Mumpar 20 - mzwDBL

Abraham ne Abemɛlɛk

¹ A habɔɔ la, Abraham kpɔ sie chaɡɛ weekaŋle harɛbɔr pera bobɛl pua hɛŋle ɡbo harɛ baa yerɔ Nɛɡɛv, dɛ ka so Kades ne Suur baah ta. O berɔ ka so Gerar ɡe tama.

² Belaa o ŋɔ o nimambiee o haah Saara. Anomanta, Gerar kooro baa dɛ yerɔ Abemɛlɛk tomɛ nɛra ba ka lawɛ Saara ba tɛo.

³ Jwaana bɛl, Korowii ba o be deera ta, dɛ ba ŋɔ o be ŋɔ, “Na! Haah la haa kpɔɔ nomanta, hɛɛ sewɔɔ, dɛkalkɛ nomɛl haahnee.”

⁴ Dɛ o ne haah la ta baa ne haah chɔe mɔɔ, anomanta, o ŋɔ, “N Naa Korowii, amɔ hɛɛ kpo ya ne ya tepoŋee yaa?

⁵ Abraham ɡbaɡbaa ŋɔa ŋɔ o nimambiee, asɛ haah la ɡe ŋɔ ɡɛ tenten. Liichɔɡa bɛlbwa laa n lii.”

⁶ Belaa Korowii ŋɔ o be deera ta ŋɔ, “Kpelaa. N ɡbabir jemɔ kɛŋɔ liichɔɡa laa he lii. Menee lawɛ kpoŋe, ásɛ he bɛ n nɛɛ jo. A waa n ta ɡelɛ he kpɔ he te leɡo la.

⁷ Anomanta, berɛ ɡel haah la kaa o jaa be, dɛkalkɛ n keamee o jaa la. Wɛɛ soŋ mɛɛ, ásɛ he dɔ he nyu. Kɛ dɛ he ta o haah la berɛ ka tɛo te naa, hee he ne kwaa haa dɔa bwa ɛɛ ba hee.”

⁸ Anomanta, tɔ aa pera chɔmbibi ne la, Kooro Abemɛlɛk yerɛ o nomonome bwa cheme, dɛ bol ɡɛ waa nɔ bwa ba be, asɛ ɔmee laɡ ba kohona.

⁹ Belaa o yerɛ Abraham dɛ bɔɔro ŋɔ, “Bɔkwa waa he ɛ yaa ken? Bɔkwa waa n den ɛɛ, asɛ he fe ɛɛ ba wechɔɡa damanta nɔ dɔŋa kpɔe ba ta n ne n nɛra nɛɛ nɔɔ? A ta chɛ kɛ he kpɔ a ɡɛ waa nɔ ɛɛ mɛ.

¹⁰ Bɔkwa waa ba he nyu bini he ɛ ɡɛ waa nɔ nɔɔ.”

¹¹ Asɛ Abraham chaŋe ŋɔ, “N liiro kɛŋɔ nomɛlbwa toole dɛɛ ɔmɛ Korowii baah bonɔ. Dɛ n dɛ ɔmɛ kɛŋɔ baa koh n haah waa dɛ́ kpo mɛ.

¹² Kasinteŋ, n nimambie tentenee. N mɛɛ biee, n nya te bie laa asɛ n moo.

¹³ Korowii aa ɡela n le n mɛɛ dem dɛ do pua dɛɛ ɡaaɡe la, n ŋɔ o be ŋɔ, ‘He dɛ nyin mɛ naa, bobɛlbwa yaa tel bwa la, he dɛ ba n waa bolaa, ŋɔ he dɔɔree men.’ ”

¹⁴ Asɛ Abemɛlɛk lawɛ peera ne nae, ne yombaala ne yomhaahna dɛ kpɔ tɛ Abraham, asɛ dɛ kpɔ o haah Saara tɛo.

¹⁵ Belaa Abemɛlɛk ŋɔ o be ŋɔ, “Na, harɛ nɔ aa chɔa kaa nɔ, n konee o bwa. Hɛɛ won ka so bobɛlbwa haa dɛ nyin.”

¹⁶ Asɛ dɛ ŋɔ Saara ɡe be ŋɔ, “N tɛ he dɔɔ suuɡapoŋa kaɡboŋ. Anee dɛ́ ɡel banɔ la baa ja he nɛɛ la bwa jemɛ he nyu bini, ásɛ nɛra bwa tae tɔɔ.”

¹⁷ Asɛ Abraham soŋe Korowii tɛ Abemɛlɛk ne o haah dɛ o yomhaahna la bwa kɛ ó pili ba lol, asɛ o pili ba lol ba won loɡle,

¹⁸ dɛkalkɛ Saara nomanta, Korowii tɔ Abemɛlɛk dem haahna bwa lol.