Mumpar 23 - mzwDBL

Saara seo wa

¹ Saara di bene lafa fifraanɛ dɛ anuanɛ mɔɔ dɛ sewɛ.

² Keenan harɛ ta bobɛl baa dɛ yerɛ bela Kiriat Aaba, dɛ berɛ dɛɛ yerɛ bela Hɛbrɔnee o ka sewɛ. Asɛ Abraham la ka ɛ o lwe dɛ wiu.

³ Abraham le bela o haah lale aa chɔa la, dɛ ka na Hiti tena o ne ba bol o ŋɔ ba be ŋɔ,

⁴ “N ɛ hɔɔh dɛ ba pu heyaa so, bonɔ laa n le. Anomanta, hé tɛ mɛ harɛ asɛ n yawɛ dɛ huɡe n haah.”

⁵ Asɛ ba chaŋo ŋɔ,

⁶ “Nomoa, dɛɛ no, nomonjenii hen ya bini bonɔ. Yaa won vɔmɛ lalbɔɔ ŋɔ he bɛ he lale huɡe. He won o huɡa ya lalbɔɔne nɔ bɛlbwa he tea aa too o ta bini.”

⁷ Belaa Abraham ir dɛ baa ba harɛ,

⁸ dɛ soŋ ba ŋɔ, “Dɛ he sɛoh ŋɔ n huɡe n nɛn tenaa, amɔ he no n be, dɛ́ soŋe Soha bie Efron tɛ mɛ

⁹ kɛŋɔ ó tɛ mɛ bwebɔɔ waa lɔ Makpɛla dɛ ɛ o kon dɛ chɔ o harɛ nyoa la. He ŋɔ o be ŋɔ ó yoɡu ɡɛ o yoɡ aa chɛa tɛ mɛ, ásɛ n dɔ lala huɡri bɔr he be bonɔ.”

¹⁰ Anee Efron chaŋe Abraham o bala Hiti tena baa soɡe bwɛɛ la doonyoa la sie dɛ ŋɔ,

¹¹ “Akai, nomoa, dɛɛ no n be. N kpɔ harɛ la tɛɛ, dɛ kpɔ bwebɔɔ la ɡe tɛɛ. N nɛra nɔ bwa siwi taa n kpɔ harɛ la dɛɛ tɛɛ. Huɡe he nɛn o ta.”

¹² Asɛ Abraham ba Hiti tena la harɛ ja,

¹³ dɛ ŋɔ Efron be nɛra la bwa sie ŋɔ, “Dɛɛ no, dɛ hɛɛ sɛoh tenaa, mɛɛ bɔe harɛ la kemee. N dɛ soŋe kɛ he lɛ, ásɛ n won huɡe n lale la bela.”

¹⁴ Belaa Efron chaŋo ŋɔ,

¹⁵ “Nomoa, dɛɛ no. Harɛ la yoɡ lɔ suuɡapoŋa lafraanaarɛ, kɛ a ta kwaane ɛɛ n ne he baah. He te ka huɡe he nɛn.”

¹⁶ Asɛ Abraham sɛh dɛ bɔ suuɡapoŋa lafraanaarɛ, ɡɛ Efron aa di harɛ la yoɡ ba bala la bwa no la tɛo ba siwi ta. O bɔ ba ɡɛ ba bonadiire aa dɛ peɡra ɡɛ saŋ la.

¹⁷ Belaa ba kpɔ Efron harɛ waa lɔ Makpɛla dɛ do Mamre wee leebɔr la, ne bwebɔɔ la, ne daa aa lɔ koo la ta bwa,

¹⁸ dɛ do Abraham nɔn ta Hiti tena baa lɔ bwɛɛ doonyoa la ta la bwa sie.

¹⁹ A habɔɔ la, Abraham huɡe o haah Saara bwebɔɔ la ta. Belaa baa yerɛ Hɛbrɔn, o do Keenan harɛ ta la.

²⁰ Gɛɛ a ɛ Hiti tena kpɔ harɛ la ne bwebɔɔ la do Abraham nɔn ta ŋɔ ó kpɔ ɛ o lala huɡribɔr.