Mumpar 17 - mzwDBL

Abram ne Korowii penteŋa fɔo fɔwa wa

¹ Abram aa di bene fifraanuanaarɛ dɛ anuanaarɛ la, Korowii ba o be deera ta dɛ ba ŋɔ o be ŋɔ, “Menee Kpeɡri Bwa Dɔɔ la. Dɛɛ no n wa, dɛɛ ɛ waa aa toɡra.

² Mɛɛ ɡeloo n ne he baah fɔo la che, ásɛ he ne he naanar warɛ kohona.”

³ Belaa Abram kpɔ sie pi harɛ asɛ Korowii ŋɔ o be ŋɔ,

⁴ “Fɔo n ne haa dɛ fɔwɛ laanee kɛŋɔ mɛɛ ɡeloo he ɛ harɛre damanta nɛra naa.

⁵ Baa hen Abramee yerɛ kpa, kɛ baa dɛɛ yerɛ Abraham, dɛkalkɛŋɔ henee mɛɛ ba ɡela he ɛ nɛnfuuh bwa mɛɛ.

⁶ Mɛɛ ɡeloo he naanar ya taeh, ásɛ a che he nɛɛ nɛra warɛ harɛre ta, ásɛ ba bini bane ɛ koranar.

⁷ Mɛɛ ɡeloo n fɔo la do n ne hen ne he naanar baah saŋ bɛlbwa dɛɛ la, ásɛ n ɛ he ne he naanar baa ka ba la bwa Korowii haa dɛɛ tom mɛ.

⁸ Mɛɛ tɛ he ne he naanar Keenan harɛ haa ɛ hɔɔhra dɛ so o ta taraken nɔ bwaa, ásɛ o ɛ he kon saŋ bɛlbwa dɛɛ la, ásɛ n ɛ Korowii haa dɛɛ tom mɛ.”

⁹ Korowii berɔ ŋɔ Abraham be ŋɔ, “He ɡe la, he ne he naanar baa ka ba la chɛ kɛŋɔ hé teŋɛ n fɔo nɔ ta.

¹⁰ N fɔo maa dɛ nyin o chɔ le tɛ he ne he naanar, ásɛ hɛɛ teŋɛ o ta laanee kɛ, hɛ́ɛ teŋni he bibaala bwa pena.

¹¹ Penteŋa nɔɔ dɛ́ baɡle fɔo waa chɔ n ne he baah.

¹² Le fini dɛɛ kaa, bibaa te bɛlbwa baa lolɔ la, hé teŋe o pen. He bini bɛlee kɛɛ nɛndɔɔlee yoo, o di tɔpera anuatoro naa, hé teŋe o pen.

¹³ Nomɛlbwa baa lolɔ o ɛ he ɡbaɡba bini bɛl, kɛɛ onɔ la haa yawɔ bwa, chɛ kɛ bá teŋe o pen, ásɛ n fɔo la do he bwadabii ta saŋ bɛlbwa dɛɛ la.

¹⁴ Bɛlbwa waa wola o pen teŋe la ta n nɛra nɛɛ jae kpa, dɛkalkɛŋɔ o ta n fɔo la ta teŋɛ.”

¹⁵ Korowii berɔ ŋɔ Abraham be ŋɔ, “He haah sɔn laa Sarai kpa. Le fini dɛɛ kaa o sɔne Saara.

¹⁶ Mɛɛ tɛo hɛɛraa, ásɛ o lolɛ bibaa tɛɛ. Mɛɛ ɡeloo o ɛ harɛre nɛra bwa naa, ásɛ ba bini bane ɛ koojena.”

¹⁷ Anee Abraham kpɔ sie pi harɛ, asɛ dɛ mamɛ o nyu bini ŋɔ, “Amɔ baa lɛɛ won di bene lafa dɛ lolaa? Saara aa di bene fifraanuanaarɛ nɔ, amɔ o ɡe ɛɛ won lolɛ kenɛ?”

¹⁸ Belaa o ŋɔ Korowii be ŋɔ, “N Naa Korowii, he fe ɡelɔ ɡɛ hɛɛra nɔ ba Ismael nɛɛ sɛ?”

¹⁹ Ate, Korowii ŋɔ, “N noɔ, kɛ Saara ɛɛ lolɛ bibaalee tɛɛ he pa o sɔn Aesek. Onee mɛɛ ba ɡela n fɔo la chɔ n ne o baah ta, dɛ́ chɔ tɛ n ne o ɡe naanar. Wɛɛ ɛ fɔo waa wola jaɡa dɔe bwa.

²⁰ N no Ismael haa soŋ mɛ o waa la wa. Mɛɛ tɛo hɛɛraa dɛ́ ɡel o bii ne o naanar warɛ kohona. Mɛɛ ɛo deene fi dɛ anɛ nomonome mɛɛ, ásɛ dɛ ɡel o naanar do kan ba harɛ ta.

²¹ Kɛ mɛɛ ɡeloo n fɔo la do n ne he bie Aesek Saara aa dɛ ba o lola benanyoa saŋ nɔ bɔr la baah.”

²² Korowii aa bol waa Abraham be tonɛ la, o le o be dɛ kaa.

²³ Awola tɔpere la, Abraham lawɛ o bie Ismael ne baala baa lɔ o dem bwa, banɔ la baa ɛ yoma ne bibaala baa lol ba o dem, dɛ teŋe ba pena ɡɛ Korowii aa ŋɔ o be la.

²⁴ Abraham aa di bene fifraanuanaarɛ dɛ anuanaarɛ la taa o teŋe o pen,

²⁵ dɛ o bie Ismael ɡe di bene fi dɛ atoro.

²⁶ Tɔpebeŋkpoŋii ba teŋe ba nɛra banɛ la bwa,

²⁷ ne baala baa lɔ o dem, ne banɔ la baa ɛ o nɛndɔɔla dɛ bibaala baa lol ba o dem bwa.