Mumpar 19 - mzwDBL

Sodom ne Gomoora chɔɡa wa

¹ Nyundua toroma la tel Sodom jɔmɔrane. Dɛ Lɔt soɡe bwɛjen la doonyoa baa cheɡɛ o ta dɛɛ jo la ta. Waa na ba la, o iro dɛɛ chem ba, asɛ dɛ ba harɛ dɛ kpɔ sie pi harɛ dɛ ŋɔ,

² “N dɔɔranar n dɛ soŋe heya, hé pere kpɔ men maa ɛ he bonɔɔ be bonɔ, dɛ́ ba sarame nakpale ásɛ dɛ chɔ kere hé kaa.” Anee ba ŋɔ, “Ɔɔhɔh, yaa chɔ buse baahnee.”

³ Asɛ o soŋ ba sibeɡra ne kohona mɔɔ ba sɛh, dɛ pere kpɔ o be dɛ ba dem. Anee o ɡel o bonɔɔna wɔɔ paanoo baa wola iisi a ta doe, dɛ ɛ kondikondɛɛɡa tɛɛ ba ba di.

⁴ Baa wola chɔɔɡɛ mɔɔ la, bwɛɛ la baala, bechale ne nomonome bwa, den ba bar dem la cheme.

⁵ Asɛ ba ba bɔɔ Lɔt ŋɔ, “Leperaa hɔɔhra baa baa choɡe jɔmɔra nɔ ne la dɔɔ? Le ba ne tɛ yaa yá laɡ ba ka chɔ.”

⁶ Belaa Lɔt le, dɛ laa ɡbera tɔ, dɛ ba ba be.

⁷ Dɛ ŋɔ, “Bwɛɛla, n dɛ soŋe heya, he bɛ ɡɛ wedoŋa nɔ ɛ.

⁸ N dɔ bihaahna banɛ baa wola baa jemɛ bwa. Hé ɡel n le ba ne tɛ heya, ásɛ he ka ɛɛ ba ɡɛ he tea aa toora. Kɛ baala nɔ te, he bɛ ban wobɛlbwa ɛ kwaraa. Baa baa choɡ mɛ nɔ, a chɛ kɛ n nyiŋi ba nɛ.”

⁹ Anee ba ŋɔ, “Haa waa nyin aa, le ya sie. Hɔɔhree hen bonɔ, henee dɛ́ won baɡle yaa wa aa? He ta bela leɛ he kwaa ɛɛ ɡwaa ba kwaa.” Belaa ba ka lɔ tɔ o nɛ, dɛ́ fe taɡɔ le bela, dɛ́ dɔ bɔr ka ku ɡbera la.

¹⁰ Anee baala banɛ la aa na ɡɛ la, ba ha nɔn lawɛ Lɔt jo buse la bini, dɛ laa ɡbera tɔ.

¹¹ Asɛ ba ɡel nɛra baa cheɡɛ baŋ la bwa piɡri nyoŋe, ba ta wone na buse la doonyoa bɔr kpa.

Lɔt le Sodom kaa

¹² Belaa ba ŋɔ Lɔt be ŋɔ, “Dɛ he dɔ bibaala kɛɛ bihaahna, ne ba jaranar kɛɛ lolanar ba do bwɛɛ nɔ ta naa, kpɔ ba le kaa,

¹³ dɛkalkɛ ɡɛ ba wechɔɡa aa le nɛra bwa mee baa bola la kan to. Anomanta, Korowii tomɛ yaa ŋɔ yá ba chɔɡ bwɛɛ nɔ.”

¹⁴ Ate, Lɔt ka ŋɔ baala baa dɛ ba o bihaahna la moe la be ŋɔ, “Korowii dɛ ba bwɛɛ nɔ chɔɡa. He le o ta warane!” Dɛ ba dɛ lii kɛŋɔ sɛndɛɛ wɛɛ bɔ.

¹⁵ Bɔr aa dɛ ba chaahna la, Korowii toroma la kaa che Lɔt nɛɛ ŋɔ, “Ɛ warane lawɛ he haah ne he bihaahna banɛ nɔ le bonɔ kaa, ásɛ dɛ bwɛɛ nɔ dɛ ba chɔɡa aa, he te bɛ ba nɛɛ ja dɛ́ chɔɡ.”

¹⁶ Dɛ waa too dɛ́ le warane, anomanta, ba lawɛ o ne o haah ne o bihaahna la nɔɔra, dɛ kpɔ ba le bwɛɛ la ta. Dɛkalkɛ Korowii na ba te sum.

