Mumpar 22 - mzwDBL

Korowii aa daah Abraham na wa

¹ Waa nɔ bwa habɔɔ la, Korowii daah Abraham dɛ́ na ɡɛ waa dɛ yaradao. O yerɔ, “Abraham,” asɛ o sɛh ŋɔ “N Naa Korowii, menee nɔ.”

² Belaa o ŋɔ o be ŋɔ, “Kpɔ he bibeŋkpoŋ Aesek haa dɛ nyin o waa la kaa Moria harɛ ta dɛ́ ka kpoo, dɛ́ fuuh ɛ saraha tɛ mɛ. Mɛɛ baɡlee bwejen bɛl haa ka ɛ saraha la o taa.”

³ Tɔ aa per chɔmbibii la, o iro do o bone dɛ vɔwɛ dawɛ keeɡo nɛ. O kpɔ o bonɔɔna banɛ ne o bie Aesek, ne daa waa ka mar dɛ ɛ saraha la, asɛ ba chiɡ ŋwɛnɛ ta dɛɛ kaa bela Korowii aa baɡlo la.

⁴ Tɔpetooro wee la, o ha sie nyiŋi dɛ na bela Korowii aa baɡlo la bojaŋ.

⁵ O ŋɔ o bonɔɔna la be ŋɔ, “Hé ne keeɡo nɔ che bonɔ, ásɛ n ne bie nɔ ka soŋe Korowii dɛ́ berɛ ba.”

⁶ Ate, o laa daa baa ka mar la kpɔ choɡ Aesek, dɛ ɡe kpɔ kere ne nii kpoŋe baa kaa.

⁷ Belaa Aesek yerɛ o mɛɛ Abraham ŋɔ, “N mɛɛ,” asɛ o sɛh ŋɔ, “N biee hen.” Anee Aesek chaŋe ŋɔ, “Nii ne daaree nɔ, aah leperaa pee haa dɛ ba kpɔe ɛ saraha la te dɔɔ?”

⁸ Asɛ Abraham chaŋe ŋɔ, “N bie, Korowii ɡbaɡbaa dɛ́ tɛ pee maa kpɔ ɛ saraha la.” Ba nɛra banɛ la bwa berɛ tɛr do dɛɛ kaa.

⁹ Baa kaa tel bela Korowii aa chaɡle Abraham la, o kwaa kon baa dɛ fuh kwaa o ta dɛɛ jam Korowii la bɛl bela, asɛ dɛ pa daa darawe o ta. O vɔrɔwe o bie Aesek dɛ kpɔɔ dawɛ daa la doa.

¹⁰ Belaa o ha nɔn kpɔ kere la dɛ́ fee kpɔ kpo o bie la.

¹¹ Asɛ Korowii nyundua torome bɛl che nyundua yerɔ, “Abraham!” Anee o sɛh ŋɔ, “Menee nɔ.”

¹² Asɛ o ŋɔ, “Dɛɛ berɛ bie la wobɛlbwa ɛɛ. Namee n ta jemɛ kɛŋɔ he dɛ ɔmɛ Korowii, dɛkalkɛ he ta men he bibeŋkpoŋ nɔ kwaraa vɔmɛ.”

¹³ Abraham ha sie nyiŋi, asɛ dɛ na pebal o nyeɡlare aa karɛ kaɡra ane ta o che. Asɛ o ka lawɔ dɛ kpoo, dɛ kpɔ chiɡ o bie la naa ta, dɛ fuh ɛ saraha tɛ Korowii.

¹⁴ Anomanta, o pa bela sɔn ‘Korowii Dɛɛ Tɛ.’ Dɛ ba le fini, ba dɛ bol bela waa ŋɔ, “Korowii ɛɛ tɛo o bwe la doa.”

¹⁵ Belaa Korowii nyundua torome la che nyundua dɛ yerɛ nɛɛtena ja

¹⁶ dɛ ŋɔ, “N ŋwɛɛ n ɡbaɡba kɛŋɔ waa nɔ haa ɛa he ta men he bibeŋkpoŋ kwaraa vɔmɛ nomanta,

¹⁷ mɛɛ tɛɛ hɛɛra tentenee. Mɛɛ ɡeloo he naanar warɛ kɛŋɔ weweela ne mpo nyoa hɛŋle. He naanar ɛɛ yoo lɛ ba dɔma bwɛɛre dɛɛ di a kpeɡri,

¹⁸ ásɛ a che ba nɛɛ ń tɛ nɛwɛnyina bwa hɛɛra. Mɛɛ ɛ ɡɛɛ dɛkalkɛ, he ɛ waa maa dɛ nyin.”

¹⁹ Belaa Abraham berɛ ba o bonɔɔna la be, asɛ ba ir ba Beɛseeba, Abraham so bela.

Neehɔ bibaala wa

²⁰ Anɔ bwa habɔɔ la, ba ŋɔ Abraham be ŋɔ Milka lolɛ bibaala banuatoro tɛ o nime Neehɔ.

²¹ O biloɡlee Us. Us nimanar ɡee Bus ne Kɛmoɛl waa lolɛ Aram,

²² ne Kɛsɛd ne Haso ne Peldas ne Jidlaf dɛ Bɛtoɛl.

²³ Bɛtoɛl lolɛ Rebɛka. A ɡɛ bii banuatoro nɔɔ Milka lolɛ tɛ Abraham nime Neehɔ.

²⁴ Dɛ o ne haah bɛl soɡo o ɛ o sɛno baa yerɔ Reuma. O ɡe bii waa lol ba laanee Teba ne Gaham ne Tahas dɛ Maaka.