Mumpar 21 - mzwDBL

Aesek lola wa

¹ Korowii aa baɡɛ Saara nyoa la, o chao dɛ ɡel o nyobaɡa la ɛ ɡɛ.

² Saara kpoŋe tea, dɛ lolɛ bibaa tɛ Abraham o hwɛɛhra bini, ɡɛ saŋ tenten Korowii aa baɡɔ nyoa ŋɔ baa lolɛ bie laanee la.

³ Asɛ Abraham pa bie la Saara aa lola tɛo la sɔn Aesek.

⁴ O bie Aesek aa dɔ yawanyoa la, o teŋe o pen ɡɛ Korowii aa ŋɔ o be la.

⁵ Baa lolɛ Aesek la, dɛ Abraham dɔ bene lafa.

⁶ Anee Saara ŋɔ, “Korowii tɛ mɛ silɛɛ dɛ ŋɔ n mamɛ name, nomɛlbwa waa ba no ɡɛ waa nɔ la ɡe sie ɛɛ lɛo ó mamɛ.”

⁷ Dɛ berɛ ŋɔ, “Dɛ nɛn ŋɔ Abraham be ŋɔ n ɡe Saara ɛɛ sɔɔh biirii yaa, ba fe aa ŋɔ n nyosone naa? Kɛ n lolɛ bibaa tɛo o banjeni saŋ.”

Heeɡa ne o bie Ismael doŋa wa

⁸ Aesek kpeɡo ba teŋo el. Awola baa teŋo el la tenten la, Abraham ɡelɔ ba ɛ kondikwaa ba kpɔ lɛ ba sie.

⁹ Awola bɛl, Saara na Heeɡa waa le Ijipt harɛ la bie o ne Abraham aa lolɔ la kɛŋɔ, o ne o bie la aa dɛ hɛlɛ wɛɛ muɡli o baah.

¹⁰ Belaa o ŋɔ Abraham be ŋɔ, “Doŋi yomhaah la ne o bie la. Dɛkalkɛŋɔ yomhaah la bie ne n bie Aesek aa won pɛ di he kapɛrɛ a maɡre.”

¹¹ Gɛ waa nɔ ha Abraham taeh dɛkalkɛ, o bie a ɡɛ bie la ɡe.

¹² Anee Korowii ŋɔ o be ŋɔ, “Bɛ ɡel he yomhaah Heeɡa ne o bie la waa hiaeh kwara. He te dɛɛ no Saara be dɛkalkɛ, Aesek luɡe taa hɛɛ ba he naanar maa baɡɛ nyoa la dɔe.

¹³ He yomhaah bie la ɡe la, wɛɛ yao taeh, dɛ́ ɡe dɔ ba harɛ, dɛkalkɛ he bie o ɡe.”

¹⁴ Anomanta, Abraham iro chɔmbibii dɛ kpɔ kondikwaa ne oltɔn pur, dɛ do nee o bini o su dɛ kpɔ chɔŋɛ Heeɡa vaama ta. O lawɛ bie la ja o nɛ, dɛ ta ba ŋwɛnɛ ba kaa. Heeɡa aa lea kaa la, bobɛl waa ɛ pua hɛŋle ɡbo harɛ baa yerɔ Beɛseebaa o ka do dɛɛ ɡaaɡe.

¹⁵ Pur bini nee la baa tonɛ o kpɔ bie la ka bil dajeɡa bɛl lɔɡa,

¹⁶ asɛ dɛ kaa ɡelo dɛ ɛ naɡale lafa del dɛ ka so. O lii o nyu bini ŋɔ, “Maa won che nyiŋi, ásɛ n bie sewɛ n siwi ta.” O soɡe bela dɛ wi kohona.

¹⁷ Belaa Korowii no bie la wii, asɛ o nyundua torome che nyundua ŋɔ Heeɡa be ŋɔ, “Heeɡa, bɔkwa waa dɛɛ hae nɔ? Bɛ ɔmɛ. Korowii no he bie la waa chɔ bela la wii.

¹⁸ Anomanta, ir ka kpɔɔ dɛ́ ɡbɛɡbɛo. Mɛɛ ɡeloo o ya taeh o harɛ do kan.”

¹⁹ Belaa Korowii ɡel o sie chole bule bɛl ta, asɛ o la ka dɔ nee do oltɔn la bini, dɛ ka tɛ bie la ane o nyɔ.

²⁰ Korowii kpɔ nɔn tɔ bie la nɛɛ o ba kpeɡ, dɛ so bobɛl baa dɛ yerɛ bela Paran. Bela ɛ pua hɛŋle ɡbo harɛ, asɛ o so bela dɛɛ kpaah to ne kɛrɛdɛ.

²¹ Asɛ o nya nyin Ijipt haah tɛo.

Abraham ne Abemɛlɛk fɔo fɔwa wa

²² A ɡɛ saŋ la, Kooro Abemɛlɛk kpɔ o laa tena nomoa Fekɔl dɛ la Abraham be dɛ ka ŋɔ, “He wobɛlbwa haa dɛ ɛ la, Korowii ja he nɛ.

²³ Anomanta, ŋwɛɛ Korowii kɛŋɔ haa n ne n bii ne naanaree neɡre. Nyiŋi kɛrɛdɛ wedɛɛɡa maa ɛɛ la, ásɛ dɛ kpɔ ɡɛ ɛ n ne harɛ nɔ haa baa so o ta taraken dɛ ɛ hɔɔhra nɔ tena bwa.”

²⁴ Asɛ o ŋɔ, “N ŋwɛɛrɔ kɛŋɔ mɛɛ ɛ ɡɛɛ.”

²⁵ Belaa o bol o kɔlɔŋ bɛl Kooro Abemɛlɛk bonɔɔna aa kpɔ kpeɡri lɛ la waa baɡlo.

²⁶ Asɛ o chaŋe ŋɔ, “Maa nɛra baa ɛ ɡɛ waa nɔ jemɛ bwa. Dɛ fini laa hɛɛ bola nɔ naa, n fe ta an noɛ bwa.”

²⁷ Abraham kpɔ peera ne nae tɛo, asɛ ba che a ta dɛ fɔwɛ fɔo.

²⁸ Abraham berɔ chale peloni anuanɛ, dɛ le o peera bini dɛ kpɔa ka che baŋ bɛl.

²⁹ Asɛ Kooro Abemɛlɛk bɔɔro ŋɔ, “Ɛrɛɛ a mun ɛɛ chaɡle ɔ?”

³⁰ Anee o chaŋe ŋɔ, “Lɛ peloni anuanɛ nɔ, ásɛ a ɛ danseɛ kɛŋɔ he sɛoh kɛ menee kwi kɔlɔŋ nɔ.”

³¹ Ba pa bela sɔn Beɛseeba, dɛkalkɛŋɔ belaa ba nɛra banɛ la cheme dɛ fɔwɛ fɔo.

³² Ba Beɛseeba fɔo nɔ habɔɔ la, Kooro Abemɛlɛk ne Fekɔl berɔ kaa Filisti tena harɛ ta.

³³ Asɛ Abraham chɔɔ daa bɛl Beɛseeba bela, dɛɛ tomɛ Korowii waa lole saŋ bɛlbwa la bela.

³⁴ Abraham soɡe Filisti tena harɛ ta bela biɡri.