¹⁷ Belaa Korowii toroma la bini bɛl ŋɔ ba be ŋɔ, “He chwa dɛ́ lɛ he nyu. Bɛlbwa bɛ ke nyiŋi. He bɛ deŋɡarere doa harɛ waa chɔa kaa la ta che, he chwa kaa deŋɡarere dor, dɛ́ dɔ he nyu.”

¹⁸ Asɛ Lɔt soŋe ŋɔ, “Nomoa, n poori bɛ ɡel a ba ɡɛ.

¹⁹ He sune n nɛɛ kohona dɛ ɡel n dɔ n nyu, kɛ bwea nɔ dor bela haa dɛ baɡle nɔ jaŋne kohona kɛŋɔ, n ne bela tela dɛ siswɛm nɔ puu mɛ n sewɛ.

²⁰ He nyiŋo na naa, bwɛjeɡa bɛlee lɔ ya sie tenten la. Waa kanɛ kwaraa. Belaa bora nomanta, ɡel n kaa bela, ásɛ dɛ dɔ n nyu.”

²¹ Anee o sɛh ŋɔ, “Ɔɔh, n sɛh ɡɛ. Maa o tenee chɔɡ.

²² Ɛ warane, dɛ́ chwa kaa. Dɛ he ta bela telaa, maa won ɛ wobɛlbwa.” A waa ba pa bwɛɛ la sɔn Soar.

²³ Lɔt aa tel bwɛɛ la ta la, dɛ wee leɔ.

²⁴ Buɡ la ta, Korowii chure nii ne jebɔrɔwe aa dɛ fuh le nyundua ta Sodom ne Gomoora dɛ chɔɡ ba.

²⁵ O chɔɡ deŋɡarere dor harɛ waa chɔa kaa la bwa ne bwɛɛre aa lɔ o ta, nɛra baa lɔ bela bwa sekwaraa, ne konduula aa lɔ harɛ la ta bwa.

²⁶ Lɔt haah te keo nyiŋi, anomanta, o berɛ yabwejen che bela.

²⁷ Tɔ aa pera chɔmbibi la, Abraham berɔ la bela waa cheɡa Korowii bol waa o be la.

²⁸ O ta sie nyiŋi Sodom ne Gomoora pera, ne deŋɡarere dor harɛ waa chɔa kaa la bwa dɛ na chuu aa tɔ bela bwa kɛŋɔ kpɔɡjen bɛl aa dɛ fuh ken.

²⁹ Gɛɛ a do Korowii aa chɔɡ bwɛɛre aa lɔ deŋɡarere dor harɛ waa chɔa kaa la ta bwa la, o lii Abraham waa dɛ le Lɔt ne bela mɔɔ dɛ chɔɡa.

Lɔt ne o bihaahna wa

³⁰ Dɛ Lɔt dɛ ɔmɛ Soar soɡa, anomanta, o ne o bihaahna banɛ la ir bela dɛ kaa deŋɡarere la ta, dɛ ka jo bwebɔɔ bɛl ta so.

³¹ Belaa o binomoa la ŋɔ o nime be ŋɔ, “Name te ya mɛɛ dɛ hwɛɛh, asɛ baala toole harɛ nɔ ta bobɛlbwa dɛ ba mo yaa ya dɔ bii ɡɛ baa dɛ ɛa bobɛlbwa la.

³² Anomanta, ɡel ya tɛ n mɛɛ sen o nyɔ dɛɛ, ásɛ ya ne o chɔ dɛ́ lolɛ bii ya mun bɛ he.

³³ Awola jwaana la ne la, ba tɛo sen o nyɔ, asɛ o ne o binomoa la chɔ. Waa dɛɛra nomanta, o ta o ne o bihaah la chɔe ne o ira saŋ bɛlbwa nae.”

³⁴ Tɔ aa pera la, o bol o nime la be ŋɔ, “N ne n mɛɛ chɔɔ dɛ jwaana ne. Ɛrɛ ɡel ya tɛo ane jwaana nɔ ne ɡe ja, ásɛ he ɡe ne o chɔ. Ásɛ a che ya mɛɛ nɛɛ ya mun bɛ he.”

³⁵ Anomanta, awola jwaana la, ba tɛo sen o nyɔ dɛɛ ja, asɛ o bihahbechala la ɡe ir o ne o ka chɔ. Dɛɛra kohona nomanta, o ta o ne o bihaah la chɔe ne o ira saŋ bɛlbwa nae.

³⁶ Kenii Lɔt bihaahna banɛ la bwa ɛ ba ne ba mɛɛ kpoŋe teene.

³⁷ Binomoa la lolɛ bibaa, asɛ dɛ pa o sɔn Moab. Onee Moab tena bwa naa.

³⁸ Bechala la ɡe lolɛ bibaa, asɛ dɛ pa o sɔn Bɛn Ami. O ɡee Amɔn tena bwa naa.