Mumpar 16 - mzwDBL

Heeɡa ne Ismael

¹ Abram haah Sarai ta bie lolɛ tɛo. Dɛ o dɔ tolo bɛl waa ɛ Ijipt te baa yerɔ Heeɡa o do o sie,

² asɛ o ŋɔ Abram be ŋɔ, “Korowii ta ɡelɛ n lolɛ, anomanta, berɛ kpɔ n tolo nɔ. A ken ɛɛ che o nɛɛ n dɔ bie.” Asɛ o sɛh a ta.

³ Anomanta, o lawɛ Heeɡa tɛo. Dɛ Abram soɡe Keenan harɛ bene fi mɔɔ a ɡɛ waa nɔ chiɡ.

⁴ Abram lawɔ chɔ o kpoŋe tea. Heeɡa aa baa na kɛŋɔ o kpoŋe tea la, o hah Sarai dɛɛ nyiŋi o nyubaah.

⁵ Anee Sarai ŋɔ Abram be ŋɔ, “Henee ɡela Heeɡa dɛɛ ɛɛ mɛ la. Menee lawɛ n tolo tɛɛ, kɛ taraken waa bera jemɛ kɛŋɔ o kpoŋe tea la, o siwi aa men tɔɡɛ kpa. Korowiirii dɛ́ baɡle n ne hen naate waa ɛ wechɔɡa.”

⁶ Belaa Abram ŋɔ Sarai be ŋɔ, “He toloo, he dɔ o kpeɡri dɛ́ doo ɡɛ haa dɛ nyin.” Asɛ Sarai fiiɡu kohona o ba chwa le o be.

⁷ Waa dɛ kaa la, belaa Korowii nyundua torome bɛl ba o be. Dɛ o lɔ bobɛl nee aa dɛ bule pua hɛŋle ɡbo harɛ bɛl ta, dɛ do bwɛɛ Suur ŋwɛnɛ ta.

⁸ Korowii nyundua torome la bɔɔro ŋɔ, “Sarai tolo Heeɡa, leperaa hɛɛ kaalɔ?” Asɛ o ŋɔ, “Chwae n chwa le n nya Sarai be.”

⁹ Asɛ Korowii nyundua torome la ŋɔ o be ŋɔ, “Berɛ kaa o be dɛ́ kaa tomɔ.”

¹⁰ Korowii nyundua torome la berɔ ŋɔ o be ŋɔ, “Mɛɛ ɡeloo he naanar warɛ, nɛn aa wola won kur ba.”

¹¹ Dɛ berɛ ŋɔ o be ja ŋɔ, “Bie lɔ he be. Hɛɛ lolɛ bibaalee dɛ́ pa o sɔn Ismael, dɛkalkɛ Korowii no he suna wii.

¹² Kɛ he bibaa la ɛɛ do kɛŋɔ keeɡo kpaŋii o soɡa bini, ásɛ o ne nomɛlbwa aa somee do. Mɛɛ korɛ o soŋnibɔree dɛ́ le o lolanar bini.”

¹³ Korowii aa bol waa Heeɡa be la nomanta, o pa bie la sɔn ŋɔ, “Korowii haa dɛ na mɛ,” dɛ ŋɔ, “Korowiirii n na dɛ ta so le nɔ naa?”

¹⁴ Anee ɡela nɛra ɛɛ yerɛ bule la Beɛ Lahae Rɔe, o munii kɛŋɔ, ‘Nɛn waa lole saŋ bɛlbwa dɛɛ na mɛ.’ O chɔ bwɛɛ Kades ne Bɛrɛd baah ta.

¹⁵ Heeɡa lolɛ bibaa tɛ Abram, asɛ o pa o sɔn Ismael.

¹⁶ A ɡɛ saŋ dɛ Abram di bene fifraanuatoro dɛ anumɛl.