntam toe kpa.’

⁴² Maa tel bule la ta fini la, n ŋɔ, ‘Korowii n dɔɔ Abraham aa dɛ tomɛ, dɛ hɛɛ sɛoh waa, tɛ mɛ hɛɛra waa maa dɛ ba ba ɛ nɔ ta.

⁴³ Gel bule nɔ maa baa che o nyoa nɔ, tolo bɛlbwa waa ba dɛ́ ba dɔ nee ásɛ n soŋo ŋɔ ó tɛ mɛ nee tama ń nyɔ la,

⁴⁴ ásɛ o sɛh dɛ́ ŋɔ wɛɛ berɔɔ ka ɛ ane tɛ n nyoɡmare ɡe la, ɡel o ɛ haah hen Korowii aa kpɔɔ dɛɛ ba n dɔɔ bie la tɛɛ.’

⁴⁵ Maa dena soŋe a ɡɛ wesoŋa nɔ n nyu bini tonɛ, buɡ la ta, dɛ Rebɛka deno forɛ le, asɛ o polvii chɔŋɛ o vam ta, dɛ baa kaa bule la ta dɛ́ ka dɔ nee la. Asɛ n ŋɔ o be ŋɔ, ‘Tolo, n dɛ soŋe, tɛ mɛ nee nɔ ane n nyɔ.’

⁴⁶ Belaa o ɛ warane dɛ choɡ o nee la dɛ ŋɔ n nyɔ, asɛ n nyɔ. Asɛ o ka dɔ ane ba tɛ nyoɡmare la ɡe a nyɔ.

⁴⁷ Anee n pɛɛro ŋɔ, ‘Ume biee hen ɔ?’ Asɛ o ŋɔ, ‘Neehɔ ne Milka bie Bɛtoɛl biee men.’ Belaa n kpɔ noniseɡ do o mee ta, asɛ dɛ kpɔ nɔnloɡa ɡe do o nɔɔra.

⁴⁸ Belaa n ɡuŋi dɛ jam Korowii, dɛ kpɛɛ n dɔɔ Abraham Korowii waa kpɔ n naa andɛɛɡa kɛŋɔ ń ka mo n dɔɔ nime bie ba tɛ o bie la.

⁴⁹ Taraken dɛ hɛɛ won cha n dɔɔ, ásɛ o yarada waa yarada heyaa la bɛ pɛɛ ɛ aa, hé di mɛ kasinteŋ. Ásɛ n jemɛ ɡɛ maa ɛ.”

⁵⁰ Belaa Laban ne Bɛtoɛl chaŋe ŋɔ, “Korowii bee waa nɔ bwa le, anomanta, ya ta liire bɛlbwa dɔe kpa.

⁵¹ Rebɛkaa la, kpɔɔ kaa ásɛ o ka yalɛ he dɔɔ bie ɡɛ Korowii aa bola la.”

⁵² Abraham bonɔɔ la aa no ba waa la ɡɛ la, o ɡuŋi harɛ asɛ dɛ jam Korowii.

⁵³ Asɛ bonɔɔ la laa kwaa baa kpɔ suuɡaswɛm ne suuɡapoŋ ɛa la ne yale tɛ Rebɛka, dɛ berɛ kpɔ laala a ɡe yoɡ aa kpeɡa tɛ haah la dɔɔ ne o nya.

⁵⁴ Awola ba hɔɔh o ne baala baa ja o nɛɛ la kɛrɛdɛ. Ba chɔ bela jwaana la ne. Asɛ tɔ aa pera chɔɔ la, o soŋ ba ŋwɛnɛ, dɛ́ berɛ kaa o dɔɔ be.

⁵⁵ Anee Rebɛka dɔɔ ne o nya chaŋe ŋɔ, “Gel haah la so ya be tama dɛ́ ɛ tɔpera fi mɔɔ dɛ́ kaa.”

⁵⁶ Asɛ o ɡe berɛ ŋɔ, “He bɛ men lawɛ so bonɔ. Korowii aa dɔa ɡel n ŋwɛnɛ nɔ do wer tɛ mɛ nɔ, he tɛ mɛ ŋwɛnɛ, ásɛ n berɛ kaa n dɔɔ be.”

⁵⁷ Anee ba berɛ ŋɔ, “Gel ya yerɛ haah la ɡbabir ba dɛ́ ba bɔɔro.”

⁵⁸ Asɛ ba yerɔ dɛ pɛɛro ŋɔ, “He ne wɛɛ kaaloo kɛɛ?” Anee o ŋɔ, “Ɔɔh, n ne wɛɛ kaaloo.”

⁵⁹ Belaa ba ta Rebɛka ne haah waa kaa chao, ne Abraham bonɔɔ la ne o bala la bwa ŋwɛnɛ.

⁶⁰ Asɛ ba swee andɛɛɡa tɛ Rebɛka ŋɔ, “Ya nimambie, Korowii ɡel he ya kohona, he mun ya kohona aa wola nyoa dɔ, ásɛ he naanar yo lɛ ba dɔma bwɛɛre dɛɛ di a kpeɡri.”

⁶¹ Anee Rebɛka ne o toli ir, dɛ teeh so nyoɡmare la ta, dɛ teŋɛ bonɔɔ la nɛ. Asɛ dɛ chiɡ ŋwɛnɛ ta kaa. Kenii Abraham bonɔɔ la kpɔ Rebɛka kaa.

⁶² Dɛ Aesek ɡe lɔ bobɛl baa dɛ yerɛ bela Beɛ Lahae Rɔe waa lɔ Nɛɡɛv harɛ ta.

⁶³ Awola jɔmɔra bɛl o leɔ kaa bwɛɛ la dahare dɛɛ kpɔ liire, dɛ ŋɔ o nyiŋi dɛ na nyoɡmare aa dɛ ba.

⁶⁴ Belaa Rebɛka na Aesek asɛ dɛ tu nyoɡma waa soɡe o ta la ta,

⁶⁵ asɛ dɛ pɛɛ Abraham bonɔɔ la ŋɔ, “Baa bisoo dɛɛ cheme yaa nɔɔ?” Asɛ bonɔɔ la ŋɔ, “N dɔɔree.” Ate, Rebɛka laa konchaahne bɛl kpɔ bɔle o nyu.

⁶⁶ Bonɔɔ la bol wobɛlbwa waa kaa ɛ bwa chaɡle Aesek.

⁶⁷ Asɛ Aesek kpɔ Rebɛka ba o nya tɛnte dea o fa aa lɔ o bini la bini, asɛ o ɛ o haah. Dɛ Aesek dɛ nyin Rebɛka kɛrɛdɛ. Anee ɡela o dɔ bolarawa o nya seo la habɔɔ.