Mumpar 2 - mzwDBL

¹ Gɛɛ a do Korowii ta nyundua ne harɛ, ne komɛlbwa aa lɔ a ta dɛ tonɛ.

² Tɔpenuanɛ te ne tela la, dɛ o tonɛ o toma bwa. Anomanta, o onɔ tɔpenuanɛ te la ta.

³ Anomanta, o le tɔpenuanɛ la cheɡ tɛ o te, o do ɡoroŋ dɛ sweero andɛɛɡa, dɛkalkɛŋɔ o taa o ɡel toma ɛɛ kwaa waa taa la bwa ta.

Baa ne haah Korowii aa kpɔ ba do Eden bodɛɛɡe wa

⁴ Kenii Korowii ta nyundua ne harɛ. Korowii aa ta nyundua ne harɛ la,

⁵ dɛ konduula ne kpɔɡa ta harɛ la ta leɛ, dɛkalkɛŋɔ dɛ o ta ɡelɛ bwaala nɛ o ta mɔɔ. Dɛ nomɛlbwa ɡe toole dɛ́ parɛ harɛ la.

⁶ Nee yon le harɛ bini dɛɛ sɔɔh harɛ la.

⁷ Asɛ Korowii kpɔ teera ma baa, dɛ hwee do o mebɔɔne bini, o dɔ mkpa dɛ so.

⁸ A habɔɔ la, Korowii du daa bodɛɛɡe bobɛl baa yerɔ Eden wee leebɔr, dɛ kpɔ baa waa tao la ka so bela.

⁹ O ɡelɔ daa bwa soo siwi le bela dɛ do wer siwi ta a nɔna dɔ pɛla kɛŋɔ nɛn di. Daa anɛ ane cheɡɛ konduula la baah ta. Bɛl dɛ tɛ mkpa, bɛl ɡe ɡel nɛn ɛɛ jemɛ wedɛɛɡa ne anchɔɡa.

¹⁰ Moo bɛl nyu le Eden bodɛɛɡe bela dɛ palɛ dɛɛ kpɔ daa la baah dɛɛ sɔɔh harɛ la. Waa le bela la, o peɡri bɔre anaarɛ.

¹¹ O kpale waa tɔ sie la sɔne Pesɔn Moo. O palɔ dɛ ɡoli kpɔ Havila harɛ ta bela suuɡaswɛm aa lole.

¹² Suuɡaswɛm tenten ne bwedɛɛɡa a yoɡ aa kpeɡa, ne konsɔɔhsoma a sɔɔh aa soma lɔ bela.

¹³ O kpal nɛɛte la sɔne Gehɔn Moo. O palɔ dɛ ɡoli kpɔ Kus harɛ ta.

¹⁴ O kpal toorote la sɔne Tiɡris Moo. O palɔ dɛɛ kaa Asiiria harɛ wee leebɔr pera. Asɛ naarɛte la sɔne Yufretis Moo.

¹⁵ Korowii kpɔ baa waa tao la ka so Eden bodɛɛɡe bela waa du daa la dɛ ŋɔ, wɛ́ɛ parɛ o ta dɛɛ nyiŋi bela,

¹⁶ asɛ dɛ jao ŋɔ, “Hɛɛ wonoo di daa la bɛlbwa sese nɔn.

¹⁷ Kɛ bɛ onɔ la waa dɛ tɛ liire dɛ́ ɡel nɛn jemɛ wedɛɛɡa ne anchɔɡa la te nɔn di. Awola haa di a ɡɛ daa la nɔn la bɛl la, sewaa hɛɛ ba sewa.”

¹⁸ Asɛ Korowii ŋɔ, “Aa were kɛŋɔ baa la ɡbo so. Mɛɛ kwaa o dɔŋee ja o nɛ, ásɛ wɛɛ chao.”

¹⁹ Ate, o kpɔ teera dɛ ma ola ne jumbii. Asɛ dɛ kpɔ a bwa ba baa la be dɛ ŋɔ ó paa sɔna. Gɛ waa yerɛ kon la bɛlbwa la, o sɔnee.

²⁰ Baa la pa kpɔɡ bini ola, kondɛɛra ne jumbii bwa sɔna. Kɛ dɛ o te ta o dɔŋ waa chao dɔe ja o nɛ.

²¹ Anomanta, o ɡelɔ baa la chɔ dom ka ɡarɛ, o laa o kuɡlambi beŋkpoŋ kpɔ dɛ kpɔ ol tɔ bela.

²² O kuɡlambi la waa kpɔa la, o kpɔɔ ka kwaa haah dɛ kpɔ ba tɛ baa la.

²³ Asɛ baa la ŋɔ, “Yɔɔ! Taraken te, n ɡbaɡba hoɡ ne n bo-ol tentenee nɔ. O sɔne ‘haah’. Baa binii o le.”

²⁴ A waa ɡela baa yon ɡel o nya ne mɛɛ, dɛ́ ka kpɔ haah ba yon pɛ so, dɛ́ ɛ beŋkpoŋ la.

²⁵ Dɛ baa la ne o haah la bwa dɛ valɛ mumɡbal, kɛ dɛ sihiih aa ban kpo.